ПРАЗДНИК


— Аскисянь отпускӧ лэдзисны. Вӧлисти менам праздникыс заводитчӧ. Ок-мок... — керкаӧ пырӧмӧн тшӧтш мӧдіс радлыны Вералӧн батьыс, коді уджаліс автобус вылын шофёрӧн.

— Батьӧ, тэ нӧ мый? Некутшӧм праздник регыдъя кадӧн оз ло. Со кӧть видзӧдлы календарсӧ.

Батьыс читкыртліс синъяссӧ, тапнитіс нывсӧ и вӧлисти мӧдіс пӧрччысьны.

— Ок-мок... Праздникыс ещӧ кутшӧм! Быдса тӧлысь пӧшти! Быд лун пӧт и код... Ук...

— Мый тэ, батьӧ, позьӧ ӧмӧй....

Он гӧгӧрво, сералӧ батьыс али збыль висьталӧ. Синъясыс видзӧдӧны мудера.

— Нолтӧ, ныланӧй, кык кӧрыш нянь сумкаӧ пукты. Посводзын сійӧ ӧшалӧ. Сов эн вунӧд, но и чай-сакар. Вевта банкаӧ вый пуктышт. Пуля-пороксӧ ме ачым лӧсьӧда. Эк, праздник, праздник!

Вера ӧні сӧмын гӧгӧрвоис, кытчӧ батьыс мӧдӧдчӧ. Чукӧртіс нывка ставсӧ, мый тшӧктіс батьыс, и сӧмын сы бӧрын пуксис пызан сайӧ.

— Но и повзьӧдін жӧ менӧ. Ме ӧд чайті, отпуск чӧжыд, мися, гуляйтны да юны кутан.

— Да тэ эн пов, Веровьян. Батьыд тэнад и ыджыд праздник лунъясӧ стопкаяснад оз балуйт. А вот отпуск чӧжыд... юыштам, сӧмын ог вина... Тӧдан тэ, кутшӧм сійӧ ключ ваыс? Синваысь сӧстӧмджык, винаысь чӧскыдджык. Кружка тыр юан — вит лун дырджык олан. Абу ӧмӧй тайӧ праздник?

— Праздник? — Вера видзӧдліс батьыс вылӧ. — Праздникъясыс жӧ Май 1 лун, Октябрьскӧй... Ещӧ мамӧлӧн да менам праздник — Март 8 лун... Тэнад праздникъяс — февральын да Победа лун. Эмӧсь на и мукӧд праздникъяс.

— Тайӧ тэ ставсӧ лючки висьталін. Но, ыджыд праздникъясысь ӧтдор, быд мортлӧн эм аслас праздник. Да-да... Аслас праздник! Менам татшӧм лунъясыс вӧр-вакӧд аддзысьлӧм.

— Ой, батьӧ, висьталан жӧ. Да кутшӧм нӧ тайӧ праздник? Нимлун кӧ вӧлі, гашкӧ...

Вералӧн батьыс лӧсьыдджыка пуксис пызан сайӧ, быттьӧ ужнайтны лӧсьӧдчис, сэсся выльысь видзӧдліс нылыс вылӧ.

— Парма-ягъясӧй! Сьӧлӧм вӧрзьӧдысь местаясӧй! Тӧдан-ӧ, Веруш, мыйла ме быд во пета отпускавны арнас? И путёвка вӧзйӧны, шоныд муын море дорын позьӧ тімбылясьны. А ме ог кӧсйы. Меным чужан муын медся бур шойччӧгыс. Деньга оз ков шойччӧмсьыс мынтыны и сьӧлӧмыд радлӧ.

Вера тӧдіс: батьыс бара пондас ошкыны вӧр-васӧ, ёль бокын сулалысь ассьыс ичӧтик вӧр керкасӧ, сюсь понсӧ, коді быд ар шӧйтӧ кӧзяиныскӧд пармаын. Сідзи и лои...

— Ок-мок... Тӧдан кӧ эськӧ, кутшӧм вӧрас лӧсьыд. Кулан да кутан казьтывны... Чеччан водз, мӧдӧдчан тӧдса ордым кузя. Кытыськӧ сьӧла либӧ тар жбыркнитас. Понйыд пу йылӧ гӧрд урӧс вӧтлас. Каяс сійӧ пожӧм вылӧ да мӧдас пинясьны: цок-цок-цок. Мыйла торкин менсьым сёйӧмсӧ?

Асылыс лӧнь да мича. Пуяслӧн вижӧдӧм коръясыс надзӧникӧн гылалӧны кок улад, быттьӧ небыд джодж дӧра вывті мунан. Ӧшалӧны польдчӧм пув розъяс, шӧпкӧдӧны пищаля мортлы: «Ог ӧмӧй ми шогмӧй, абу ӧмӧй чӧскыдӧсь, мый нӧ он сувтлы да чӧсмасьышт». Гӧрдӧдӧмаӧсь нин и пелысь розъяс.

Воан шор дорӧ, кинад гумовтан сэтысь сӧдз васӧ. Юан. И выныд быдсӧн содас. Сэсся шыасян тэнӧ юкталысь дорӧ.

— Шорӧй, мусаӧй, кыдзи тэнӧ шуӧны? Нимыд мый?

— Ачым ог тӧд. Шу мыйӧнкӧ дай, олас.

Лунтырнад сьӧлаӧс либӧ тарӧс лыян. Локтан вӧр керкаад да шыд пуан. Сёян кык морт пыдди. Вердӧ тай, майбыранӧй, вӧрыд да сӧстӧм сынӧдыд.

— Ме кӧ эськӧ ог лысьт вӧрад узьны, йӧйма. Збыль висьтала.

— Вӧралысьыдлӧн керкаыс теремок кодь, шоныд. Водан мудз вывсьыд да мукӧд дырйи сэтшӧм чӧскыда узян. Кодар бок вылас водан, сы бок вылас и чеччан. Петалан кӧ войнас ывлаӧ, пуясыс пыр и шыасясны: «Тайӧ тэ, Семен Петрович? Бара со воӧмыд миянӧс видлыны. Важӧн нин виччысям. Видза олан сідзкӧ, Петрович».

— Кужан жӧ тэ висьтавныд, мойдын кодь ставыс.

Батьыс долыда нюмъёвтіс, видзӧдліс мешӧк пытшкас, став тшӧктӧмторсӧ-ӧ сэтчӧ пуктіс Вера туйӧ петігкежлӧ.

— А тэ шуан, абу пӧ праздник. Татшӧм праздникыд ми воклы медся дона.


Гижӧд: 
Жанр: 
Ӧшмӧс: 

lkejrlkelkrgner klrjnelknfrkl ekjnrjkenfrej

1