БОТЛАНДИЯСЯНЬ ЧОЛӦМ!


1. Тӧдмасьӧм.


— Коді нӧ тэ??? — Ӧльӧш повзьӧмысла весиг чеччыштіс крӧвать вылас, — коді тэ сэтшӧмыс, ме тэнсьыд юася!?

— Да мый нӧ тэ горзан, ланьт, ботюк ме.

— Коді???

— Бо-тюк, ботюк, — вочавидзис зонкалы кутшӧмкӧ нисьӧ ичӧтик морт, нисьӧ пемӧс, нисьӧ лэбач.

— Ог гӧгӧрво немтор! Узя ме али ола?? Мамӧ!!! Мааааам!!!!

— Да эн горзы, шуи тай нин, ставсӧ дзуган ӧд! Ме тэлаыд вои, ыстісны менӧ тэлаыд, Ӧльӧш. Ме чайті, виччысян тэ менӧ, а тэ этадзи со, — ботюк бергӧдчис зонка дорысь да заводитіс ичӧт кага моз лимзыны-бӧрдны.

Шӧйӧвошліс медводз Ӧльӧш, а сэсся и жаль сылы лоис тӧдтӧм гӧсьтыс, кӧсйис эськӧ мыйкӧ бурӧс ботюкыслы шуны, но эз тӧд, кутшӧм кывъяс бӧрйыны.

— Да эн бӧрд, — сӧмын и нюжӧдіс зонка. Повзи ме тэсьыд, абу мудер тэсьыд повзьынысӧ.

— Мыйла бара??? — ботюк пондіс бӧрдны нӧшта на гораджыка. Сэтшӧм омӧль ме али мый? Али мисьтӧм?

— Ноооо... Ог тӧд, гашкӧ и позьӧ мичаӧн шуны да, боксяньыс кӧ видзӧдлыны... али бӧрсяньыс... Да абу садьмӧм бӧрын...

— ААААА!!! — эз нин и бӧрд, а горзіс тӧдтӧм ботюк. Шуи жӧ ме Ботюшенцияыдлы, ог пӧ мун ме татшӧм лёк зонка дінас, мед пӧ мӧдӧс кодӧскӧ ыстас, да ӧд оз кывзы, мун и всё. Бурджык, нывка дінӧ кӧ ыстісны, нывкаясыд тадзисӧ оз равзыны.

— Но дерт. Оз бара равзыны да. Кыкнанныд эськӧ ӧні бӧрдінныд. — Ботюк чӧлаліс да чышкис синвасӧ. — Вай висьтав кӧть, коді тэ сэтшӧмыс, мый вӧчан тані.

— Да шуи жӧ! Ботюк ме, али паметьыд лёк тэнад? Сійӧн «2»-тӧ и тэчӧны?

— А тэ кытысь тӧдан, кыдзи ме велӧдча??? — шай-паймуніс зонка.

— Ме ӧд ботюк, ме ставсӧ тӧда. Дышъяс дінӧ менӧ и ыстылӧны.

— Немтор ог гӧгӧрво... Унаӧн классаным дышӧдчӧны, меысь на лёкджыка велӧдчӧны, но некутшӧм ботюкъяс йылысь эз на шулыны.

— Дерт, тіян районысь ми некод дінӧ на эг волӧй да, тэ — медводдза! — неуна тшапа гӧгӧрвоӧдіс ботюк.

— Мый нӧ ме вӧчи сэтшӧмсӧ, мый сёрнитысь пемӧсъяс пондісны ме дорам локны?

— Абу пемӧс ме, — бара скӧрмис ботюк, ачыд тэ пемӧс вылас зэвджык на находитан.

— Мыйӧн нӧ бара??

— Со тай юрсиыд кутшӧм кузь да шыльӧдтӧм!

— Шыльӧдчан тай, повзьӧдасны кӧ асывнас кутшӧмкӧ бутюкъяс.

— Ботюк ме, а некутшӧм абу бутюк, збыль тай тэныд паметьнад больничаӧ ветлыны колӧ. И эг прӧста сідз ме лок, ачыд менӧ корин.

— Но бара да, кыдзи нӧ кори??

— Рисование вылад тӧрыт менӧ серпасалін да.

— Тэээээнӧ? — пондіс мӧвпавны Ӧльӧш. Шуисны тай, мый кӧсъян, сійӧс и серпасав, вот и серпасалі ме, думайті, мый абусӧ.

— Ноко, видлам лок серпастӧ.

Ӧльӧш кыскис альбомсӧ да мӧдіс сюся видзӧдны аслас творенньӧ вылас. Морт кодь, киа-кока, кӧч кодь бӧжа, каньлӧн пельяса, юр вылас — колпак сяма шапка, нырыс — быттьӧ ыджыд лэбачлӧн. Дивӧ да и сӧмын. А ӧд ставыс сы вӧсна, мый скӧрмис тӧрыт зонка Антонина Витальевна вылӧ, аслас велӧдысь вылас, бара «2» пуктіс да, серпасаліс лэбач-пемӧс-мортӧс, лэдзис парсӧ да и вунӧдіс думыштӧмтор йывсьыс.

— Со тай, ме, — шуис ботюк.

— Тэ... — эз кут вензьыны сыкӧд Ӧльӧш.

— Но лок, мунам Ботландияад, виччысьӧны миянӧс.

— Да кытчӧ? Кутшӧм Бот... Меным школаӧ колӧ!

— Шойччан лун талууууун! — нюмъяліс ботюк.

— Мамӧлы отсавны колӧ, чойӧс видзны, баб дорӧ ветлыны, ёртӧ на гӧсти корис и...

Пока мӧвпаліс Ӧльӧш, мый нӧшта сӧрны, видзӧдӧ, а абу нин ас жыръяс сійӧ, а кутшӧмкӧ эрд вылын сулалӧ. Турун гӧгӧр, шонді ыпъялӧ... А дзоридзьяс абуӧсь. Думыштіс сӧмын детинка дзоридзьяс йывсьыд, кыдз ботюк, став вомнас нюмъялӧмӧн, босьтіс сійӧс киӧдыс:

— Лок, эн пов, тэныд тані кажитчас.


2. Ботландиялӧн история.


Видзӧдӧ Ӧльӧш гӧгӧр да оз гӧгӧрво, кытчӧ сюрис. Мультик сяма страна кутшӧмкӧ. Зэв ыджыд тшакъяс-керкаяс сулалӧны тані, двореч быдсӧн эм — Ботюшенция царицалӧн.

Петіс Ботюшенция Ӧльӧшлы паныд, чолӧмаліс сійӧс, слугаыскӧд, Ботяшкакӧд, тӧдмӧдіс. Шуис, мед пӧ оз пов тані Ӧльӧш, кадыс пӧ тан оз мун, бать-мамыс зонкалӧн оз и казявлыны, мый сійӧ абу гортын.

— Со, — петкӧдліс ыджыд эрд вылӧ Ботюшенция, — тайӧ миян муным, Ботландия. Важысянь олӧны тані ботюкъяс, пемӧс-лэбач-мортъяс. Прӧста йӧз, дыш челядьысь ӧтдор, некор оз вермыны сюрны тайӧ муас. А восьтылӧма тайӧс мусӧ уна-уна во сайын кутшӧмкӧ Ботилиан, свет вылас медся дыш мортыс. Абу вермӧма сійӧ йӧз ли пемӧсъяс костын овны, уджавны ӧд колӧ. Гуӧма сійӧ ӧти волшебниклысь чудӧ-тшак, пышйӧма вӧрӧ да кутӧма тшак пытшкас овны. Волшебнӧй вӧлӧма тшакыс: и сёяныс, и юаныс сы пытшкын пыр вӧлӧма. Кылӧмаӧсь Ботилианлӧн гажа олӧм йылысь вӧрса пемӧсъяс, лэбачьяс, да и йӧз. Вежныс петӧ, кӧсйӧны жӧ став дась вылас овны. Пондӧмаӧсь найӧ дӧзмӧдны Ботилианӧс, корӧмаӧсь, медым босьтас найӧс тшак пытшкас овны. Мудзӧма Ботилиан вензьыны накӧд да и корӧма ставнысӧ гортас пыравлыны, тшай кампетӧн юыштны. Локтӧмаӧсь гӧсьтъяс, радӧсь, пуксялӧмаӧсь пызан сайӧ, но абу прӧст морт вӧлӧма Ботилиан: чудӧ-тшак отсӧгӧн босьтӧма да и сорлалӧма гӧсьтъяссӧ ёрта-ёрт костаныс: со и артмӧмаӧсь лэбач-пемӧс-мортъясыд... Ковмис налы кольччыны вӧрад, оз жӧ мунны тадзи йӧз дінад, асьныс ӧд мыжаӧсь, уджысь кӧсйисны пышйыны да, ӧні медым и мынтысясны...

Абу тӧдӧмаӧсь лэбач-пемӧс-мортъясыд, кыдзи шуны ӧта-мӧдсӧ, а сэсся думыштӧмаӧсь кӧзяинныс ним кузя ботюкъясӧн шусьыны. Олісны коньӧр ботюкъяс пуяс улын, кынмисны, сёйны-юны аслыныс корсисны, а Ботилиан куйліс паччӧр вылын, сёйис да юис помтӧг, сэтчӧдз сёйис, мый коркӧ босьтіс дай потіс.

Кутісны сэки ботюкъяс Ботилианлӧн тшак пытшкас овны.

Малыштасны сӧмын ботюкъяс керка-тшакыслысь стенсӧ дай шуасны:

Тшакӧй, тшакӧй, кок йылад йӧктышт,

Мада тшакӧй, вӧч, кыдзи тшӧкта!

Тшакыс кывзысис найӧс, мый корӧны, ставсӧ вӧчис.

Бара удж йылысь вунӧдісны ботюкъяс, ставсӧ, мый налы коліс, тшакыс вермис сетны. Сэсся и эз кутны тӧрны ботюкъяс ӧти тшак пытшкад, чеглісны найӧ тшак-мамсӧ, да лоис налӧн уна керка. Волшебнӧй сямнысӧ тшакъяс эз воштыны, та вӧсна уджавны ботюкъяслы эз ковмыв. Сёян-юаныс пыр вӧлі, да и мӧд кӧсйӧмъяснысӧ керка-тшак пӧртіс олӧмӧ.


3. Ӧльӧш Ботюк–123-ӧд дорын гортас.


Вайӧдіс Ӧльӧшӧс тӧдса ботюкыс ас дінас. Сэні сӧмын тӧдмаліс зонка, мый торъя нимъяс ботюкъяслӧн абуӧсь, а шусьӧны найӧ лыдпасъяс кузя. Ботюкыс, коді Ӧльӧшӧс садьмӧдіс да Ботландияад вайӧдіс, вӧлі Ботюк–123-ӧд. Оліс Ботюк–123-ӧд вокъясыскӧд, дас сизим вок сылӧн вӧлі. Ёна и шума вӧлі тшак-керкаас, кор Ӧльӧш пырис сэтчӧ: чудӧ-ящик кутшӧмкӧ жыр шӧрас сулалӧ, а ботюкъясыд пуксялӧмаӧсь ящик дорас да чиктылӧны-сералӧны. Мыйкӧ торъя нин тешкодьӧс кӧ петкӧдлӧны, ботюкъяс гӧрдлӧны сідзи, мый весиг тшак-керкаыс зӧркӧдчӧ-дзӧрӧ. Ботюк–123-ӧд шуис, лунбыдъясӧн пӧ вокъясыс тадзисӧ пукалӧны. «Но а мый нӧ сэсся налы вӧчнысӧ? Уджавнысӧ ӧд оз ков», — любӧпырысь мӧвпыштіс зонка.

Ботюк–123-ӧс Ботюшенция царицаныс регыд бара корис дворечас, нӧшта ӧти дыш кагаӧс, кӧнкӧ, вайӧдны. Тшӧктіс Ботюк–123-ӧд Ӧльӧшлы корны тшакыслысь ставсӧ, мый думаыслы колӧ. Малышт пӧ сӧмын стенсӧ да меліа сьылышт:

Тшакӧй, тшакӧй, кок йылад йӧктышт,

Мада тшакӧй, вӧч, кыдзи тшӧкта!

Ок и ёна радліс зонка, кор тшак козьналіс сылы пызан тырыс мороженӧй, дас бутылка Кока-Кола да кызь пачка чипсы. Сёйыштіс зонка неуна, тыртыштіс кынӧмсӧ. Пукалӧ. Мый эськӧ нӧшта корны? Друг воис Ӧльӧшлы дум вылас, мый важысянь нин эськӧ черияс аквариумын кӧсйис. И со — сы водзын аквариум, стен джын ыдждаыс!

— О! Да тайӧ тшакыс зарни черисьыд на бурджык! Чериыд куим кӧсйӧм сӧмын олӧмӧ пӧртӧ. А тайӧ — миллион кӧсйӧм пӧртны вермас! — горӧдсис Ӧльӧшлӧн.

Пуксис зонка аквариум бокас, видзӧдӧ черияс вылас: и гӧрд со эм, и сьӧд, и визя, и уна рӧма... И ыджыдъяс, и ичӧтъяс эмӧсь. Страк босьтлывлӧ, кор ыджыдъяс вылад видзӧдан. Мӧдіс Ӧльӧш неуна повзьӧдыштны чериястӧ, вывті нин пӧ ньӧжйӧ чериясыс плавайтӧны — таркӧдыштіс аквариумас — йӧймалісны чериясыд, дикъяс моз плавайтны пондісны, ыджыдъясыс ичӧтъяссӧ сёйны кутісны.

— Мый нӧ тайӧ?! — оз нин кажитчы Ӧльӧшлы. — Ог кӧсйы татшӧм дик чериястӧ! Пингвинъяс кӧсъя!

Малыштіс зонка тшак — керкалысь стенсӧ, сьылыштіс:

Тшакӧй, тшакӧй, кок йылад йӧктышт,

Мада тшакӧй, вӧч, кыдзи тшӧкта!

Вайӧд меным татчӧ Антарктидаысь пингвинъясӧс!

Шуис сӧмын тайӧс Ӧльӧш — и со сы водзын кӧкъямыс зэв мусаник пингвинпи. Синнаныс лапйӧдлӧны, быттьӧ аканьяс, бордъяснаныс швачкӧдчӧны, ӧта-мӧд бӧрсяньыс котралӧны. Ёна и лӧсьыд детинкалы на бӧрся видзӧднысӧ! Дыркодь пингвинъясыд войлісны, а сэсся и ланьтісны. Кӧдзыд налы колӧ, вӧлӧмкӧ. Дыр-ӧ тшак пытшкад олыштан. Гашкӧ, и вермис эськӧ тшакыд Ботландиясьыд Антарктида вӧчны... Сӧмын мый эськӧ Ӧльӧшлы мӧд ботюкъясыд шуисны? Кӧсйӧны-ӧ найӧ Антарктидаас овны? Вермис эськӧ детинка сӧмын Ботюк–123-лысь керка пытшсӧ йизьӧдны, сӧмын дас сизим воксӧ чудӧ-ящикнаныс кытчӧ эськӧ нуӧдіс?

«Ог, ог на вермы йизьӧдны Ботландиятӧ, — мӧвпыштіс Ӧльӧш. Неважӧн на сӧмын вои да... Вот олышта тані дырджык, тӧдмася ставыскӧд, радейтны менӧ тан кутасны... Сэки и Антарктидатӧ татчӧ вуджӧдам! Став пингвинъяснас!» — думыштіс та йылысь зонка, да ёна и кокняммыштіс сьӧлӧм вылас.

А сэсся бара юрсӧ песны пондіс: «А кытчӧдз эз на кутны менӧ ботюкъясыд радейтны сідзи, медым сетны оланінныссӧ йизьӧдны, мый вӧчнысӧ кута???»

Пукаліс Ӧльӧш дыркодь, кывзіс, кыдзи дас сизим ботюкыс гӧрдлӧны, а сэсся и югыд мӧвп воис юрас: «Чудӧ-бук меным колӧ! Играясӧн ворсыштны кӧсъя!»

Корис тшакыдлысь чудӧ-буктӧ, муртса оз чеччав, пуксис ворсны. Футбол, дерт, бӧрйис играяс костсьыс, пыр футболистӧн кӧсйис лоны да. Включитіс игратӧ, чуньяссӧ лӧсьӧдіс пасъяссӧ сетавны. Сӧмын личкалӧ Ӧльӧш кнопкаяс вылас, а футболистъясыс играас ворсӧны, кыдзи асьныс кӧсйӧны. Кӧсйӧ зонка шульгаладортіыс нуӧдны нападающӧйсӧ — сійӧ веськыдладортіыс котӧртӧ. Немтор скӧрмӧм детинка вӧчны оз вермы. Регыд и колис сылӧн «Реалыс» «Барселоналы». Босьтіс Ӧльӧш дай шыбитіс чудӧ-буксӧ стенас. Пыр тадзи шыбласис зонка, кор скӧраліс, татшӧмӧн нин быдмылӧма.

Пукаліс Ӧльӧш, мӧвпаліс футбол йывсьыс... Радейтана футболистъясыс юрас воисны. А корны кӧ татчӧ Роналдуӧс? Воас-ӧ?

Малыштіс зонка тшак-керкалысь стенсӧ, сьылыштіс:

Тшакӧй, тшакӧй, кок йылад йӧктышт,

Мада тшакӧй, вӧч, кыдзи тшӧкта!

Кӧсъя, медым воас ме дорам гӧсти Криштиану Роналду!!!

Дыркодь мыйкӧ Криштиану оз лок, места оз аддзы Ӧльӧш, йирмӧг весиг босьтліс.

А сэсся и сувтіс сы водзӧ кумирыс: ыджыд тушаа, мича причёскаа, пемыд синъясыс югъялӧны. Видзӧдӧ сы вылӧ Ӧльӧш, вомыс пась, весиг оз тӧд, мый шуны. А Криштиану козьналіс зонкалы став мир пасьтала нималана нюмсӧ да шуис мыйкӧ... португальскӧй вылын. Видзӧдӧ нималана футболист зон вылӧ — немтор Ӧльӧш оз гӧгӧрво. Английскӧй вылын Роналду заводитліс сёрнитны. «Yes, yes» детинка и вермис сӧмын вочавидзны.

Мӧдіс футболист мачнас финтуйтыштны, корӧ зонмӧс котралыштны мачнас — Ӧльӧш и рад, важӧн нин футболнас эз ворс, сӧмын... кӧсйӧ зонка котӧртны, а оз вермы. Мунны — вермӧ, а котравны — некыдз. Кокъясыс сьӧктісны быттьӧ, мулань кыскӧны. Видзӧдӧ коньӧр детинка вылӧ Криштиану, оз тӧд, кыдзи отсавны. Казьтыштіс сэки Ӧльӧш ботюк-ёртыслысь коркӧ шулӧмасӧ: оз пӧ вермыны ботюкъясыд мудзтысьны. Сідзкӧ, и котравнысӧ тані некыдз он вермы. Сэтшӧм ӧбиднӧ сэки лои Ӧльӧшлы ... Бӧрддзис зонка, тшӧктіс тшакыдлы бӧр нуӧдны гортас кумирсӧ, а ачыс муніс Ботюк–123-лӧн керкаысь...


4. Ӧльӧш аддзысьӧ Ботенькакӧд.


Дыркодь нин Ӧльӧш ветлӧдліс Ботландия кузя... Няр, некодлы ковтӧм, код тӧдас кытчӧ сюрӧм, зонка жалитіс асьсӧ, кӧсйис гортӧ. Тшак-керкаяс ӧні чайтсисны сылы йӧзсӧ сёйысь гундыръясӧн.

И кыдзи Ӧльӧш воис татшӧм олӧмӧдзыс? Ставсьыс лёкджыка ӧмӧй оліс сійӧ? И кӧнӧсь мӧд районъясысь челядьыс?

Тайӧс мӧвпалігӧн зонка матыстчис нин Ботландиялӧн пом дінӧ. Со сы водзын — ота ю. Лӧзов, сӧстӧм... Но абу юлӧн мичӧдз зонкалы. Пуксис Ӧльӧш ю дорас да пондіс казьтывлыны мам йывсьыс, бать йывсьыс, ёртъяс йывсьыс, чужанін йывсьыс. И сэки сӧмын детинка гӧгӧрвоис, кутшӧм збыльвылас лёк мортӧн сійӧ вӧлі: тшӧкыда горзіс мамыс вылӧ, дзескӧдіс нывъясӧс, ичӧтъясӧс дӧзмӧдіс. Дерт, Ботландияын сылы и места... Мӧвпаліс та йылысь Ӧльӧш да курыд синва кисьтіс. Сідз бӧрдіс, мый весиг эз и казявлы, мый бокас кодкӧ пукалӧ. Тайӧ вӧлі ичӧтик ботюк, нывка. Нывка повзьӧмӧн видзӧдіс Ӧльӧш вылӧ. А детинка видзӧдіс нывка-ботюк вылӧ. Школаын, дерт, Ӧльӧш ёна и вильышӧн вӧлі, но кор нывкакӧд ӧтнас сюрліс, полыштіс жӧ.

Сэки нывка, быттьӧ найӧ Ӧльӧшкӧд важӧн нин тӧдсаӧсь, вашнитіс зонкалы:

— Эн пукав гӧль му вылас, змея курччыны вермас.

Ӧльӧш дзик пыр чеччис кок йылас. Зонка быдмис ылі войвылын, Коми муын, да та вӧсна ёна и поліс змеяяссьыд, кӧть, веськыда кӧ шуны, некор на накӧд эз паныдасьлы.

Зонка сулаліс сэтшӧм повзьӧм чужӧмӧн, мый ботюк весиг серӧктіс.

— Эн пов, ӧні оз нин курччы, — нюмъёвтіс ботюк-нывка. — Коді нӧ тэ? Кыдзи тэнӧ шуӧны?

— Ме Ӧльӧш, менӧ талун татчӧ вайӧдісны, ог тӧд, мыйысь... — зонка кӧсйис петкӧдчыны нывка водзын бурджыкӧн сыысь, кутшӧмӧн сійӧ збыльвылас вӧлі.

— Збыль ӧмӧй нин он и тӧд? — шмонитыштіс нывка.

— Ну... гашкӧ, школаын неуна дышӧдчышті да...

— Ну... сӧмын та вӧсна эськӧ тэнӧ татчӧ эз вайӧдны, — бара нюмъёвтіс ботюк.

Детинкалы лои яндзим.

— Менӧ Ботенька шуӧны, ме неылын ола, ю дінас, — нывка нюжӧдіс Ӧльӧшлы кисӧ.

— Кыдзи тэ верман тані овны? Тан ӧд немтор вӧчнысӧ оз позь: ни котравны, ни чеччавны, ни велӧдчыны! — збоймыштіс детинка.

— Сідз, дерт. Но ме ыджыд гусятор тэн шуа: Ботландияын эм места, кытчӧдз тшакъяслӧн власьтыс оз судз — тайӧ Ботюшенция царицалӧн замокыс. Ме тшӧкыда ветлывла сэтчӧ, небӧгъяс лыддя. Школаяс миян абуӧсь, но ме зэв ёна велӧдчыны кӧсъя. И Ботюшенция окотапырысь небӧгъяссӧ меным сетлывлӧ, шань сійӧ... Сӧмын оз вермы сійӧ чудӧ-тшакъястӧ бырӧдны, оз вермыны натӧг дыш ботюкъясыд овнысӧ. Оз радейтны найӧ уджавнытӧ...

— Сьӧкыд тэныд овнысӧ, кӧнкӧ, — кӧсйис мыйӧнкӧ отсавны ботюклы Ӧльӧш.

— Ме велалі нин, — муртса кылана вочавидзис ботюк. — Тӧдан, тайӧ ӧд Ботюшенция кужис аддзыны сэтшӧм ковтӧм странасьыс пӧльза. Тшак отсӧгӧн царица корсялӧ дыш нывкаясӧс да зонкаясӧс, вайӧдӧ найӧс Ботландияӧ, петкӧдлӧ, кыдзи олӧны дыш ботюкъяс, кутшӧмъясӧн вӧчӧны найӧс чудӧ-тшакъясыс... Найӧ... аканьяс кодьӧсь, сьӧлӧмтӧмӧсь, гӧгӧрвоан?

— Но ӧд абу ставыс! — ловзьыштіс зонка.

— Абу, дерт, мукӧдыс Ботюшенциялы отсасьӧны челядьӧс бур туй вылӧ петкӧдны, но унджыкыс сӧмын сёйӧны да юӧны, оз нин и тӧдны, мый тшакыдлысь корны, да сэтшӧмӧс сӧмын, медым ки-кокнысӧ абу мудзтыны.

— А челядьыс, кодъясӧс найӧ вайӧдӧны...

Эз удит зонка помавны юалӧмсӧ, кыдзи Ботенька вочавидзис нин:

— Найӧ ботюкъяслӧн керкаясаныс олӧны, кыдзи и тэ, но дыр кежлӧ оз кольччывлыны, регыд и гажтӧмтчӧны бать-мамтӧгныс, гӧгӧрвоӧны, кутшӧмӧсь лоасны, пыр кӧ дышӧдчыны пондасны... Тэ со Ботюк–123-ыд дорын недыр жӧ олін.

— Ой, тешкодь сійӧ, — нюммуніс Ӧльӧш. Сӧмын муніс сійӧ дзик пыр, вайӧдіс менӧ да... А вокъясыскӧд меным немтор вӧчнысӧ...

— 123-ыд — бур ботюк, коркӧ мортӧн кӧсйыліс лоны, а ӧні дугдіс та йылысь сёрнитнысӧ...

— Мыйла нӧ?

— Ботюкъястӧ он нин веж, он вермы сӧглас босьттӧг керкаяснысӧ налысь жуглыны, медым чудӧ-тшакыд вынсӧ воштас. А тэ нӧ мыйла бӧрдін ю бокас, Ӧльӧш, — вӧлись казьтыштіс та йылысь Ботенька. Гортӧ кӧсъян?

— Кӧсъя, дерт... Но кыдзи нӧ меным бӧр гортӧ сюрнысӧ?

— А тшакыд мый вылӧ? — серӧктіс Ботенька. — Сӧмын помнит: бара дышӧдчыны кутан — виччысь Ботландиясянь чолӧм!

«Йӧй ме али мый, мед бара татчӧ сюрны», — мӧвпыштіс зонка.


5. Ӧльӧш бӧр локтӧ гортас.


Сьылыштіс Ӧльӧш тшакыслы тешкодь сьыланкывсӧ, малыштіс стенсӧ, синсӧ кунис, виччысьыштіс... и со сійӧ гортас нин, аслас жыръяс. Сэтшӧм рад вӧлі Ӧльӧш, дась вӧлі быд сантиметрсӧ жырйыслысь окавны. Кровать вылас чеччалыштіс весиг радысла, а сэсся и бать-мамыс ордӧ котӧртіс:

— Маааам! Баааать! Кутшӧм бур, мый ті гортынӧсь на! Сэтшӧм луныс талун лӧсьыд! Сідз ӧд, мам, — мамыслы бӧжас кутчысиг, шуаліс детинка.

— Алёша, пиӧ, мый нӧ тэкӧд? Висьмин али мый? — повзис мамыс. Батьыс кыв шутӧг сулаліс, ёна жӧ чуймӧма.

— Эг, эг висьмы, ёна гажтӧмтчи сӧмын... войбыднас...

Шойччан лунас Ӧльӧш отсасис бать-мамыслы: ва новліс, пес пыртліс, пач ломтіс, весиг тасьті-пань мыськаліс, мый водз некор эз вӧчлы.

— Да сійӧс быттьӧ вежӧмаӧсь! — шензис батьыс.

— Лешукӧй менам пыр татшӧм вӧлі, — нюмъяліс мамыс.

— Лов пытшкас, гашкӧ, и вӧлі да, — сераліс батьыс.

И школаын Ӧльӧшлӧн ставыс бур лои. Кыдзи жӧ дышлуныс, вӧлӧмкӧ, сорӧ мортыдлы! А сытӧг — и дневникын «5»-яс, и ёртъясыд пыдди пуктӧны.


6. Ӧльӧш бара кӧсйӧ сюрны Ботландияӧ.


Воысь унджык нин коли, Ӧльӧш быттьӧкӧ и вунӧдіс нин Ботландияад ветлӧм йывсьыс, некодлы зонка татшӧм дивӧ йывсьыс эз висьтав: йӧйӧн эськӧ ёртъясыс шуисны. Со и видзис зонка ставсӧ ас пытшкас.

Классьыс детинкаясыс нин нывъяскӧд гуляйтісны, радейтчӧм йылысь сӧмын и мӧвпалісны. А Ӧльӧш небӧгъясӧн пукаліс, водзӧ вылӧ гортса уджсӧ вӧчис, медым рытсӧ кыдзкӧ коллявны. Некод Ӧльӧшлы эз кажитчы нывкаяс костсьыс.

Сӧмын ӧтчыд рытын, нинӧм вӧлі вӧчнысӧ да, зонка пуксис пызан сайӧ, восьтіс альбом да пондіс серпасасьны. Серпасаліс, мый аддзис, мый кӧсйис аддзыны: керкасӧ, тӧвся вӧр-ва, лымчиръяс, пемӧсъяс, лэбачьяс, ботюкъясӧс... Видзӧдліс Ӧльӧш серпасъяс вылас да шай-паймуні... Ботенька йылысь казьтыштіс. «Кыдзи нӧ эськӧ олӧ ӧні сійӧ? Пыр на ю дорӧ ветлывлӧ мӧвпавны?» — думыштіс Ӧльӧш. А сэсся и медбӧр кывъясыс Ботенькалӧн юрас воисны: «Бара дышӧдчыны кутан — виччысь Ботландиясянь чолӧм!»

Ловзис весиг детинка мӧвпалігас, кыдзи эськӧ бӧр Ботландияас сюрӧдчыны. Быд рыт Ботенькаӧс серпасаліс альбомас, гашкӧ, петкӧдлас ботюклы чудӧ-тшакыс зонкалысь серпассӧ. Гашкӧ, воас бара сыла Ботюк–123-ыс. А мед эськӧ воис! Ӧльӧш и велӧдчынысӧ чӧвтіс, и гортсаясыскӧд пыр пинясис, эз кӧсйы отсасьны — немтор эз отсав Ботландияад сюрӧдчыны. Ӧльӧш лёка узьліс, паляліс быд шыысь — чайтіс, ботюк сыла воӧма... А кор восьтыліс синсӧ да аддзис, мый ӧтнас сійӧ жыръяс, мый оз кӧсйыны аддзыны сійӧс Ботландияад, а гашкӧ, и ачыс Ботенька оз кӧсйы аддзыны, ньӧжйӧ бӧрдіс эшкын улас, медым гортсаясыс эз кывны, ас улас шуаліс: «Но лок, ботюк! Сьӧкыд али мый тэныд? Лок... Лок... Уна али мый кора? Ме ог повзьы... ог повзьы... ботюк, волы... нуӧд... нуӧд...»

Но бара некод эз лок. Ӧльӧш и школаад эз кут ветлыны, куйліс крӧвать вылас да некодлы эз шу, мый йылысь мӧвпалӧ, мый лоис сыкӧд. И эз узьлы нин войяснас, муртса ловъя моз куйліс. А гашкӧ, эз и вӧвлы некор некутшӧм Ботландия? Гашкӧ, ставсӧ сійӧс Ӧльӧш вӧтасис? Гашкӧ, и Ботенькаыс некор эз вӧвлы свет вылас? Мӧвпаліс та йылысь Ӧльӧш да эз и казявлы, кыдзи бокас кодкӧ пуксис.

— Ботюк!!! Тэ воин!!! Кутшӧм ёна ме тэнӧ виччыси! — пондіс шамрасьны зонка. Сывйыштіс Ботюк–123-ӧс да весиг лолыштнысӧ коньӧрлы эз сет.

— Да лэдз нин, лэдз! — горзіс Ботюк–123-ӧд. Сійӧ вӧлі скӧр, пӧрысьмыштӧма весиг. Мыйла корин? Мый тэныд Ботландияас колӧ?

— Отсавны кӧсъя тэныд... тіянлы, — заводитіс зонка.

— Кыдзи отсавны??? Мый йылысь тэ сёрнитан? — эз кывзы ботюк.

— Тшакъястӧ жуглыны, торйӧдны йӧзсӧ, пемӧсъяссӧ да лэбачьяссӧ...

— Мичаа эськӧ сёрнитан да, — ботюк бара эз сет зонкалы помавны мӧвпсӧ. Оз артмы тэнад нинӧм! Ичӧт на тэ, да и он гӧгӧрво немтор! Пукав гортад!

— Но мыйла нӧ воин сідзкӧ татчӧ? — скӧрмис жӧ зонка.

— Ботюшенция ыстіс, сёрнитлыны тэкӧд кӧсйӧ, — лӧгпырысь вочавидзис сылы Ботюк–123-ӧд.

Тадзи Ӧльӧш мӧдӧдысь сюрис Ботландияӧ. А мый лои водзӧ — тайӧ нин дзик мӧд висьт...


Гижӧд
Ботландиясянь чолӧм!
Жанр: 
Гижан кад: 

Аудио:

lkejrlkelkrgner klrjnelknfrkl ekjnrjkenfrej

1