АДДЗЫСЬЛӦМ
Лена виччысис мужикыскӧд автобус. Автобусыс дыр эз лок, да нывбаба вешйыштіс дзӧръялыштны орчча ларёкъяс дорӧ. Вась кольччис. Лена шливкнитіс синнас тӧваръяс кузя. Нинӧм торъя бурсӧ эз аддзы да мӧдӧдчис бӧр.
Друг водзвылас быйкнитіс мужик. Кисӧ паськӧдӧма. Жеръялӧ паськыд вомнас. Ӧтка-ӧтка пинь чурвидзӧ: кодкӧ аслас, кодкӧ кӧрт. Нывбаба вешйыштіс ӧтарӧ, мӧдарӧ, но мужик бара потшис туйсӧ. Кӧсйис нин горӧдны Васьлы, но мужик шыасис: «Эн ӧмӧй тӧд, Лена?!» Нывбаба сюся видзӧдліс сы вылӧ.
Читкыр синъясыс быттьӧ тӧдсаӧсь. Чукрасьӧм дӧрӧм-гачыс важӧн нин абу исыштлӧма васӧ, а тшӧтьӧсь чужӧмыс — коса йыв. Вылыс льӧбйыс вӧйӧма киссьӧм пиньяс весьтас. Чужӧмыс нёптовтчӧма. Син гуранъяс улын — нопъяс. Чуньяс — лӧз «чунькытшъясаӧсь». Видзӧднысӧ ар нелямын.
«Эн тӧд? — бара юаліс мужичӧй.— Ме жӧ Сергей». Нюмыс вошліс, сэсся лои мыжа мортлӧн кодь. Быттьӧ ылӧдӧмаӧсь. Леналы тӧд вылас уси пелькиник вӧраса, быд кывйысь пель йылӧдзыс гӧрдӧдысь зонка: «Сергей?! Тэ ӧмӧй?» Эз эскыссьы Леналы. Ёна нин торъяліс сійӧ зонсьыс тайӧ мужикыс. «Но, тӧдін жӧ сэсся», — личаліс серамӧн мӧдыс.
Во дас сайын, велӧдчигас на юкис Лена ӧти жыр кык нывкӧд. Сергей на дорӧ тшӧкыда пыравліс. Эз торъя код вылӧ кӧ видзӧдась, а сідз, кад коллявны. Пуксьывліс пельӧсӧ, триньӧдчис гитараӧн. Коркӧ и дозйӧн воліс, но ачыс уна эз юлы.
Нывъяс велалісны сы дорӧ, лыддисны ас мортӧн. Дерт, юалісны кӧ, кытысь зонмыс, вочавидзны нывъяс эськӧ эз вермыны. Кор да кыдз тӧдмасисны, кор медводдзаысь пуксис комната пельӧсӧ гитараӧн, эз нин помнитны. Волывлӧ и волывлӧ. Оз матькы, кок улын оз гартлась, некод дорӧ оз пысась. Да и лавкаӧ эм кодӧс ыстывны, кор аслыд дыш пасьтасьны. Висьтавліс: уджалӧ кӧнкӧ, олӧ висьысь мамкӧд, гӧтрасьны-котырасьны том на. А мый сэсся нывъяслы колӧ тӧдны том морт йылысь?
Ӧтчыд сӧмын асьсӧ тешкодя петкӧдліс. Дыр сы бӧрын нывъяс серавлісны-казьтывлісны. Пырис коркӧ Сергей на дорӧ. Гажа неуна. Вайис магнетофон да кык гӧрд доз. Дозъяс — пызан вылӧ, маг — ӧшинь вылӧ: «Гуляйтам, нывъяс. Талун менам праздник». Горасьыс гораа включитіс магсӧ, тумбочкаысь лэптіс стӧканъяс, абутӧм буссӧ на пытшкысь пӧльыштіс, кисьталіс. А нывъяс книга-тетрадьӧ сатшкысьӧмаӧсь. Экзамен матыстчӧ. Лена чеччис, чинтіс эралысь агрегатсӧ. Сергей бӧр горзьӧдіс. Лена бара чинтіс. Зон дузмуніс: «Музыкаыс оз кажитчы?!» Нывъяс весиг ыкӧстны эз удитны: шургис-шыбитіс магсӧ ӧшинь сайӧ. Недыр пукалыштіс чӧв. Жаль, буракӧ, лоӧма. Лэччывліс да катӧдіс бӧр. Дыр зунясис-вӧчис. Видліс: уджалӧ, кӧть корпусыс пасьмунӧма. Босьтіс киняулас и муніс. Кольӧм винасӧ юисны экзамен бӧрын. Сергейтӧг. Сійӧ сэсся эз нин волы. Лӧгасис, а гашкӧ, и яндзим лои.
Лена сулаліс. Эз тӧд, мый йылысь сёрнитнысӧ. И Сергей чӧв оліс. Лена шыасис водзджык: «Но, кыдз олан?» Аслыс эз лӧсьыд ло, быттьӧ ковтӧмтор шуис. Сергей шешмуніс пиньтӧм вомнас: «Ачыд аддзан: ставсьыс бура». — «Гӧтыра?» — «Том на, мам оз лэдз,— бара шешмуніс мӧдыс да кутшӧмкӧ гуся лачаӧн юаліс.— А тэ? Верӧс сайын?» — «Да. То мужикӧй сулалӧ». — «Эсійӧ?» — синбӧжаліс Сергей. «Да». — «Челядь, кӧнкӧ, эм?» — «Пи. Нёль арӧса». Сергей серӧктыштіс: «Абу бара менӧ виччысьӧмыд...». — «Мый нӧ сэки нинӧм эн шу? Пышйин», — нюмъёвтіс Лена бокӧ видзӧдӧмӧн. Чӧв усины бара.
Котӧрӧн матыстчис Вась: «Он ӧмӧй аддзы?! Автобусыс регыд вӧрзяс...» Босьтіс ки пӧлӧдыс, гогнитіс Сергейлань юрнас: «А талы мый колӧ?» — «Тайӧ...» — «Но мунам. Некор», — орӧдіс Вась да кыскыштіс гӧтырсӧ. Лена довкнитыштіс Сергейлы да вӧтчис Вась бӧрся. Тӧвру Сергейӧдз шыбитіс Васьлысь кывъяссӧ: «Мый нӧ, бичыс доз вылӧ корис али мый?»
Автобус ӧшиньӧд мыччысьліс ещӧ ӧтчыд Леналӧн мыгӧрыс. Сійӧс сайӧдіс мужикыслӧн руд курткаыс. Сергей карскӧбтіс, кракольӧн сьӧлыштіс кок улас да сӧдзӧдіс: «Быччара...»
Орччӧн мунысь дядьӧ бергӧдчывліс сылань зумыша. Гӧгӧрвоис: эз сылы шуны, да муніс аслас туйӧд.
