КОВБОЙ

Васька Стибловлӧн локтӧм йылысь сиктын кывлісны воӧмӧн тшӧтш. Челядь-гавезлы Ыджыд лун кодь сылӧн воӧмыс.

— Кывлін, Ковбой пӧ локтӧма?

— Збыль?

— Ылӧдчыны, буракӧ, ог кут.

— Ковмас талун клубӧ ветлыны: мый нин Питирас олӧны?

— Бара на мыйкӧ висьталас.

Школаӧ пыригӧн Васька шулӧма: «Куим лун школаас ветла да моракӧ муна». Куим лун нюжаліс сизим воӧдз. Нёльӧд классын куим во пукалӧм бӧрын Васька муніс школаысь. Мамыслӧн мотик кӧсйысьӧм ни батьыслӧн паськыд тасмаыс эз вермыны песовтны детинаӧс. Вежон дзебсясис Пастук Веня дорын, сэсся мам-батьыс корсисны да небзьӧдчисны. Во гӧгӧр вӧзйисны Васькаӧс совхозӧ уджавны, но начальство пыксис. Васькалы, ӧти-кӧ, дас квайтыс эз на тыр, а мӧд-кӧ, оран голяя, сартас кодь ки-кока, сійӧ ӧдвакӧ шогмис кутшӧмкӧ сьӧкыд удж вылӧ.

Ещӧ на эськӧ мытарствуйтіс Васька, эз кӧ босьт сійӧс отсасьны Пастук Веня. Тӧлысь мысти медводдза удждон вылас ньӧбис паськыд доръяса шляпа, кутшӧмӧс тай индеечьяс йылысь кинояс вылад новлӧны еджыд йӧзыс. Быд рыт тшапа лэптӧм ныра рӧдтывліс Васька сикт кузя аслас Земляника вӧв вылын конюшнялань. Тыртӧм ноп моз бутъяліс ӧтарӧ-мӧдарӧ. Шляпаыс кымыныськӧ и лэччывліс тшӧкаӧдзыс. Но аслыс Васька кажитчис зэв нин пелькӧн да вынйӧраӧн. Теш туйӧ сетӧм Ковбой нимсӧ примитіс да тӧдтӧм йӧзкӧд паныдасигӧн чургӧдліс кос йӧн кодь кисӧ: «Ковбой».

Олӧмыс крута вежсис дас сизим арӧсын. Гожӧмнас локтісны стройотрядӧн Питерса студентъяс. А кӧн студентъяс, сэн и студенткаяс, гитара да гаж. Овмӧдісны дась нянь сёйысьясӧс эновтӧм Малань керка пӧлӧ. Казяліс пампасъясын ёсьтӧм видзӧдласнас Васька на пиысь веж юрсиа нылӧс. Сьӧлӧмыс вӧрзис.

Тӧлысь джын бротьяліс Ковбой аслас мерлина вылын студентъяслӧн ӧшинь увті. Терпенньӧыс быри. Зэвтіс сэсся ӧти гажа рытӧ чинӧм, но дӧмастӧм школьнӧй гач. Пасьталіс батьыслысь гӧрд дӧрӧм. Ыджыдджык эськӧ: воротниксьыс голяыс чурвидзӧ сийӧсын додь вож моз, но видзӧдчан водзын бергӧдчис да ёна нин мичаӧн аслыс кажитчис. Шогмана. Оз нин нылыд сэсся бокӧ видзӧдлы. Не на бара киссьӧм пидзӧса джынсыа роталь-студентъясыд. Мыськис кисӧ Васька, весиг пеляс кӧтӧдӧм чуньнас гудйысьыштіс. Балябӧж вылас шляпасӧ ӧшӧдыштіс да муніс веж юрсиа нывлысь юрсӧ кольмӧдны, сьӧлӧмсӧ косьтыны.

Локтіс. Виччысьыштіс кильчӧ вылын, оз-ӧ пет нылыс, оз-ӧ кыв том зонлысь сьӧлӧм тіпкӧмсӧ? Весьшӧрӧ. Керкаын бриньӧдчисны гитараӧн, вензисны, сералісны. Петысь ни пырысь некод эз ло. Ковмис Васькалы аслыс пырны. Ныв-зон пукалісны крӧватьяс вылын. Джоджын, вольсыштӧм газет вылын сулаліс водка доз, жервидзисны кансер банкаяс да сідз-тадз туплясисны шӧралӧм-чеплялӧм нянь кӧрышъяс. «О-о! Абориген локтіс!» Мый сэтшӧмыс аборигеныс, Васька эз тӧд, но сьӧрсьыс вайӧм сулеясӧ питшӧгсьыс перйис да пуксис веж юрсиа нывлы воча.

Мый водзӧсӧ вӧлӧма, сиктсаяс тӧдмалісны Васькасянь нин. Стӧкан джын бӧрын Васька корӧма нылӧс ывлаӧ да дыр жуйявтӧг воссьӧма. Ныв, дерт, абу петитчӧма: кор на ещӧ татшӧм прамӧй мортыс сюрас,— кӧсйысьӧма петны Васька сайӧ, сійӧ кӧ пемыд сиктсӧ вежас Питерса югыд олӧм вылӧ. Сідз али мӧд ног сёрниыс вӧлі, но Ковбой совхозысь вежон мысти уволитчис да муніс студентъяскӧд. Сэксянь Ковбой волывліс гортас сӧмын гожӧмъяснас. Воан луннас жӧ довгывліс клубӧ, пуксьывліс кильчӧ перилӧ вылӧ да куритчис. Виччысис.

Дыр виччысьны эз ковмывлы. Том йӧз да челядь йылӧм гӧгӧртлісны. Киасьлісны Ковбойкӧд. Кодкӧ, дерт, и шыӧдчысь сюрліс: «Но, мый нин олӧмыс Питирас?» И Ковбой заводитліс помасьлытӧм висьтъяс. Воддза волігъясас нин сиктса пемыд йӧз тӧдмалісны, мый Ковбой гӧтрасьӧма Ленинградса студенткаыскӧд. Тесьтыс отсалӧма пырны университетӧ, козьналӧма том зятьыслы дача да «Вольва». Мый олӧны Ковбой гозъя аминь бура, кургӧны лун-лун, Наталья Ивановна пӧ (бур гӧтырыс) асывъяснас пӧсь кофе вольпасьӧдзыс вайӧ-тотшсьӧдӧ.

Кодкӧ паметя йӧз пиысь, эськӧ, шуліс жӧ: веж юрсиа нывсӧ пӧ эз ӧмӧй Катяӧн шуны? Но Ковбой сы вылӧ сэтшӧма бугжыльтчывліс: «От, вля, неужели менам гӧтырлысь нимсӧ тэ бурджыка тӧдан?» Ковмис бур паметялы лӧньны, нурбыльтліс сӧмын: «Гашкӧ, и Наташа вӧлі да...» «Но, вот и чӧв ов, эн сюйсьы, он кӧ тӧд».

И талун локтіс Ковбой клубӧ. Еджыд дӧрӧма, сьӧд регата, одеколонас, тыдалӧ, суныштлӧма. Клубсьыс дуксӧ вежонӧн он вӧтлы, кӧть ӧшинь-ӧдзӧс ставнас восьты. Дерт, пыралас кӧ татшӧм важиник клубад. Пукаліс, куритчис, виччысис. Локтісны, киасисны Ковбойкӧд: «Но мый? Кыдз олан? Мый вӧчлан? Мый нин Питирас керсьӧ?» Ковбой перйис «Мальборо» пачка. Тэрмасьтӧг пестысис, чӧсмасьӧмӧн кыскис тшынсӧ, нырӧдыс лэдзис вӧсньыдик руӧн. Дышпырысь видзӧдліс юалысьяс вылӧ. Шпыньмуніс: «Питерыд? Питерыд сулалӧ. Смольнӧй сулалӧ и. Быд асыв ӧшиньӧд видзӧдла: местаас абу? А мый мор сыкӧд и лоас? Да кӧть и пӧрӧ, выльысь лэптасны». Коставліс Ковбой, путнитіс чигарканас да содтіс: «Пока ме ловъя». «А тэ нӧ стрӧитель али мый?» — юаліс кутшӧмкӧ няйт чужӧма кӧмтӧм кока детинка. «Хха! Но тэ и лӧсыштін! Ме — стрӧитель!?» Ковбой довкйӧдлыштіс юрнас: но и но пӧ, эмӧсь жӧ татшӧм пес поткӧдлан черъясыс. «Хха! Ме кодь стрӧительыд этша. Став Питерыс менам то кӧні!» — Ковбой шамыртіс лежнӧг йыв ыджда кабырсӧ, матыстіс детиналы ныр улас. Детина саймовтчис йӧз мыш сайӧ.

Да-а. Код нӧ думыштны вермис, мый Ковбой коркӧ та ыджда мортӧдз волас? Помалӧма университетсӧ. Ӧні кыз деньга ки пырыс сысъялӧ-лэдзӧ. Питерсӧ ставнас кутӧ. Телохранительяс, бабаяс... Ментъяс радӧсь отсавны, да оз на быдӧнӧс сибӧд. Дзик нин пӧ, эськӧ, дышӧдӧма да. Кӧть и ньӧбас эськӧ кык судтаа дача сяма керка ас сиктас да овмӧдчас татчӧ. Но ӧд бара жӧ, став ладыс дзугсяс Питерас. Да и оз лэдзны муннысӧ. Аддзасны быдлаысь. Компаньонъясыслӧн киыс кузь.

«Да, Ковбой, сьӧкыд олӧмыд,— шпыньмуніс орччӧн сулалысь Опонь Коля.— Кыдз сӧмын татшӧм олӧмтӧ гӧтырыд терпитӧ». — «Менӧ? Кыдз ме сійӧс та дырасӧ терпита, шу». — «Мый нӧ, оз кывзысь? Али кофетӧ вольпасяд оз нин вай?» Ковбой эз казяв Колялысь шпыннялӧмсӧ: «Дзикӧдз этшсӧ воштӧма. Коркӧ гортӧ локті да, этатшӧм абача сэні». Ковбой довкнитіс юрнас Опонь Колялань. «Но, ме скӧрми сэки. Ак, меся, скӧтина, ме тэнӧ велӧда дорын узьлыны. А абачаыс ме вылӧ вувтіс. Но ме сійӧс и жбоньӧді. Вля! Мый ки улӧ сюрис, сійӧн и лӧсйи. Ӧшиньӧд шыбиті. Жаль, мӧд судтасянь». —

«А сэсся мый вӧлі?» — тэрмӧдлӧ кодкӧ челядь пиысь. «Мый... мый... Локтісны аскинас куимӧн. Пистолетаӧсь... Ок и лыйсьыштім. Ставсӧ тотшкӧді. Но менсьым шкапъясӧс, и пылесосӧс, и холодильникӧс рузьӧдлісны. Ставсӧ ковмис выльысь ньӧбны». — «А гӧтыртӧ мый вӧчин таысь?» — «Галинаӧс сітанас чужъялі, нахрен мен сэтшӧм гӧтырыс. Ме сайӧ быдӧн мунас, шутьӧкт сӧмын. Тӧдӧны ӧд, коді ме». — «А коді нӧ сійӧ Галинаыс?» — «Но, он, дерт, тӧд: студенткаыс тай тані вӧлі, гӧтырӧй». — «Эз али мый Наташа вӧв?» — «Ачыд тэ Наташа. Сэсся аслам гӧтырлысь нимсӧ, дерт, ог тӧд»,— дӧзмис Ковбой. Чӧв олыштіс. Печиктіс гожся рӧмыдас чигаркасӧ: «Но, ладнӧ. Мунны колӧ. Куим вой узьтӧм».

Ковбой вошис битӧм керкаяс сайӧ. Клуб игнасис. Йӧз вочасӧн разӧдчисны. Кильчӧ вылӧ колис морт куим-ӧ-нёль. «Да-а,— ышловзис кодкӧ челядь пӧвстысь.— Олӧны йӧзыс. Став Питирсӧ киад кутны...» Опонь Коля чеччыштіс кильчӧ перилӧ вылысь, шпыньмуніс, лэдзис детиналысь бейсболкасӧ нырӧдзыс: «Йӧй на тэ, Ваньчик. Ковбойыс Питерсӧ весиг телевизор пыр на эз аддзывлы. Мун гортад, ковбой, коктӧ мыськы, ывлаась да вод узьны». — «А кытысь нӧ ставсӧ тӧдӧ: Смольнӧйяссӧ?» — «Смольнӧйтӧ и ме тӧда. Лесозаводын олӧ, важ керка пӧлын. Гӧтыр пыддиыс Пушка каньӧс видзӧ».

Опонь Коль чеччыштіс пос помӧ, гораа сульсис кильчӧ бокӧ да мӧдӧдчис гортланьыс.