ВЕЖЫСЬ ЛОӦ


Коля Матевлӧн батьыс тракторист. Совхозын уджалӧ. Тулысын и гожӧмын, арын и тӧлын сійӧс пыр позьӧ аддзывны трактор вылысь. Тулыснас гӧрас-кӧдзас, пуктас картупель. Сэсся небзьӧдас картупель муяс, ёг турунъясысь весалас. Гожӧмнас, кор воас турун пуктан кад, тракторӧн жӧ ытшкӧ. Пуксяс ар — бара нин муяс вылын, картупель керӧ, силосуйтчӧ. А совхозлӧн му-видзьяс зэв уна, колӧ ас кадӧ сійӧс гӧрны-кӧдзны, ставсӧ бура идравны.

Батьыс локтӧ гортас мудз. Колялы жаль овлӧ. Сэтшӧм окота отсавны. Но оз на вермы, ичӧт да.

— Батьӧ, менӧ тшӧтш босьтлы, отсышта кӧть! — вӧзйысьӧ Коля.

Батьыс нюмъялігтыр кутыштліс писӧ:

— Вот быдман шкап судта, помалан школа и батьыд моз жӧ трактористӧн лоан. Сэки и позьӧ шойччыштны меным.

Кор воис тулыс да муяс вылысь сыліс став лымйыс, Коля батьсӧ сёр рытын сӧмын и аддзывліс. Гажтӧмтчӧ лунтырнад зонка. Ӧтчыд сэсся и шуӧ мамыслы:

— Мамӧ, вай ме батьӧлы сёян катӧда.

— Катӧд эськӧ да, — шуис мамыс, — сӧмын эн ылав некытчӧ.

Коля босьтіс ичӧтик сумка да котӧрӧн мӧдӧдчис ыблань. Кор кыпӧдчис джуджыд мыльк вылӧ, кытысянь тӧвнас лыжиӧн иславлӧны, аддзис батьыслысь тракторсӧ. Трактор вылас дӧлаліс гӧрд флаг.

Детинка кутіс ӧвтчыны кинас да мый вынсьыс горзыны:

— Батьӧ-ӧ-ӧ! Тайӧ ме, Кольӧ! Сувтлы!

Трактор кывзысьысь вӧв моз жӧ сувтіс.

Коля котӧртіс сэтчӧ, кавшасис-кайис ичӧтик кабинаӧ да батьыслы мыччис тубрассӧ.

— Сёян вайин?

— Вайи...

— Вот и молодеч, бать вӧснаыд тӧждысян.

— Ме быд лун понда ваявны... Толькӧ тэ менӧ велӧд тракторсӧ новлӧдлыны.

— Ок тэ, тракторист! — долыдпырысь шпыннялӧ батьыс.

— Батьӧ, а флагсӧ нӧ эськӧ мыйла ӧшӧдін трактор вылад, талун ӧд абу праздник?

— Медся уна гӧри, да сійӧн сетісны.

— А мам оз на и тӧд, — радліс Коля. Сэсся кутіс кевмысьны батьыслысь, медым лэдзис пукыштны аскӧдыс орччӧн да видзӧдыштны батьыслысь гӧрӧмсӧ.

Ая-пиа куим кытш вӧчисны паськыд му гӧгӧр. Уна амысьяса плуг, коді вӧтчис трактор бӧрся, ас бӧрсяыс колис паськыд сьӧд визьяс. Батьыс меліа видзӧдліс пиыс вылӧ да висьталіс.

— Сэсся кӧдзам татчӧ анькытш да зӧр. И мичаа вежӧдасны муяс.


Гижӧд
Вежысь лоӧ
Жанр: 

lkejrlkelkrgner klrjnelknfrkl ekjnrjkenfrej

1