ПӦДРУГА


Володь локтіс карӧ шойччыны.

Сійӧ тай нэмыс сідз: кодлы мый оз тырмы. Карса сиктӧ мунӧ, сиктсаӧс карӧ кыскӧ. Ӧтилы колӧ чӧв-лӧнь да пожӧм сир дук, мӧдлы — зык-шум да паськыд гаж, да мед некутшӧм тӧдса аскинас эз шу: «Вот тай, яндысьтӧм син, бара тӧрыт потшӧсысь вит прасла кисьтӧмыд да стынӧс юрнад пӧрӧдӧмыд. Абу али мый яндзим?»

Яндзим. Кыдз нӧ абу яндзим? Кӧть му пырыс мунан, лэдзас кӧ муыс. Сійӧн Володь и локтіс. Босьтіс дыр нин чӧжӧм да гӧтырысь дзеблалӧм сьӧмсӧ, пуксис пӧпутка вылӧ, и карын нин тшолкӧдӧ ки вомлӧс сода каблукъяснас жуялӧм асфальт кузя. Выль тюпеняс тӧлысь водз каблукъяс содтіс. Пельпом и рожа, эськӧ, шогмӧ, кӧть ӧні телевизорӧ, но тушанас гырысьджык чой-вок удзӧдӧмаӧсь, абу удайтчӧма. Весиг вокыс, двӧйни пӧв сылӧн, ыджыдджык кык сантиметрӧн. Армияӧ ветліс и быдсӧн, а Володьӧс эз босьтны: быдмышт пӧ, да кӧть десантӧ босьтам. Но и забеднӧ вӧлі сэки. Локтіс гортас, батьыс юасьӧ: «Но мый, босьтӧны?» Володь муртса кӧм пӧвнас эз лый сылы (самӧй пӧрччысьӧ вӧлі): «Босьтасны кытчӧкӧ: количество йывсьыс думайтӧмыд, а качествосӧ вунӧдӧмыд да!» Сэксянь и кутісны шуны сійӧс первой кол-во Володьӧн, сэсся Колволодьӧн.

Да. А карад нывъясыд, ачыд тӧдан, бур вердаса вӧв мам кодьӧсь, дзоля вылад оз и видзӧдлыны. Чиганитчӧны. Но мед. Зато Володь кӧ кӧтны босьтчас, йӧзыс чуралӧны, оз бара Петросян ков.

Оліс карын Володьлӧн друг, Иван. Кыз зырымсянь ӧтлаын быдмывлісны. Ӧти парта перӧчиннӧй пуртӧн вӧлавлісны. Ӧтлаын школа сад йӧрын доз юлісны, мед выпускнӧй вылын эз жугыль босьт. Ӧткодь лӧзъяс налы орчча сиктъясын ныласигӧн тэчлісны. Сэсся олӧмыс разӧдіс: ӧтиыс дас во нин карын, мӧдыс — сиктӧ кольччис. Гежӧдика гожӧмъяснас аддзысьлӧны, важсӧ казьтывлӧны, выльнас ошйысьӧны. Кӧть ошйысьнысӧ торъя нинӧмӧн. Некодыслӧн двореч ни джуджыд мышка креслӧ абу. Сӧмын дзоля удждонысь йирысь гӧтыръяс да лов-мӧд челядьӧн, кодъяслы сійӧ жӧ удждоныс муртса тырмӧ рушку тыртыштны да сітан сайӧдыштны.

Но паныдасясны да ёна ӧта-мӧдсӧ лыбзьӧдласны. Иван ошйысьӧ дачаӧн да голякылысь «Запорожецнас». Володь — кыйӧм-виӧмӧн да пыж-моторнас. А мый сэсся мужикъяслы колӧ? Кӧть торйӧдчасны да вежалыштасны ӧта-мӧдыслы, а юигас кыкнанныс озырӧсь да пелькӧсь: чиганлы вӧв пыдди карнан вузалӧны, ки пӧвнас керкаяс разьӧны да тшупӧны. Век нин кокньӧдыштлӧ лов вылад. Да и казьтывлантор кольӧ.

Ньӧбис Володь лавкаысь еджыд доз да пиво гоз. Весиг та понда автобусӧ эз пуксьы, подӧн муніс кар джынсӧ. Кузь каблукъяснад асфальт дітшкӧдӧмысь кокчӧръяс лыжалісны. Лифтӧ пыригӧн нин думыштіс, мый Иван вермас не веськавны гортас гожъя луннад. Иван вӧлі гортас. «О-о! Володь, друг!» — «Иван! Сё во!..» Тапкӧдчыштісны, сувйыштісны ӧта-мӧдӧс бокъясас да, Иван нуӧдіс Володьӧс веськыда кухняас.

Пызан вылын — восьса коньяк доз. Улас — ещӧ доз-мӧд тыртӧм. Помъясӧн тырӧм клеёнка вылын — чегъялӧм нянь тупӧсь, гырыся вундалӧм калбас, кык чусмӧм стӧкан да чабралӧм газетъяс. Иванлӧн чужӧмыс пызан вывса газетъяс кодьыс жӧ нямрасьӧм. Тӧдчӧ: сьӧлӧмсяньыс нин юӧма. Володьлы весиг юасьны эз ков, кыдз другыс олӧ. «Медся бура!» — равӧстіс эськӧ Иван.

Пуксисны. Иван перйис выль стӧкан, кисьтіс аслыс да Володьлы джынйӧн. «Но, юам!» — «Гӧтырыд нӧ?» — «Курорталӧ челядькӧд». — «А-а, сійӧн и красуйтчан?» — «Хе-хе, мӧд лун на. Войдӧрлун колльӧді. Рытнас гажтӧм лоис да, суседӧс кори. Тӧрыт сыкӧд жӧ пукалім».

Бырӧдісны коньяктӧ. Володь лэптіс ассьыс вайӧмсӧ. Иван ӧтарӧ нимкодясис: «Но, молодеч! Кӧть волынысӧ гӧгӧрвоӧмыд». — «Да ме важӧн нин кӧсъя вӧлі. Вай, меся, шыбита ставсӧ да ветла Иван дорӧ. Гӧтырлы сідз и шуа век: меся, турун пуктытӧдз Иван дорӧ ветла». — «Важӧн нин колӧ вӧлі. Дача вылӧ нуӧдла. Овмӧсӧс петкӧдла. Эн на ӧд аддзывлы?» — «Дась волӧмӧн видзӧдла нин колкозтӧ».

Ветлісны содтысьны. Володьлӧн кыв-вор воссьыны кутіс. «Ок эськӧ, Вань, бура пукалам, но бабаястӧгыд гажтӧм». — «Володь! Бабаястӧ? Кӧть дасӧс вайӧда. Да вайӧдӧм оз ков: чукӧста кӧ, керкаын бергӧдчыны некӧн лоӧ». — «Тайӧ тэ, Иван, содтыштін жӧ эськӧ да». — «Неуна, дерт, содтышті. Мый миянлы сы мындасьыс? Кыкыс тырмас». Володьлы эз вӧв окота петны некытчӧ керкаысь, и бабаяс эз торъя ковны, но сылӧн шмоньсорӧн шуӧм кывъясыс ыззьӧдісны Иванӧс: «Друг мортлы, да мед баба эг корсь? Лок, ветлам». «Кытчӧ?» — «Ӧтилаӧ».

Петісны ывлаӧ. Иван мунігмозыс ньӧбис коньяк, розаяс. «Карсаыд тӧдчӧ,— думыштіс Володь.— Мен кӧ, матере дай розаясыс, сы пыдди эськӧ ещӧ доз босьтім». Иван пыртіс Володьӧс кутшӧмкӧ вит судтаа керкаӧ. Вель дыр звӧнитчис сьӧд клеёнкаӧн эжӧм ӧдзӧсӧ. Некод шы эз сет. «Хм. Абу гортас. Ветлам мӧдлаӧ». Но и мӧдлаас абу жӧ вӧлӧм туйсӧ лӧз нойӧн вольсалӧма. Иван зумыштчис. Володь кутіс нуӧдчыны: «Ладнӧ, абуӧсь кӧ и абуӧсь. Мунам, тэ дорын пукалыштам». Иванлӧн быттьӧ ылӧдлӧма другсӧ лоис, да пыксис: «Заводитім да корсям нин».

Сӧмын рытгорув мудз да пӧшти палялӧм (кӧть и содтысьыштлісны пӧлысь-мӧдысь) другъяс воисны ӧткӧн сулалысь пу керка дорӧ. «Тані менам важ пӧдруга олӧ,— шешмуніс Иван.— Пукалыштам, юыштам, да ме муна, ог кут гартласьны». Звӧнокӧ кузя личкис, бергӧдчис Володьлань: «Сӧмын эн повзьы, абу дзик тыр сюсь бабаыс». Дзуркнитіс ӧдзӧс. Кодкӧ петіс посводзӧ. «Коді сэн?» — «Ме, Иван». — «Ваня», — пыдісянь лолыштісны ӧдзӧс сайын эскытӧг. «Ме, ме», — серӧктыштіс Иван. Тэрмасьӧмӧн сяркнитіс ключ. Иван киняувті Володь аддзис неыджыд тушаа пелькиник нылӧс. Тшук Володьысь ыджыдджык. «Ванечка!» — уськӧдчис нылыс Иванлы сывъяс. «Энлы, энлы,— серӧктыштіс Иван.— Ме абу ӧтнам. То менам дзолядырся друг, Володь». Мынтӧдчис нывлӧн азым киясысь да содтіс: «Ӧтлаын сиктса бус куртлім. А помнитан, Володь, Домна... Но-о! Кыкнан кок вылас тай чотӧ вӧлі... Коркӧ чипӧс саяс кыйӧдчӧма: тшалакӧн сизьдыштіс балябӧжӧ, чипанъяссӧ котрӧдлӧмысь». «Помнита,— нюмсермуніс и Володь,— сылысь войнас сэсся изйӧн ӧшиньяссӧ пасьйим». — «Дерт, йӧйӧсь вӧлім. Мый дон ӧтка пӧчӧыслы ӧшинь тэчӧмыс сувтіс». — «Да-а, Митипер-суседыс эз ӧти лун сылысь винасӧ сысъяв».

Тайӧ сёрни-басниӧн пырисны керкаӧ. Ныв, стӧчджыка кӧ, ар 25-яса нывбаба, нуӧдіс кухняӧ да лӧньӧдыштіс другъясӧс: «Ш-ш-ш, Ванюшӧс садьмӧданныд». Иван серӧктіс: «Ванюш?» «Да. Бать сертиыс нимті,— нывлӧн синъясыс кыдзкӧ жугыля и долыда ӧтпырйӧ югнитісны.— Тэ кӧть тӧдмӧдін миянӧс, Иван». «Ме жӧ шулі нин: тайӧ — Володь». «Марина», — нывбаба нюжӧдіс тшӧтшыд чуньяса гӧгрӧс кисӧ. «Володь». И Марина пыр жӧ вунӧдіс Володь йылысь, бергӧдчис Иванлань: «Мый сэтшӧм дыр эн волы? Кыдз нин олан?» — «Кыдз аддзан: красуйтча». Марина ышловзис да бара нюммуныштіс шкаплань стопкаясла бергӧдчигмоз. «Кымын арӧс пиыдлы?» — юаліс Володь, мед кыдзкӧ тыртны сёрниын лоӧм костсӧ. «Вит кӧ-а?» — юалана видзӧдліс Марина вылӧ Иван. «Нёль». Сёрни сэсся эз и артмы. Володь эськӧ босьтчывліс сяркӧдны анекдотъяс. Но сералісны сідз-тадз, эз сьӧлӧмсянь. Марина синсӧ эз лэдзлы Иван вылысь. Иван мыйлакӧ педзис.

Асъядор Марина муніс мужикъяслы джоджӧ вольсасьны. Иван мигнитіс Володьлы, довкнитіс юрнас жырлань: «Но мый, шогмӧ-оз?» Володь кыпӧдыштліс пельпомсӧ: «Тэнад делӧ». Мариналӧн вольсассис. Пырис кухняӧ: «Иван, ме тіянлы вольсалі». Володь вылӧ бара эз видзӧдлы, но сылы эз нин парскы. Радейтӧ нылыс, век на лача кутӧ. А Иванлы вӧлӧма ӧдзӧс восьтылӧм кодь. Эк-ма, олӧм! И друг Володь гӧгӧрвоис: муса сылы Маринаыс. Жаль и муса. И яндзим лои Иван понда.

Иван лэччысис ёна код улӧ да водіс. Марина пукаліс. Виччысис Володьлысь водӧм. А, гашкӧ, и мунӧмсӧ. «Быттьӧ ӧшкасьны вайӧдіс. Абу лӧсьыд», — думыштіс Володь, но чеччӧм пыдди небыдика кутыштіс Маринаӧс пельпомӧдыс. Мӧдыс эз петитчы, нёровтчис сы дорӧ. Тіралӧ. Мужикъясысь тшыгъялӧма, тыдалӧ. Кузя окыштчисны. Вывті кузя. Володьлӧн сьӧлӧмыс чеччис. Пӧдіс лолыс. Нывбабалӧн яйыс сыркъяліс. Сылӧн сьӧлӧм зутшкӧмысь пельяс чуналісны.

Мырдӧнмоз орӧдчис Маринаысь Володь, вешйыштіс ӧшиньлань, видзӧдліс югдысь ывлаӧ, пестіс куритчан. Куритчан чеччаліс тіралысь чуньяс костын. Марина чӧла сувтіс орччӧн. Володь чунь соттӧдз кыскыштіс чигаркасӧ, кусӧдіс пӧим дозйӧ да вӧлисти бергӧдчис сылань: «Но мый, мӧдӧдча, навернӧ...» «Кольччы. Кытчӧ войнас...?» — «Ог. Менам велавсьӧма гортын узьлыны...» — «Ачыд тӧдан...» — «Ме доз джынсӧ босьта. Висьтав Иваныслы, кор садьмас». Малыштіс кагаӧс моз Маринаӧс юрӧдыс, петіс.

Велавтӧгыд ӧдва аддзис автопавильонлань петан туйсӧ. Пуксис павильондорса лабичӧ. Юыштіс штоп голя помысь. Шевкнитіс лабич мышкӧ кияссӧ.

Асыввывсянь кыпӧдчис шонді. Сявкнитіс югӧръяссӧ зарни ордымъясӧн кык керка костті. Ордымъяс пӧлӧн кузя нюжӧдчисны вуджӧръяс. Сильӧбтіс медводдза лэбач.

Володь читкыртчыштіс шонділань да нюммуніс.

Луныс пестысис мича.


Гижысь: 
Гижӧд
Пӧдруга
Жанр: 

lkejrlkelkrgner klrjnelknfrkl ekjnrjkenfrej

1