КӦЗА СЮР ВЫЛЫН БОБУВ


Сійӧ асылас мыйлакӧ водз садьми. Гашкӧ, пакула васӧ рытнас унджык юсьӧма да сы вӧсна. Сэсся садьмытӧдз мамӧ петкӧдчыліс — бара нин менӧ гӧтралӧ. Чеччи, а шондіыс сӧмын на джынвыйӧ мыччысьӧма. Часіыс стенам мӧд вежон нин оз тотшкы, тӧрӧканъяс, тыдалӧ, пырӧмаӧсь, да сувтӧма. Но, мед сэні и гожъясны, ӧні шондіыс кадсӧ висьталас. Муза дорӧ водзджык жӧ и петалі лысьтысьнысӧ да лэдзи йирсьыны сиктас. Первой сійӧ Педӧр Машъяслысь дӧм-двӧрсӧ гӧгӧртас, оз-ӧ позь кытікӧ йӧрас пыравны. Йӧрныс налӧн ыджыд, чӧсмасянторйыд, майбыр, кӧзаыдлы сюрас. Став петасыс неважӧн на мыччысьӧма да зӧм кайӧ шоныд зэръяс бӧрад. Небыд коръяс вылас кӧ веськавлас менам Музаыд, зэв на эськӧ и ладнӧ, йӧвтор вӧраас сӧдзыштас.

Чай юны сэсся пукси. Пакулаас грузинскӧй чай содтышті, мед бакшасьӧм дукыс чайыслӧн эзджык кыв. Восьса ӧшинь дорын пукала. Небыд тӧвру пырӧ керкаам, ӧшинь занавеснас ворсӧ. Занавессӧ во-мӧд нин эг вежлы, да ставнас чирӧма-вижӧдӧма, быттьӧ нетшыштӧма пон чомйысь, кӧні кычипиян узьлӧмны-олӧмны. Вежны колӧ Иван лун кежлас, гашкӧ, свӧяк пыралас. Сійӧ быд воліг дивитӧ менсьым олӧм-вылӧмӧс. Дӧрӧмӧс быттьӧ мӧс няклялӧма, бура дыр нин эг вежлы. Вежла жӧ эськӧ да. Тайӧс со тувсов Микӧласянь сӧмын на видза. Коді меным мыськас, мед быд тӧлысь дӧрӧм вежны!

Видзӧда, бригадирным локтӧ. Неважӧн на сійӧс пуктісны. Таӧдз конюкӧн вӧлі, а сы водзвылын завхозаліс. Номенклатурнӧй морт. Пырис.

— Бур асыв, Павел Модестович!

— Но, лок, лок, небывалӧй. Пуксьы, шойччы. Чай юам — индийскӧйӧс заваритӧма.

— Индийскӧй? Ог нин помнит, кор юлі.

Кисьті ме сылы грузинскӧй сора пакуласӧ, юис да шуӧ:

— Да-а, индийскӧйыд — индийскӧй и эм. Чашкаад тай тӧрӧкан вӧлӧма, да эг нин кисьт чайсӧ, жаль лои. Со, пыдӧсас век на туркъялӧ.

— Сы бурыд менам эм. Ачымӧс кӧ оз джагӧдны и... Мед оласны.

— Кыдзкӧ мездысь татшӧм добрасьыд. Тӧвнас вольпасяд кутасны локны, шоныдін корсьны. Аслыд жӧ быд розьӧ пондасны сюйсьыны. Вомад и, пеляд и... быдлаӧ. Менам бабалы коркӧ пеляс пыраліс, да карӧдз нуӧдлісны.

— Пеляс?

— Пеляс, дерт, кытчӧ нӧ сэсся?

— Тэнад, тыдалӧ, зэв ыджыд мог ме дорӧ эм. Сідз ӧд прӧстӧ эн пыр, индийскӧй чай юны.

— А ме, Павел Модестович, тэнӧ коравны вои, эн ӧткажит косӧн. Пензия дорад сьӧмтор нажӧвитан, кӧзаыдлы стимул сетам турунӧн. А?

— Мый а, мый а? Помӧдз висьтав, эн кытшлав, он мича нылӧс корав ас саяд.

— Ачыд тӧдан, Изъю йылыс мӧд во нин ытшкытӧм вӧлі, а вит морта бригаданад кытчӧ паськӧдчан? Таво сэтчӧ райцентрысь звено воас. Служащӧйяс. Том ли, пӧрысь ли лоас публикаыс, ме, дерт, ог тӧд. Ачыд аддзан, а ытшкысьнысӧ тай суседыд сӧгласитчис, Миш. Тэнад уджыд оз ло сьӧкыд. Литовка дорны, куранъяс дзоньтавны, пинь-пыкӧд керавны. А медсясӧ тэнӧ нарад вылӧ мӧдӧдам, мед кывйӧн да сӧветӧн томджыкъяссӧ сям выв пуктыны.

— Но-о... Тэ менӧ кӧсъян воспитательӧн мӧдӧдны. Ме ассьым кӧзаӧс ог вермы велӧдны, мед асланым йӧрын эз гусясь...

— Нӧрӧвит, нӧрӧвит, эн шогӧ усь. Сэні райкомсаяс да, кытысь да лоасны. Ставныс культурнӧй йӧз, некодӧс велӧдны оз ков.

— А кӧзаӧс кодлы коля?

— Кӧзатӧ верма и ме нуӧдлыны — тӧрас гидъяс ыжъяскӧд. Звеноргыскӧд водзджык и мӧдӧдчанныд. Керкасӧ дзоньталыштӧй, видзьяссӧ весалыштӧй. Ставсьыс мынтам.

Муніс бригадирыс, а ме думӧ уси. Позьӧ эськӧ ветлыны, но Музасӧ, Музасӧ кытчӧ? Сьӧрсьым босьтлыны — со мый ме думышті. Ӧні бура лысьтӧ да сы мында йӧв йӧзлы сетны абу делӧ.

Аскинас сельпоысь содтӧд сакар вичмӧдісны да табак. Ме эськӧ ог куритчы, да думышті, гашкӧ, ковмас. Звеноргнас индӧмаӧсь асланым сиктсаӧс жӧ. Ванякӧн шуӧны, а нимыс сідзсӧ Рӧман. Гӧтыртӧм на. Мед ветлас звеноргавны, оз-ӧ ылӧд кыз какана кутшӧмкӧ интифлюшкаӧс. Водка на миянлы сетісны кык дозйӧн, но талон вылӧ. Меным сійӧ, дерт, эм кӧть абу, но бара жӧ ковмас кӧ.

Мӧдӧдчан асылыс сімыд вӧлі, а ывлаыс быттьӧ кӧдзалӧм пывсянын, васӧд руа. Чой ордас сёрнитыштім Ванякыскӧд поводдя йывсьыс, а сэсся сійӧ друг сьывны горӧдіс: «Гашкӧ, зэрас, гашкӧ, оз, гашкӧ, юр пыдӧсам мыль петас». Тешкодь морт. Кӧзасӧ менам домӧма нин вӧлі пыж нырас.

— А этійӧ нӧ коді сэтшӧмыс? — юалӧ.

— Кӧзаӧс ме босьті, йӧв кутам сёйны.

— Тэ нӧ мый? Культурнӧй йӧз воасны, ӧти керкаын пондам узьлыны, йӧлыд сійӧ, рушкутӧ пӧльтас да, гусьӧн оз куж петны. Гашкӧ, яй вылӧ босьтін да? Сэки бур, сэки позьӧ и дружитны тэкӧд, старик.

— Ме тэныд петкӧдла яй... балябӧжад пелысӧн.

— Но, но, эн вывтіась. Дозъяссӧ босьтін-ӧ?

Ме нинӧм эг шу, босьті кӧлуйӧс да лэччи пыжас. Зіб помысь ковмас катны Изъю йылӧдз, кык лун тырмас. Пӧрысь мортыдлы, дерт, абу курорт. Но мед, воа да шойчча. Тэрмасьнысӧ нинӧмла жӧ, эм кадыс, мед кӧть и куим лун катам.

Пырим Изъюас, да тӧвруыс эз понды миянлы веськавны. Та вӧсна ном да лӧдз зырӧдіс, кымӧрӧн локтӧны. Кӧза пыж нырын баргӧ. Ваняк ӧласьӧ — йӧткысьнысӧ вунӧдлас. Тшуким алькӧс ласта дорӧ, судзӧдім ном лекарство да мавтчим, а Музасӧ диклопосӧн пызниті. Сэсся кайлі ласта вылас, ытшкышті сылы турунтор, мед рӧмидзтӧ. Ванякыс мыйкӧ лукйысьӧ пыжын. Доз судзӧдіс, стӧкан да черинянь.

— Но, Павел дядь, ӧні саялім, ӧні позьӧ нин. Пасъям страда заводитчӧмсӧ. Вай лысьты кӧзатӧ — вӧраыс пыж мегырас нин тшукӧ.

— Тэ, колӧкӧ, дозсӧ лысьты, а менам кӧзаӧдз эн во.

— А мыйла сылӧн ӧти сюр джынйыс абу? Видзӧд, видзӧд, мӧд сюр вылас бобув пуксис. Сё дивӧ, мый бара он и аддзыв таладор вӧльнӧй светас. А мыйла мӧд джын сюрсӧ нин эн пилит, мед ӧткодь вӧлі?

— Пилиті кӧ, кытчӧ эськӧ бобулыс пуксьыліс? Сэки эськӧ и дивӧсӧ эн аддзыв.

— Сійӧ сідз.

Ваняк юис водкасӧ да шуис: «Бе, кака», чериняньсӧ шӧриаліс да мӧд джынсӧ меным мыччис:

— На, гӧтшкы йӧткасигмозыд. Сідзкӧ, он ю?

— Ог, ог. Кыкнанным кӧ юам, бӧрӧ кылӧдас. Вай йӧткы нырсӧ.

Пажынӧдз сэсся некытчӧ эг тшуклӧй. Ваняк крепыда йӧткасьӧ — том выныс вылысас на. Юыс визув, да быть йӧткась. Со и коз пӧрӧма ю вомӧн, но пучерйыс абу воӧма ва веркӧсӧдзыс, чальясыс кутӧны. Пыжнас колӧ коз увтіыс уйны, а пыжыс тӧрмӧн чальяссӧ увйӧма. Сӧмын колӧ ставлы водны пыжас. Лӧсьӧдчим эськӧ уйны, но кӧзалӧн сюр пӧлыс сорӧ, а водны оз кӧсйы. Ваняк пикӧ воис кӧзаыскӧд — оз вод и ставыс. Ме мый вынсьым пыжсӧ кута, мед оз кылӧд. Ваняк горзӧ:

— Шыбита кӧзатӧ ваас! Кутшӧм беспутнӧй вӧлӧма. Либӧ вай сӧтам мӧд сюрсӧ.

— Тэ водтӧд кӧзасӧ, ачыд сы вылӧ шыбитчы, мед оз туркъяв. Ме надзӧник нуӧда.

Кӧнкӧ Ваняк улын кӧзаыс лёкысь баргӧ, быттьӧ голясӧ нин вундӧны, но и пыжнаным вешйим водзӧ да петім сэсся коз увсьыс. Пыж нырсаяс сувтісны.

— Но и скӧтина, — шуӧ Ваняк.— Ӧстатки водкаыс юрсьым петіс.

— Со эсійӧ мег саяс керка эм, пажнайтам сэні.

Местасӧ тайӧс мыйлакӧ шуӧны Жытей Мегӧн. Жытейыс сійӧ пач под вылын пӧжалӧм нянь тупӧсь, подӧвӧй нянь. О-о, кутшӧм жытейяс менам мамӧ пӧжавліс, помнита! Ачыс мунӧ уджавны, колхоз кыпӧдны, а няньсӧ вӧлі томналас мӧд жырйӧ, мед ме эг верд сиктса тшыг йылӧмыслы. Томаныс дженьыдик чеп йылын да ӧдзӧссӧ позьӧ неуна калькӧдны. Коластӧдыс жытейяссӧ аддзан, да он тай босьт. Менам на, гашкӧ, та вылӧ сямӧй эз тырмы, но коркӧ ӧтчыд ми ордын ме кодь жӧ арлыда другкӧд вӧлім. Ар дас кыкаӧсь. Менам другыд аддзӧ жытейсӧ ӧдзӧс коластӧдыс да горӧдлӧ «ув-ув». Артист. «Кывзы, — шуӧ.— Пачсьыс нянь кыскалан зыр воропыс таті ӧд тӧрас? Тӧрас. Вай видлам?..» Ме сеті зырсӧ. Тӧрис и эм, а зыр лопйыс, дерт, сувтса. Судзӧдчим няньӧдзыс да босьтім зырнас ӧти тупӧсь, вайӧдім ӧдзӧс дорӧдзыс, а мед кватитны няньсӧ, коластӧдыс киным оз тӧр. «Ув-ув, — шуӧ менам Миша другӧ.— Мый кутам вӧчны? Эм кӧ вороптӧм коса, мун пырт». Корси сарайысь сімӧм коса, пырті. Миша босьтіс да коласт пырыс вундаліс жытейсӧ посни торъяс вылӧ. «Ӧні, — шуӧ, — колӧ сӧмын чорыдджык сутуга». Сутугатӧ аддзим жӧ, помсӧ крукӧн вӧчим да кыскалім сэсся нянь торъяссӧ. Быдторйыс овлӧ. Миша другӧс та бӧрын Жытей Мишӧн пондісны шуны. Муніс кытчӧкӧ велӧдчыны да сэсся эз и волы гортас. Некод дорӧ лоис волывнысӧ...

Жытей Мег керка горулас и ляским пыжнымӧс. Дорӧсыс тані абу няйт, кӧж.

— Кӧзасӧ разь, — шуи Ваняклы, — да кай керка дорас сыкӧд.

— Этійӧ? Мекӧд каяс? Йӧй кӧ тэ-а?

Ковмис аслым Музаӧс катӧдны. Домалі тув йылӧ, веж туруна эрд вылӧ. Ваняк кайис жӧ пажын мешӧкъяснас, чайникын ва вайис.

— Вай кӧзатӧ лысьты, — шуӧ.— Нэмӧс нин мӧс вӧра йӧвсӧ эг юлы.

— Тайӧ абу мӧс, кӧза.

— Кӧза вӧра йӧв, сідзкӧ.

— Рытнас лысьтам, режимсӧ ог торкӧй.

Чайникыс пузис, да пуксим сёйны. Муза тожӧ йирсьӧ керка саяс. Ваняк судзӧдӧ дозсӧ да неуна чолькнитӧ юмов чаяс.

— Кыдз бара колӧ тайӧ тэныд?

— Э-э, другӧ, Павел дядь. Кор гӧг гӧгӧртӧ шонтыштас, нинӧм сыысь бурыс абу. Кодавмӧн ӧд ог ю. Этшаникӧн — ачыд тай аддзан. Тэ видлы жӧ чайнад.

— Ог, ог. Ме во кызь нин вомӧ эг босьтлы.

— Мый нӧ сідз? Кӧнкӧ, карактерыд йӧй? Либӧ здоровьеыд абу. А, гашкӧ, и скуп да. Менам тай братан эм да доз некор оз ньӧблы, а йӧзыдлысь юас син бугыльясыс едждытӧдз. Ме дорӧ пыравлас да ӧтарӧ «вай, вай». Терпитны сэтшӧмсӧ ог вермы.

— А тэ звеноргавнысӧ ассяньыд али мый вӧзйысин?

— Эг, мыйла ассянь, бригадирыс корис. Первойсӧ эськӧ Пакула Володьӧс коравлӧма да... абу тай сӧгласитчӧма. Грыжа пӧ сылӧн да оз вермы чӧвтнысӧ.

— Кутшӧм Пакула Володь?

— Но, Пакулаӧс быттьӧ он тӧд. Шнур Володьыс нӧ мый.

— Кутшӧм нӧ Шнур Володь?

— Но кыдз тэныд висьтавны. Кольтан Володь, либӧ.

— А бать нимнас он тӧд? Коді батьыс?

— Лешакыс тӧдӧ. Мыйӧн ме тӧда, коді батьыс.

— Тэнӧ мыйла Ванякӧн шуӧны?

— Менам батьӧ вӧлӧма Ванякин, вербованнӧй, а ме чурка... с глазами. Ачым ачымӧс ме верма шуны чуркаӧн, но йӧзсянь кӧ кыла, крапнита мыйӧн сюрӧ. Тэ учтит, пель пӧвтӧ юр пыдӧсад и ляска.

— Коддзин али мый? Эн лэбав. Кӧзалы кӧ висьтала, сюр пӧвнас тэнӧ бесыд петтӧдз бытшлалас.

— Бытшлалас, мый нин оз. Воам да начкам кӧзатӧ — колӧ ӧд мыйкӧ сёйны. Яйтӧгыд ме кыдз верма турунсӧ кылӧдавны? Али прикадельки вылас? Кутӧ зэвтас лыяс вылад. Райкомсаяс воасны да асьтӧ шӧтасны турун пыдди, лэбын йылын ӧстатки лысьӧмтӧ кыпӧдасны косьтыны.

— Гашкӧ, найӧ сьӧрсьыныс яй ваясны?

— Ваясны, вомтӧ паськӧд. Со этані, дерт, ваясны.

Ваняк тапйӧдлӧ аслыс сітанас.

Пажнайтім да менӧ ун пондіс личкыны. Гортын тайӧ кадас век нюжӧдчыла. Пыри керкаас, сэні, гашкӧ, абуджык номйӧсь, да шыбитчи кӧр воль вылӧ. Ваняк бипур дорас коли, но со тай ме бӧрся жӧ локтӧ.

— Кывзы, Павел дядь, ме тэныд дельнӧй сӧвет сета.

— Кутшӧм сэтшӧм сӧвет?

— А талун узям тані, дась керкаын. Ӧні кӧ вӧрзям, места вылӧдз сідз и тадз ог воӧ, да код тӧдас, кӧні ковмас узьны. Аски асывнас водз петам и буретш воам.

— Водка юин, а юрыд пендритӧ на. Узям ли, мый ли.

— Кӧзаыд мыйкӧ сэні ёна нӧйтчӧ. Сюр пӧвсӧ, тыдалӧ, номъяс вильӧдӧны.

— Мун пызйы диклопоснас.

— Ачыд, ачыд. Меным тэнад кӧзаӧдз делӧ абу.

Быть ковмис чеччыны да аслым петавны. Нӧйтчӧ и эм кӧзаыс. Кӧн кутшӧм лэбалысь да вир юысь твар эм, ставыс коньӧрлы вӧраас сакасьӧма. Пызйышті химиянас, мед сэсся оз локны. Колӧ на эськӧ домӧдсӧ нюжӧдыштны, да гезйысла пыжӧдзыс дыш лэччывны. Узьны кӧ и узьны. Бӧр пыри керкаас. Ваняк гатшмоз куйлӧ, но оз узь. Водкаа чайыс, тыдалӧ, гӧг гӧгӧрсӧ шонтӧма да, мургӧ, вомсьыс йиртас тшын пӧлялӧ.

— Кӧсйи эськӧ кӧзатӧ джагӧдны да. Мый, оз вермы али мый ачыс дзугсьыны да джагавны? Зэв на и вермас. Менам тай войдӧр во, конюкалі сэки, быдса вӧв шыркнитчис, джагӧдны эз ков. Со кӧні яйыс вӧлі. Став совхозсаыслы тырмис дай магазинас на сдайтлім. Колӧкӧ, и тэ на ньӧблін?

— Джагалӧм вӧв яйтӧ ме ог сёй.

— Мед и сёян. Миянлы тай, совхозсаяслы, кулӧм скӧтина яйысь кындзи нинӧм сэсся оз вичмыв. Куканьыс, коді нин пӧрӧ кок йывсьыс, кымӧсас печиктасны дай кулӧ, а висьталасны — начким пӧ, локтӧй, яйсӧ пондам юклыны. Шыдсӧ пуан, да сійӧ яйыс кодь жӧ лӧз лоӧ. Сёй, сиктса труженик.

Ваняккӧд ми эськӧ унмовсьлім, да номйыс бӧр садьмӧдіс. Шуим вой кежлас пачсӧ ломтывны, жарас озджык локны.

— Тэ вай песла ветлы вӧрас, — шуи Ваняклы, — а ме кӧзаӧс лысьта.

Сэсся лэччылі пыжас пӧдӧникла да йӧвсӧ сысъялан марляла. Муза видзӧдӧ вӧрланьыс, Ванякыс сэні кратшкӧдчӧ да.

— Эн пов, эн, тайӧ Ваняк другным пес йӧрӧ. Вай лысьтыштам инӧ. Сетыштан йӧвтортӧ? Сетыштан? Но и бур, часлы дядьыс лӧсьӧдчыла тэ дорад.

Кратшнитӧмыс дзик орччӧн кыліс. Думайті, Ванякыс песнас локтӧ, бергӧдчи, а ош петіс луд вылас. Сё лешакӧ, сё лешакӧ! Ме чепӧсйи да йӧй моз понді чеччавны места вылам, кинам ӧвтны да горзыны: «Эн лок татчӧ! Эн лок татчӧ!» Ошкыс сувтлӧмӧн видзӧдліс ми вылӧ, а сэсся кыдзкӧ зэв тешкодя шыбитчис дзик мӧдарлань да варгыльтіс вӧрас. Сы бӧрын и кылі сэтысянь: «Кытчӧ татчӧ?» Тайӧ нин Ваняк сёрнитӧ ошкыскӧд. Сэсся локтіс песнас.

— Кӧза вылад тай, вӧлӧмкӧ, дулльыс абу сӧмын менам сӧдзӧма. Аддзылін, другӧ?

— Петкӧдчыліс тай. Вӧтлі, татшӧм другъясыд миянлы Музакӧд оз ковны.

— Ковмас керкаас узьтӧдны скӧтинатӧ, а меным пищальӧс пуктыны матӧджык.

— Но лок, йӧв юам. Муза сетыштіс да.

Бӧрынджык чай на пузьӧдлім нӧштаысь да бура дыр пукалім бипур дорас. Пессӧ век содтам, мед тшынасьӧ да номсӧ вӧтлӧ. Муза пыр на дом йылын, но колӧ эськӧ сэсся и йӧртны нин керкаас. Ваняк шуӧ:

— Кывзы, яй да яй сёрнитам, а яйыс ачыс воліс ми дорӧ. Вай кӧзатӧ ывлаас и колям, а ме сійӧс кута ружьеӧн видзны, мед ошкыс эз косявлы. А? Кыті лёк мӧвпыс? Ош яйыд ӧні бур, абу нин гуысь петӧмыд.

— А кытчӧ солавнысӧ пондам?

— Но и морт. Эн на лый, а солалан нин. Аддзам кытчӧ.

Колим кӧзасӧ сам пыдди. Ваняк сэсся эз тшӧкты пызйыны диклопоснас.

— Ӧти-кӧ, — шуӧ, — кӧзаыд оз ло аппетитнӧй ошкыслы, да сійӧ оз лок, а мӧд-кӧ, номйыс мед кӧзасӧ ёнджыка претшкас. Сэки сійӧ баксыны кутас, а ошкыд абу пельтӧм. Ме двухстволканам лӧсьӧдча жар петан розь дорас, сэтысянь и кӧзаыс, и вӧрыс тыдалӧ. А тэ вод да узь.

— А, дерт, вода. Ӧти розь дорад кыкыдлы нинӧм вӧчны. Кыйӧд — войыс ӧні югыд, аддзан.

— Ошкыс кӧ оз пет, менам эм кодӧс пезьгӧдны. Сідз и тадз яйтӧг ог кольӧй.

— Тэ вай пиньтӧ эн кеслы, а караулит.

Ваняк сэсся ланьтӧдчис розь дорас, и ме воши ӧтка ном дзизгӧм шы улӧ. Дыр ли, регыд ли узи, код тӧдас. Мыйкӧ вӧтаси, да ог помнит. Друг: «Бах, бах!» Ме ун йывсьым чеччышті кок йылӧ, ог гӧгӧрво, мый лоис. Ваняксӧ аддзи розь дорсьыс. Пищальсӧ чегӧма да стволъяссьыс тшынсӧ пӧлялӧ.

— Мун куль, — шуӧ.

— Кодӧс куля? Кӧзасӧ куля?

— Ошсӧ куль. Бура ӧд меным кымӧссӧ лӧсьӧдіс, мӧд стволсьыс абу и колӧма нин эськӧ пезьгӧдны.

Петім. Кӧзалӧн мыйлакӧ ӧти син пӧлыс пониджык лоӧма.

— Тайӧ ничего, — шуӧ Ваняк.— Мӧд синсӧ лӧдзьясыс курччасны, да ӧткодь лоас.

Том ош на вӧлӧма, ар куима. Кулим да думыштім кусӧ татчӧ не зэвтны, а босьтны сьӧрысь. Татшӧм добраыд миянӧс оз понды тані виччысьны. Ошсӧ солалан местаыс сюри жӧ. Ваняклӧн бак дай менам бак. Ош тшӧгсӧ ме босьті — коскӧй висьлывлӧ, да корсюрӧ мавтчыны лӧсялас, сыысь бурыс нинӧм абу.

— Гашкӧ, шыд пуам свежӧй яйысь?— шуи Ваняклы.

— Тэ нӧ мый, дрисня босьтас. Нӧрӧвит, мед кӧть олан руыс петас яйсьыс. Мед на и чирыштас неуна — сэки позьӧ сёйны. Думайтан, ошкыс кӧ джагӧдіс Музатӧ, пыр жӧ и пондіс яйсӧ няклявны али мый? Первой эськӧ дуксьӧдіс кӧнкӧ нитш улын.

Тайӧ ошнас кадсӧ уна воштім да вӧрзим тэрмасьӧмӧн. Талун колӧ воӧдчыны места вылӧдз.

Муза куйлӧ пыж нырын, а ми Ваняккӧд эг на шойччылӧй вӧрзьӧм бӧрас. Юыс тані кузь коськъяса, да йӧткасьны колӧ ёна. Сэсся эськӧ лӧнь вомынъяс заводитчасны, сэки кокниджык лоас, а ӧні... Зібъясь, Ваняк, зібъясь. Сійӧ и зібъясьӧ, и вомыс мытш оз петлы. Он гажтӧмтчы татшӧм другыдкӧд.

— Меным, Павел дядь, эськӧ и колӧ гӧтрасьны, а код лешакыс локтас миян сиктӧ, кӧні бабаясыслы дзик нинӧм вӧчны. Меысь томджык да виднӧйджык зонъяс эмӧсь, но и найӧ пӧвтӧмӧсь, а менӧ нин мый висьталан. От случая к случаю сӧмын исыштла. Дерт, бокад кӧ век аслад баба вӧлі, бур жӧ да.

— А кытысь исыштлынысӧ сюрлӧ? Ноко, висьтав.

— Ачым тӧда, секрет фирмы. Менам кывт эм, кытчӧдз капкан оз сиавны.

— Тэныд колӧ пиня капкан сиавны, мед бура шедан.

— Мыйла тэныд менам шедӧмыс колӧ? Олӧмыс кӧ сэтшӧм, мый сэсся вӧчан. Ӧні яй пондам сёйны да, гашкӧ, и тэ на кутан бергавны кодкӧ гӧгӧр. Мый дивӧыс?

— Менам, бур пи, бергалӧма ас пайӧс. Вай тэ нин мыйкӧ, сямыд кӧ тырмас. Ен мед сетас эськӧ ас пом гӧтыр.

Тадзи сёрнитігмоз и йӧткасим. Ваняк кӧть мый йылысь оз заводит висьтавны, век бабаяслань сёрнисӧ кежӧдас. Мортыслӧн — шӧр дойыс, мый сэсся вӧчан.

Пони ю серти вомынъясыс тані кузьӧсь да веськыдӧсь, быттьӧ каналӧд кывтан. Ӧтар-мӧдарас ӧткодь козъя вӧр. Кӧж берегъясыс воласны жӧ, но зэв гежӧда. Ӧти татшӧм кӧж нӧрысӧ и тшуким пажнайтны, мед тӧвруыс веськаліс да эз вӧв номйӧсь... Чукӧртім быдсяма лӧпсӧ да бипур пестім. Косьмӧма лӧптыс, шыӧн сотчӧ. Трачкакылӧмыс йӧлӧгаӧн бӧр локтӧ вӧрсяньыс. Нӧрыссяньыс Ваняк лэдзис ком кыснан да пыр жӧ и кыскис ӧти лов.

— Со тай, со тай. Часлы, ме тані вуграсьышта, рыт кежлас, воам да, юква лоас. Тэ чайниксӧ лӧсьӧд.

Ваняк кыпӧдаліс сапӧг чӧръяссӧ да пыдӧджык келіс, а ме ляпкӧдчи бипурланьыс пессӧ лӧсьӧдыштны. Друг мыйкӧ кӧдзыдторйӧн бан бокам шлочкис да виччысьтӧмысла тӧкӧтьӧ и биас эг пӧр. Видзӧда: лыа вылас ыджыд ком туркъялӧ, кыснаныс век на вомас. Ваняк гигзьӧ ю шӧрас, мынтӧд пӧ черисӧ, кок улӧдзыд тэныд локтӧ.

— Тэ вай ӧкуратнӧ, тӧкӧтьӧ эн ви комнас.

Но и сюсь жӧ морт Ванякыс. Яй йӧрис, ӧні со ӧти здукӧн дас ком нетшыштіс. Сідзкӧ, пӧтӧсь лоам.

Сёйыштӧм бӧрад да лӧнь ва вылас миян сьӧкыд пыжным ӧдӧбӧнджык кутіс мунны.

— Йӧткась, йӧткась, Ваняк, шонді саявтӧдзыс колӧ воӧдчыны.

— Мый тэ менӧ ныр выв вӧтлан? Али бӧжас да асьтӧ начальникӧн нин лыддян? Ме лоа звеноргыс. Шуа со этійӧ коз улас узьны — зэв на мичаа каян да узян. Сэсся мый тэ Ваняк да Ваняк. Тані пыжас ладнӧ, а йӧз дорас ме тэныд лоа Роман Алексеевич... Сюркняв пель саяд, эн ванякась сэні.

Таті эськӧ ӧдйӧ мунім, но водзын Кытшльӧсь коськ. Катнысӧ лёкӧн-шогӧн воан, но кывтігӧныс делӧ. Зэв крута бергалӧ юыс, да пыж нырсӧ век колӧ йӧткыны то ӧтарсяньыс, то мӧдарсяньыс. Он кӧ вевъяв, пыжыс здукӧн вомӧнасяс да путкыльтчас. Воим жӧ коськӧдзыс.

— Тані, Роман Алексеевич, сой сӧнъястӧ ковмас зэлӧдлыны.

— Ковмас кӧ и ковмас. Коськ бӧжыс тай зэв бур, ком олӧ тані. Гашкӧ, кыснансӧ шыбитла, вай тшуклам.

Тшуким изъя ді вылӧ. Мышканым коськыс эргӧ скӧра, видлӧй пӧ, видлӧй таті мунны. Ваняк кыснансӧ лэдзис. Эм нин, шуӧ, ӧти. Ком кыскис. Сэсся мӧдӧс, коймӧдӧс. Бара кыйис мыйтакӧ, но миянӧс кадыс тэрмӧдлӧ, а Ваняклы вӧля кӧ сетан, кӧть аски асылӧдз вуграсяс.

Шульк петтӧдз кытшлалім лёк коськӧдыс. Ваняклы нӧ мый, сӧмын сьыліыс гӧрдӧдыштіс, а меным нин коскӧ пондіс лыйлыны. Пӧрысьми, другӧ. Коськсӧ мунім да алькӧс берегӧ ме тшукӧді пыжсӧ — шойччыштны колӧ.

— А мый нӧ тані воштін? — юалӧ Ваняк.

— А шоччыштам, Роман Алексеевич.

— Вот, вот, сідзи, а то век Ваняк да Ваняк. Тэ вай шыбитчыв ласта вылас гатшмоз, а ме прикадельки банка восьта, да тшавкнитам, мед эбӧсным содас. Но первой ме комъяссӧ бытшка да солала. Жар луныс, да небзясны.

Ласта вылас тӧвруыс ворсӧ, да сэтшӧм бур куйлынысӧ номтӧминас, а лӧдзьяссьыс вевтти ныр-вомӧс. Ваняк пыжас клопӧдчӧ, корсьӧ мыйкӧ, а ме унмовси, эг и тӧдлы. Садьми сыысь, быттьӧ кодкӧ мыш кузя ветлӧдлӧ. Кыдз думышті, мый тайӧ лёкгаг, чеччышті да лёкысь горзігтыр зырӧді Ваняклань. Сійӧ аддзис менӧ, повзис, шыбитіс чери керан пуртсӧ да котӧрӧн ласта кузяыс. Ме сы бӧрся: «Сулав, сулав, нӧрӧвит!» Сувтіс, но понді матыстчыны, бара шыбитчӧ меысь.

— Сулав! Лёкгагсӧ мышсьым босьт!

— А-а, лёкгаг! Ме думайта, йӧймин. Повзян и эм — вомыд пельӧдзыд, синъясыд кымӧсад. Повзьӧмысла весиг пернапас эг сяммы чӧвтны. Но лок, босьта инӧ мышсьыд тварсӧ.

Ваняк кыпӧдіс дӧрӧм-майкаӧс да босьтіс сьылі дорысь. Кутӧ лёкгагсӧ да петкӧдлӧ меным:

— Со! Онджык буглясь, кӧн оз ков, — ляскис-шыбитіс ваас.

Бӧр мунім пыж дорӧ. Керӧм комъяссӧ Ваняк тэчӧма пӧв вылӧ. Ӧні мыськас да солыштас. Миян кык малированнӧй ведра на эм. Ӧтисӧ позьӧ прӧстмӧдны да сэтчӧ и солыштны. Лун кӧ сетны Ваняклы, мед тані вуграсьыштіс, ведрасӧ, пӧжалуй, тыртас. Висьталі сылы та йылысь.

— Ме думысь, — шуӧ, — сэні лоас жӧ кадыс черитӧ кыйны.

— Башкаыд тэнад, Ваняк, во, тук-тук. Комсӧ сэтысь, матігӧгӧрсьыс, кык лунӧн ӧктан, а ылӧсӧ мунны буретш оз и ло кадыс.

— Да? Но, бур. Лок сёйыштам, прикадельки со восьті. Сёй, сёй, эн пов, тані алкоголь абу.

— Ме ӧти ком свежӧйнас сёйи.

— Свежӧйнас, ульӧн?

— Но да. Совнас кӧдзышта жӧ, дерт.

— Тэ дзик менам братан кодь. Сійӧ тай мык вугравны пуксяс да кытчӧдз пӧттӧдзыс оз сёй, ни ӧти мык кӧрзинаас оз шыбит. Чериыс вомас ловъя на, туркъялӧ, а юрсӧ нин заводитӧма гӧтшкыны. Быд вуграсигӧн сылӧн сьӧрсьыс сов да нянь. Но, сідзкӧ тӧдан мый? Бурджык местаясас кутам сувтлыны вуграсьны, а ӧні ме тайӧ лёк коськсӧ кыснала. Кӧнкӧ тай миян ичӧтик кӧрзина вӧлі, сійӧс колӧ бокам ӧшӧдны.

Ваняк муніс ластаӧдыс коськ юрас, а ме пыжас пӧрадок лӧсьӧдны босьтчи — Роман Алексеевичлӧн сэні ставсӧ гугӧн бергӧдӧма.

Дыркодь Ваняк кыйсис, но со локтӧ, кӧрзина тырыс кыйӧма.

— Аддзылін? Нӧшта бурджыкинӧ кӧ сувтлам, ведраным миян и тырас.

Ӧтлаын бытшким черисӧ, солалім да йӧткысим водзлань. Изъю керкаӧдз нӧшта кык коськ эм, сэтчӧясӧ и позьӧ сувтлыны.

— Кӧзаыд оз-ӧ вись, Павел дядь? Мыйкӧ век куйлӧ и куйлӧ.

— А шонді водзас лунтыр, да жарыс, тыдалӧ, личкӧ. Сэсся рушкуувса восьсаинъяссӧ дзебӧ номъяссьыс. Бӧжыс кӧ вӧв кодь вӧлі, кӧть вӧтліс-а. Тайӧ нӧ бӧж али мый? Сійӧн сӧмын паргыны кужӧ, кор тёпкӧй кӧзаӧс аддзас. Том на ӧд, ӧтчыд сӧмын вайліс ай кӧза пи. Мишлы сеті, суседыслы. Мый тэ, шуӧ, ай кӧзаӧн вӧчан? Йӧв оз сет, яйыс дука, тэныд, шуӧ, нинӧмӧн жӧ лоас вердны, мед миян гидъяным быдмас. Ӧні ыджыд нин, быдлаӧ Мишсӧ вӧдитӧ. Тайӧ Сидӧрыс, висьталӧ, меным пон пыдди.

— Тӧда ме Сидӧрсӧ, коркӧ контораӧ Мишыскӧд пыраліс. Мужикъяс этша тешитчисны. Вомас йӧткисны ӧзтӧм папирос. Сэсся нёнясис-тшынасис мыйтакӧ дай сёйис папироссӧ. Серамыд сэні!

Воим керкааным коркӧ вой шӧрнас нин. Куимлаӧ вуграсьны сувтлім, да тырис ведраыс. Эз на тӧр ставыс, но кыйдӧсыс оз вош, сэтысь асывнас юква пуам. Керкаыс зэв на и лад вылын. Асьным жӧ, совхозсаяс, кыпӧдлім во вит сайын.

Керка пытшкӧссӧ шӧри юкӧма, баба войтырлы торъя жыр вӧчӧма. Плитаа пач эм, сійӧс дзоньталыштны ковмас, разьлыны плита горувсӧ да выль сёй вылӧ тэчны. Войдӧр восянь нин эг вӧв тані, а ёна олӧмны-вылӧмны да тшынӧдӧмны керкасӧ. Йиркыс да стенъясыс сьӧдӧсь. Картинаяс ӧшлӧмны, пасьтӧм бабаясӧс. Ӧти зэв тешкодь эм. Пидзӧсчань вылас сувтӧма заднас таланьӧ. Ачыс бабаыс бӧрӧ жӧ видзӧдӧ, кыдз тай мегыр пырыс кӧбыла юрсӧ бергӧдлӧ. Эг нин босьтав, мед ӧшалӧны. Воасны да, гашкӧ, татшӧм картинаыс содас. Ваняк пырис да вомсӧ паськӧдіс пасьтӧм бабаяс вылас.

— Да-а, — шуӧ, — Изъю йылӧдз сексыд воӧма. Этійӧ со бура жӧ нин лӧсьӧдчӧма, вывті бура. Мый шуан, Павел Модестович?

— А нинӧм татчӧ шуны, йӧз серам тайӧ, позор. Нетшыштны колӧ.

— Он лысьт. Эн тэ ӧшӧд, он тэ и нетшышт.

Но и мед, думайта, ми тані овны ог кутӧй. Ваняккӧд миян ыджыд палатка эм, совхозысь босьтім. Кык вон сэтчӧ кӧлалам, палаткаыс паськыд да тӧрас. Но тайӧс аски нин вӧчам, а ӧні ковмас керкаас шойччыштны асылӧдзыс. Музаӧс доми зорӧд пиньлань, мед йирсьӧ. Ваняк ректӧ пыжсьыс кӧлуй, горзӧ меным увсянь:

— Лок, бакъяссӧ новлам ёляс.

Нуим бакъяссӧ да чери ведрасӧ, вӧйтім кӧдзыд ваас. Вылысас чальяс шыблалім. Тані кӧть гожӧмбыд видз, оз шонав. Сэсся катлім олассӧ, нинӧм эг кольӧ пыж дорас. Ваняк шуӧ:

— Ок и лӧсьыд миянлы тані лоӧ. Курорт. Курыштам татысь турунтӧ, мед поводдяыс лоас-а. Да, Павел дядь? Аски ме видзьяссӧ гӧгӧрта, видзӧдла, уна-ӧ лӧпсӧ пыртӧма, а тэ пачнас ноксьышт, палаткасӧ сувтӧд, вонъяссӧ кӧлав.

— Есь, тӧварыш звенорг, вонъяс кӧлавны, а ӧні вай узьыштам. Шондіыс тай петан выйын нин.

Асывнас садьми да синмӧс на эг паськӧд, но горӧді:

— Ваняк, чеччы, гашкӧ, лун шӧр нин.

Шы ни тӧв. Киӧс нюжӧді, а местаыс сӧмын. Петі ывлаас. Ваняклӧн чай нин пузьӧма, юква дась. Ывла пызан вылас чериыс руалӧ тасьтіын.

— Талун, — шуӧ, — прогул тэныд, а аслым кык лун пасъя, сы вӧсна мый тэнсьыд уджтӧ вӧчи.

— Мыйла эн садьмӧд, Роман Алексеевич?

— Видзӧд, видзӧд, кыдз прогулӧдз делӧыс воис, дак Роман Алексеевич, а кыдз садьмӧдны: Ваняк, чеччы. Кылі ӧд. Пӧрысь мортӧс оз жӧ ков сэсся садьмӧдны. Тадзи кӧ быд асыв кутан узьны, Мишкӧд миян джын лунсӧ век ковмас тшыгйӧн уджавны. Кӧзатӧ лысьты да сёям.

Тадзи заводитчис первой асылыс миян. Сэсся уна асыв на волас. Ставыс ӧткодьӧсь, и ставыс сэтшӧм разнӧйӧсь. Ваняк ӧні босьтіс чер да пищальсӧ, сюйис зептас гортас на пӧжалӧм черинянь да муніс, воськовтіс кывтыд видзьясланьыс. Ме, шуӧ, гашкӧ и сёрмышта, а тэ вай тані мӧдейт. Мӧдей Паш кӧ нимыд.

Гожся луныд кузь — унатор вевъялан бергӧдны. Час-мӧд нокси пач гӧгӧрыс. Вевт вылас кайлі да тьӧссӧ лӧсьӧдышті. Палатка сувтӧді-паськӧді да вонъяссӧ кӧлалі. Музалы овны лэбув вӧчышті, сэтчӧ и доми сэсся, кузьджык дом йылӧ. Палатка ӧдзӧсӧдыс тыдалӧ выль гидйыс. Ош яя шыд пукті пуны плита вылас, пачсӧ ломті да. Ӧні оз тшынӧд. Пескыс эськӧ унаыс абу, но коді пондас овны керкаас, мед сійӧ и заптас. Миян аслыным колӧ пескыс сёянтӧ пуны. Тані кӧнкӧ вӧлі лучкӧвӧй пила, лоӧ корсьлыны. Чардакас, гашкӧ. Сэні и вӧлӧма, но ёна нин ныж, ковмас кеслыштны, напилӧкыс эм. Шыдыс пусигкості ме и кеслі пиласӧ.

Воддза воясас пӧшти керка дорсьыс сюрлісны на кос козъясыс, а ӧні тай пыдӧ нин колӧ пырны вӧрас. Пыдӧ и пыри эськӧ, а век на оз тыдавны. Аддзи ӧти коз, пӧрӧді, увйи, кражйӧ ытшлалі, мед быдсӧн лэччӧдны шедіс. Вежонсӧ тырмас, а сэні мыйкӧ бара думыштам. Кыдзи мамӧ шулывліс, ен да бур войтыр. Ваняк век на абу. Ме и пессӧ нин ставсӧ пекыльӧ пилиті, поткӧдлі да тэчи турыш горулас. Турышыс томана, а ключсӧ нӧ бригадирыс сетіс али эз Ваняклы? Турышас сэні став инструментыс: литовкаяс, куранъяс, лэбынъяс. Аски нин ставсӧ колӧ видзӧдлыны да мыйсюрӧ дзоньтавны, литовкаяссӧ дорны — менӧ сы вылӧ татчӧ мӧдӧдӧма, нӧшта Ваняклы, Мишлы да аслым, дерт и, пуны ковмас.

Ваняк абу и абу. Ӧти черинянь вылын лунтыр вермас шӧйтны. Ме кӧть мыйкӧ тшавкӧдчи нин. Ёляс лэччылі да ӧти ком кыпӧді ведрасьыс, сёйи, но ош яя шыд тыра пӧртыс век дум вылам. Ӧтнам ог пажнайт.

Но воис жӧ тай со. Лэдзис ружьесӧ пельпом сайсьыс, черсӧ сатшкис керка пельӧсас.

— Но, — юалӧ, — мый нин олін-вылін-мӧдейтін тані?

— А мый. Ошйысьны быттьӧ и нинӧмӧн, а мытш эг на петлы. Кутшӧм нин туруныс?

— Кӧнкӧ эм, кӧнкӧ жеб. Гӧп доръяссьыс ковмас чукӧртны да вутшъяс вывсьыс. Шыльыдінъяссьыс нинӧм куравны, косьтӧма. Мӧдлапӧвсӧ аски нин видзӧдла. Лӧптыс эськӧ вывті абу, но медбӧръя кулигаас вайӧдӧма — луныс сэтчӧ и коли. Ме нин думышті, мися, эновта сійӧ видзторсӧ, чӧрту, да жаль лои — туруныс вӧр дорас зэв мича быдмӧма. Шыд тай пуӧмыд, дукыс кылӧ.

— Но тэнад и нырис. Увт, кылӧ кӧ. Часлы ме пӧртсӧ ӧгыр вылас пуктыла, мед пымалас. Кывзы, а турышсӧ колӧ восьтны, видзӧдлыны инструментсӧ.

— Ключыс ӧд зептам, на, видзӧдлы.

Ставыс эськӧ эм, но куранъясас кык-куим пиньӧн оз тырмав. Аски меным лунтыр кежлӧ удж, нӧшта литовкаяссӧ кӧ дорны дась вылысь. Вӧчны нин ставсӧ, да сэсся мед и прӧстджыкӧсь лоам вотӧдзныс. Миш сійӧ аскомысь воас вӧвъяснас, но служащӧй чукӧрыс кор петкӧдчас со этійӧ нӧрыс сайсьыс?

Сёйны пуксим. Шыдыс тасьтіас оз руав да Ваняк шуӧ, кӧдзыд пӧ шыдыд, а эськӧ сылыс оз лэдз руыслы петны. Паньыштіс сэсся да шыдсӧ бӧр лэдзис вомсьыс.

— Ой-ой, — шуӧ, — пӧсь тай вӧлӧма. Перечавны колӧ бурджыка да кос няньсӧ чирйыны. Во-во, тайӧ добра лоас... Рытыввылыс тай мыйкӧ вежис нин син-пельсӧ, абу-ӧ зэрыштны думыс? Мед эськӧ — нинӧм на ӧд лёкыс абу, зэрыштас кӧ.

Рытгорувсӧ збыль зэрмис, йӧртіс миянӧс керкаас. Пачсӧ ломтылі, да жарыс номсӧ личкӧма, нар улас вӧтлӧма. Сэні тай кылӧны. Нар вылад, дерт, лӧсьыд куйлыны, кор ывлаас зэрӧ, да рушкуыд абу тыртӧм.

— Войдӧр во, пенсия вылам петтӧдз, медбӧръя гожӧм тані страдуйті, нёльӧн олім тайӧ керкаас. Прокопей бӧрын зэрмис да Илля лунӧдз кисьтіс, эг и петалӧй керкасьыс. Сӧмын песла да ас нуждаӧн. Як Митрейлӧн детинаыс микӧд страдуйтіс, буретш армияысь вӧлі воӧма. Ӧтнас куритчысь морт, а табакыс вӧлі бырӧма. Папироссӧ эськӧ и корис жӧ Поповыскӧд, коді няньысла муніс, но кор на сійӧ воас. Быд чигарка пом керка пытшсьыс ӧктіс. Но и збетьӧ воис мортыс, места эз кут аддзыны, стенас кӧть каяс. Видзӧдам: йӧйман выйын зонмыс, жаль лои быдӧн, но мыйӧн отсалан. Вань, пӧсӧлным, эз во. Век зэрӧ да, гашкӧ, оз и вӧрзьы гортсьыс, кытчӧдз оз коб. Сэки уси меным дум вылӧ Мамонтовыслӧн керкаыс. Быдӧн сэтчӧ оз куж мунны, а юӧдыс пыжӧн он во, пӧрӧма вӧрыс ёна. Юыс сійӧ таысь катыдӧ усьӧ. Сэні, керкаас, табакыд, гашкӧ, и эм. Мамонтов — куритчысь морт, табак запастӧг оз ов. Кыдз нин шуӧны Як Митрейлысь детинасӧ, вунӧді?

— Эрик, — шуӧ Ваняк, — Ухтаын олӧ.

— Эрик и эм. Да, да, Эрик. Но вот. Висьталі тай йӧйыд та йылысь, менӧ тшӧтш збетьӧ воштіс. Ветлы дай ставыс, шуӧ. Ме, мися, некытчӧ ог мун татшӧма зэригӧн, кӧтасьӧм кӧ колӧ, верма и Изъюас лэччывны да шыбитчывны ваас паськӧмӧн. Тэнсьыд ӧд, шуа, пельястӧ сотӧ, ачыд и ветлы. Ме висьтала, кыдзи муннысӧ. Вуджӧда мӧдлапӧлас да петкӧдла туйсӧ. Он вош, бӧра-водза кык час кольӧ. Сӧгласитчис. Ми сетім сылы койюра плаш, ружье, пуляа патронъяс. Ачыс корис пищальсӧ, вермас пӧ и ош тэсны. Вермас, шуим, сы бурыд тані эм. Вуджӧді. Бура ылӧдз на мунім видз вывті, а сэсся пыртӧді вӧрас, кӧні Мамонтовъяслӧн талляыс заводитчӧ. Шуи, видзӧд туйсӧ, кытісюрӧ вошласьӧ, но сэті пуяссӧ лӧсӧма. Бӧрӧсӧ кор воан, горзы, ме вуджала тэла.

...Но вот. Кык час колис, куим колис, а Эрик век абу. Сьӧлӧм кутіс доймыны. Ысті тай, мися, кытчӧкӧ лёк мортӧс, ветлыны али мый ковмас? Миш сійӧ нинӧм оз кыв, книга зунньӧ, сьӧрсьыс вайӧма да. Мися, мый пондам вӧчны? А ветлы, шуӧ, ветлы керкаӧдзыс, зэрыс тай, тыдалӧ, лӧньыштӧма. Лӧньыштӧма пӧ. Вӧрас ӧні зэртӧг кӧтасян, кос места оз коль. Мӧд плащ на эм, Мишлӧн, сійӧ ковмас пасьтавлыны. Мӧдӧдчи Эрикӧс корсьны. Керкаас на вотӧдз нырам тшын дук вартіс. Видзӧда: ломтысьӧ и эм пачыс, трубасьыс тшын пуркйӧ. Пыри. Пызан вылас тыртӧм водка доз, тушонка банка восьтӧма. Ачыс Эрик гатшӧн унмовсьӧма нар вылас. Ме пыр дӧгадитчи, кытысь водкаыс да тушонкаыс. Турышсьыс, кытысь сэсся. Котӧрӧн сэтчӧ. Восьса турышыс, прӧбояс пуляӧн лыйӧма. Скӧтина али абу тайӧ мортыс сэсся? Пыралі пытшкас, а сэні водкаыс ещӧ на кык доз. Палялас, юрыс пондас висьны, дай тайӧс на юас. Гырысь кӧрт тувъясӧн ме бӧр тувъялі прӧбойсӧ, ставсӧ, мыйӧн позьӧ жугӧдны томансӧ, дзеби. Ружьесӧ да патронъяссӧ босьті сьӧрсьым, бӧр лэччи. Мишлы висьталі да оз верит. Дугды, шуӧ, том морт татшӧмтор эз жӧ вӧч. Асывнас воис Эрикыс. Кобӧма нин вӧлі, да Миш петіс ытшкыны. Вай, пиӧ, шуи Эрикыслы, ташкатӧ чукӧрт да лэччы гортад, тані тэныд нинӧм вӧчны. Мамонтов дядьыскӧд батя-пиа асьныд сёрнитӧй. Мун, мед дукыд тані эз вӧв. Сы пыдди сэсся Вань ассьыс детинкасӧ вайӧдіс, ӧти вӧв вылын воисны.

— Ме эськӧ, — шуӧ Ваняк, — Эриксӧ турышас томналі, да мед сэні гожйис кык сулея дорас.

Сэсся и миян кобис. Шонді петіс, дай ми петім керкасьыс. Татшӧм зэрыштӧмыс быдмысь туруныслы зэв лӧсялӧ. Абу на ӧд вывті сёр, вежон на эм Иван лунӧдз, быдмас туруныс.

Аскинас бара лунтыр ноксим Ваняккӧд. Мӧдлапӧлас ӧні нин кыкӧн вуджалім видзьяссӧ весавны, а ме сэсся литовкаяссӧ дори, куранъяссӧ дзоньталі. А Ваняк пинь-пыкӧд керавліс. Ӧтлаын сэсся и кыскалім керка дорӧдзыс. Кытчӧ ковмас, татысь позьӧ и вӧвнас нуӧдны. Ужнайтны пуксим да звеноргыд меным и шуӧ:

— Уна удж бергӧдім тайӧ кык луннас, Павел дядь. Позьӧ и этійӧн чайыскӧд мудз вештыны.

— Позьӧ, позьӧ, коді нӧ мый шуас. Аслад, абу гуӧмтор... Эрик моз тай сулеяӧн он клопайт. Часлы, ме ёляс лэччыла, комсӧ видлам, солассис эз.

— Мун, лэччыв, зэв бур закуска лоас, а рытгорувсӧ свежӧйӧс кыям. Тэныд тожӧ колӧ вугыр шатин лӧсьӧдны.

Ваняк меным мырдӧн кисьтіс водкасӧ чаям.

— Ю, — шуӧ, — нинӧм лёксӧ оз вӧч этшаникыс. Виртӧ ӧдӧбтас, юртӧ югзьӧдас, кывтӧ вӧрзьӧдас. А рытыс кутшӧм! Комыс со тай вӧрзис нин кывтыдас, лэччылам сэсся дай.

Эг на виччысьӧй, но аскинас Миш воис нин. Кык вӧлӧн кыскӧма ытшкан машина, сёян-юансӧ машинаас домалӧма мешӧкъясӧ.

— Локтӧмыд менам локтӧм на вӧлі. Нюрыс таво ва. Машинаыс вӧйӧ, вӧвъяс вӧйӧны. Понӧльяссӧ сэсся вомӧн шыблалі, да найӧ мездісны.

Ачыс Мишыс нёрпалӧ — даръясьӧма мӧдӧдчигас.

— Кузнеч Сандыркӧд топыда зэлӧдлім, кык лун суллялім, да гӧтырӧй сэсся вӧтлӧмӧн вӧтліс гортысь. Мун пӧ нин менам син водзысь. Ӧні со жайӧдӧ, ни ӧти ог вермӧдчы. Папироссӧ ӧзтыла да ӧтчыд и кыскышта сӧмын — нутрӧӧс кыдз песовтас, бӧрӧ ковмас сьӧвзьыны.

— Нинӧм, — шуӧ Ваняк.— Видзьясыс пальӧдасны, баба дорад кӧ эн вермы тайӧс вӧчны. Вывті кӧ висян, ковмас исӧдыштны. Аддза нин, синмыд буби кодь.

— Ок, Роман Алексеевич, эм кӧ, кисьтышт вай.

— Часлы, сёйны кутам. Павел дядьлӧн, гашкӧ, яйыс пусис нин.

— Менам ставыс дась, — шуи.— Верманныд пажнайтны.

Сэсся Мишлӧн понйыс воис. Кӧнкӧ келалӧма да ставнас няйт. Тыдалӧ, ты доръяссӧ нин видзӧдлӧма.

— А тайӧс мыйла вайӧдін? — юалӧ Ваняк.— Мед чӧж пиянсӧ джагӧдлас али мый? Келавны кутас — дом.

— Керкаӧ кольлі мӧдӧдчигӧн, а, буракӧ, гӧтырӧй лэдзӧма, верднысӧ дыш да.

— Тані ӧд сійӧс тожӧ колӧ вердны — лишнӧй вом. Павел дядь кӧть со кӧзасӧ вайӧдіс, но ӧд кӧрымыс сылы пельӧдзыс быдмӧма, а тэ мыйӧн кутан вердны понтӧ?

— Юксям, мый эм. Пон тшыглы оз кув.

Сёйны пуксим, да Мишлӧн паньыс некыдз вом дорӧдзыс оз во, кӧть эськӧ воропас кыкнан кинас нин кутчысьӧма.

— Но на, на, — шуӧ Ваняк да кисьтӧ кружкаас джынйӧдзыс кымын.— Тяпнит да эн дзӧр.

Миш вайӧдіс кружкасӧ вом дорас, а пиньясыс кружка дорланьыс сяргӧны. Юис лёкӧн-шогӧн.

— Мед жӧ эськӧ примитас, — шуӧ.— Сэки ловзя.

— Пукты мыйкӧ вомад. Со тай сола чери эм.

Сідз кӧ сёрнитны, Мишӧс оз первойысь нин тадзисӧ пыркӧд. Тӧлысьнас ӧтчыд, а юсьылас мортыс. Сьӧкыд асывъясӧ ме дорӧ пыравлас, да эм кӧ менам, мыччывла. На дорӧ ме петавла жӧ кутшӧмсюрӧ могӧн, да Миш некор оз ӧткажитлы. Бур менам суседыс, а уджавнысӧ вывті жлеч — ош моз бергӧдлас ставсӧ.

Миш ловзис да морт моз кутіс панясьны. Со ӧд сійӧ кутшӧма лӧсялӧ, кор ас кадӧ мыччан-ловзьӧдан.

— Ті тай, — шуӧ, — яяӧсь. Менам баля яйтор эм жӧ, солыштӧмӧн вайи. Сэсся ӧд, гашкӧ, черисӧ рытъяснас кыям. Чай-сакар эм, а няньыс бырас инӧ, кодлыкӧ лэччывны позяс.

— Сідзтӧ сідз, — шуӧ Ваняк.— Аски, гашкӧ, ытшкыны видлам? Код тӧдас, тайӧяс воласны ли оз.

— Видлам кӧ и видлам. Мыйкӧ нин курыштам гожӧмбыднад, еджыд гутъясӧдзыс кӧ тані овны.

Татчӧ сэсся ме сюйси:

— Кыдз оз воны, кӧсйысьӧмны кӧ. Со этійӧ нӧрыс сайсьыс лун куим-нёль мысти петкӧдчасны пыжаясыс.

Мишлӧн Тузӧыс кӧза вылас тявгӧ, а мӧдыс сюр пӧвсӧ паныд мыччылас, дорйысьӧ. Колӧ кытыськӧ посниджык турун корсьны, коръя турун да ветлыны ытшкыны. Миш пырис керкаас шойччыштны, но первой корис Ваняклысь кружкаас нӧшта, мед пӧ нин дзикӧдз бур лоас. Вӧвъяс йирсьӧны берегдорса пыреяс — тайӧ туруныс налы кампет кодь: юмов, сӧка. Азыма сёйӧны ӧти местаын, сӧмын бӧжныс шлачкӧ, лӧдз-номсьыс шенасьӧны.

Рытгорув Изъюас пондіс комыс ворсны-тёльскыны.

— Часлы, ме налы мушка шыбитла, — шуис Ваняк да келіс коськас. Керка весьтӧдыс зэв визув, весиг меӧдз кылӧ, кыдзи ваыс ӧдӧбӧн локтӧ Ваняклы сапӧгъясас. Жеб мортӧс кӧ, ме коддьӧмсӧ, вермас и кок йывсьыд пӧрӧдны.

Лӧнь, тӧвру абу, да весиг татчӧдз локтӧны болгаръяслӧн вӧр пӧрӧдан шыясыс. Абу нин ылынӧсь. Во-мӧд мысти писькӧдчасны татчӧдз да виасны пармасьыс нӧшта ӧти ю. Сэки оз нин понды чериыс тёльскӧдчыны, кыдзи талун. Ставсӧ ӧктасны импортнӧй спиннингъясӧн, а налы пом пуктысь абу. Став мунымӧс рӧзӧритісны, вӧр-ваыс пакталіс. Болгаръяс, дерт, абу мыжаӧсь, а найӧ, кодъяс вӧлясӧ сетісны лёк ног келавны миян парматі да юясті...

— Миянлы тырмас юква вылӧ, — шуис Ваняк, кор кайис берегсьыс.— Нинӧм горшасьны, сола чериыс эм на. А эськӧ кыйны и колӧ да, сьӧд йӧзыс воасны, да нинӧм юас оз коль.

Рытнас дыр пукалім бипур дорын, баитім. Юквасӧ сёйны чуксалім Мишӧс.

— Кыдзи узьсис? — юалӧ Ваняк.

— Эн нин сёрнит. Быдторсӧ вӧталі: быд гагйыс вылам кайӧ. Шома юрыд петкӧдлас узигад, мый и думайтны он куж.

— Лок, юква сёям. Колӧкӧ, и сё грамм кисьта сы дорӧ.

— А мый ог, юа кӧ-а...

Ваняк быдӧнлы этшаникӧн кисьталіс, меным тшӧтш жӧ.

— Павел дядьӧс пыртам пайӧ, коркӧ, гашкӧ, ассьыс дозсӧ перъяс. Сылӧн пӧ эм, висьталіс меным.

— Ме бара-й та йылысь тэныд нинӧм эг висьтавлы, но дозйыс эм, ог соссьы. Коркӧ вывті мудзанныд да сэки.

Рытыс кутшӧм! А вӧр-ваыс гӧгӧр! Не кӧ номйыс, веськыда позьӧ райӧн шуны. Бипур тшын дорас номйыс озджык лок, да зэв лӧсьыд тані пукавны. Шондіыс эськӧ абу на лэччӧма, но оз нин тыдав, кымӧр сайӧ дзебсьӧма-сайӧдчӧма.

— Бара али мый аски зэрас? Шондіыс тай со дзебӧ лэччӧмсӧ кымӧр сайӧ.

— Гашкӧ, зэрас, гашкӧ, оз, — шуӧ Миш.— Быд раз тайӧ приметаыс оз збыльмыв. Но со кутшӧм лӧнь, и номйыс петіс вывті уна, и рытыввылыс кымрасьӧ, войнас на зэрмас, аскиӧдз оз ков виччысьны. Ме эськӧ абу ёна тӧдысь да... Кольӧм гожӧмӧ горт дор звеноын уджаліс миянкӧд Ӧльӧш. Со коді тӧдысь мортыс! Локтам, асылыс зэв мича, шондіа, некӧн весиг кымӧр чир абу. Турун косьмӧма. Зэв зіля куртам-чӧвтам, а Ӧльӧш нӧшта на тэрмӧдлӧ: «Мужикъяс, тэрмасьӧй, пажын бӧрас зэрмас». Да тэ нӧ мый, шуам, зэрыс весиг некӧн оз нимав. А менам, шуӧ, нырӧй кылӧ зэрсӧ. И збыль, пажнайтны пуксим, видзӧдам, а рытыввылас сьӧдасьӧма. Звеноргыс шуӧ, вайӧ пӧ нӧрӧвитыштамӧй пажыннас. Юръяссӧ, мый чукӧртӧма, колӧ зорӧдас тэчны. Сӧмын эштӧдчим, и усисны медводдза войтъясыс. А сэсся ведраысь моз кыдз ылькнитіс. Ӧльӧшыдлӧн нырыс кылӧ зэрсӧ.

— А ме помнита, — висьталӧ Ваняк, — сикткывтыдса ластаяс вылас уджалім. Туруныс сэні эськӧ век бур быдмӧ, но сійӧ гожӧмӧ вӧлі морӧсӧдз да сэтшӧм сук, мый сӧтан да литовкаыд джӧмдылӧ. Мый вынсьыд колӧ ӧлтыштны да ичӧтика босьтны. Асьныд тӧданныд — ытшкан машинаӧн сэні некыті бергавны. Лёкӧн-шогӧн бура кузь ласта пӧрӧдім-водтӧдім да некыдз косьтынысӧ ог вермӧй. Муртса на лун шӧр воас, сідзи и зэрмӧ. Сісьмас туруныс, думайтам. Ӧтчыд сэсся эз зэр, туруныс пондіс косьмыны. Шондіа, дай тӧвру на пӧльыштлас — мый сэсся сылы колӧ. Аскинас пажын бӧрын локтім да вӧрзьӧдлім турунсӧ, бергӧдлім лапӧдъяссӧ. Сы мындасӧ ӧд колӧ кыдзкӧ косьтыны. Сэсся бара на вӧрзьӧдлім да лун мысти локтім куртны. Унаӧн локтім, морт дас кӧ вӧлі-а. Оз позь шуны, мый туруныс бура косьмӧма, но вӧсньыдикатӧ позьӧ чӧвтны. Зорӧдас сэсся мед тӧлалас. Сӧмын панім ӧти зорӧд, меным ныр вылам войтыштіс. Кыпӧдлі юрӧс, а ми весьтӧ кымӧр локтӧма. Ыж ку пасьта и эм, но сы мында ва сэтысь киссис! Гӧгӧр шондіа, а ми весьтын зэрӧ. Кымӧр муніс. Но мед, гашкӧ, эз ёна кӧтась туруныс да косьмас на, виччысьлам. Пукалам берег дорас, чай юам. Кодкӧ горӧдіс: «Видзӧдлӧй, видзӧдлӧй, миян кымӧрным бӧр косӧма да бара нин ми весьтын». Веританныд онӧй, сійӧ жӧ кымӧрыс, сӧмын тӧвсьыс ли мыйысь неуна вежсьыштӧма. Бара кисьтіс-кисьтіс, да миянлы ковмис гортӧ веськӧдчыны. Бригадирлы висьталім, мый сідз и сідз, бара турунсӧ кӧтӧдіс, нинӧм эз артмы. Да ті нӧ мый, шуӧ, некӧн весиг кымӧртор эз вӧв. Аскинас мунім да увйӧсь пиньяс вылӧ шӧтім туруннымӧс.

Войнас менӧ садьмӧдіс зэрыс, коді сідз и сявкӧдӧ палатка вылас. Ме зэв ёна радейта зэрсӧ, кор вонйын ли сарайын узя. Гымалӧм радейта и. Таысь лӧсьыдджык шыяссӧ сэсся ме ог тӧд. Первой садьмылан да кывзысьыштан тайӧ шыясас, а сэсся он и тӧдлы, кыдз бара нин унмовсьӧмыд. Ӧні сідз жӧ. Куйлышті, кывзышті ассьым радейтана музыкаӧс, а синмӧй куньсьӧ и куньсьӧ.

Асывнас медводз кӧсйи чеччыны. Петі палаткасьыс, а Миш нин кылӧ вӧвъяс дорас. Ме ведра босьті да лэччи жӧ вала.

— Водз олан, сусед, — шуи.

— А мый, оз жӧ узьсьы-а... Тэнад пусигкості куим-ӧ-нёльысь вевъяла гӧгӧртны керкадор видзсӧ. Зэрӧма тай войнас, да ӧні туруныс небыд.

— Но, но, кытшовт, а ми сэсся бадь доръяссӧ ытшкам.

Тадзи миян страдаыс заводитчис. Менам татшӧмыс вӧлі уна, а Ваняклы тайӧ гожӧмыс лоис, гашкӧ, медся на шудаӧн.

Керкадор виддзыс, коді тані медпаськыд, Мишлӧн кык лунӧн и пӧрис, а ми Ваняккӧд бадь доръяссӧ ытшкалім. Ӧти рытӧ пукалам, думайтам, мый вӧчны — водзӧ ытшкыны али нӧрӧвитыштлыны. Ваняк шуӧ, ытшкыны пӧ колӧ, а кор косьмас первой лунся ытшкӧмыс, куимнаннымлы куртны заводитны. Помечыс, шуӧ, гашкӧ, оз и волы да, мый виччысьнысӧ. Ме мыйлакӧ бергӧдчылі кывтчӧс да аддзи пыжаяссӧ.

— Со, локтӧ помечным, шыбитлӧй картузъястӧ вывлань.

Ваняк дыр видзӧдіс да шуӧ:

— Пыж модаясыс тай быттьӧкӧ асланым-а...

— Дерт, асланым, — шуӧ Миш.— Водз пыжас тай бӧжалысьыс Вась Ӧльӧш, сылӧн йӧткасян ногыс. Мӧд пыжас ачыс бригадирыс бӧжалӧ, Митрой Гень. Чужӧй морт ӧмӧй юӧд вермас ветлӧдлыны? Ныръясас мужикъяс жӧ тай быттьӧ-а, лёкиника йӧткасьӧны.

— Тэнад, Михаил, ёсь синмыд. Ноко, видзӧдлы, кодъяс пыж шӧрас, —тшӧктӧ Ваняк.

— Бабаяс, кодъяс сэсся. Ӧтиас кыкӧн, мӧдас ӧтнас ӧчкиа кодкӧ.

Керка горув коськсӧ бура дыр катісны. Вась Ӧльӧш матькӧ пыж нырса вылас. Кӧнкӧ, лыдтӧм-тшӧттӧм мать лэдзис катігчӧжыс. Бабаяс, кылӧ, сералӧны. Митрой Гень пыжас ӧтиыс дзик пасьтӧм, не лыддьыны кӧ плавкисӧ да липсӧ. Ваняк шуӧ, диклопосӧн пӧ али мый асьсӧ пызйӧма. Тшукисны, да пасьтӧмыс гачасис, ковтаасис. Мыйкӧ уна жӧ ректісны пыжъяссьыс, тыдалӧ, абу куш киӧн воӧмны. Дерт, найӧ яй банкатӧг эз локны, куш прикадельки вылад уна-ӧ курасян. Митрей Гень горзӧ увсянь: «Роман Алексеевич, чайтӧ пузьӧд, миян колӧ бӧр чужйысьны!» Кайис Вась Ӧльӧш, да Ваняк юалӧ сылысь:

— Мый нӧ шумитан пыж нырса ёртыд вылӧ? Эн на весиг тыдалӧй, мег саяс вӧлінныд, а матькӧмтӧ кылім нин.

— А! Кык вуз помалӧма, педагогическӧй да ВПШ, а пыжын йӧткасьны оз куж. Тыдалӧ, сӧмын сы вылӧ и велӧдчылӧма, мед йӧзыслы сітанас йӧткавны... да горзыны «давай, давай». Райкомын инструкторӧн уджалӧ, а овыс Кокосов. Ачыд тӧдмасян.

— А мӧдыс коді? Геньыслӧн коді вӧлі пыж нырас?

— Мосев. Ним-вичсӧ ог тӧд, а сідзсӧ лабутнӧй морт. Ог тӧд эськӧ да... Бабаяс дорас тай кочӧг жӧ, кодӧскӧ век видзӧдӧ малыштны. Кӧнкӧ сэні жӧ партейнӧй системаас кадсӧ коллялӧ. Ме ӧд ёнасӧ эг и юась.

Сэсся Кокосовыс кайис, нинӧм сьӧрсьыс эз кватит. Дзик куш киӧн кайис, но мукӧдыслы тшӧктіс кыпӧдны олассӧ керкаас.

— Коді старшӧйыс? — юалӧ.

— Ме, — шуӧ Ваняк.— А ті коді сэтшӧмыс?

— Райкомса инструктор Кокосов Владислав Владимирович. Аддзи, ытшкӧмныд нин бура паськыд видз, аски позьӧ куртны заводитны.

— Кор куртны, кор ытшкыны, тӧдӧмысь, миянлы тыдалӧджык, а ті ассьыныд партейнӧй делӧястӧ бергӧдлӧй. Да, гашкӧ, тшӧтш и уджыштны ковмас, мыйкӧ кужанныд кӧ вӧчны.

— Рытнас восьса партийнӧй собрание чукӧртлам. Мог сувтӧдам коллектив водзас общественнӧй скӧтлы кӧрым заптӧм кузя. Тӧдмӧдам партиялӧн перестройка политикаӧн.

— Миян пӧвстын коммунистъяс абуӧсь, — шуӧ Ваняк.— А ті ас котырнад кӧть мый сэсся вӧчӧй, эз кӧ нин дыш босьт больгынысӧ. Собрание пыддиыс бурджык песла кайлӧй артельӧн. Тіянлы сійӧс некоді оз запты. Со Павел Модестович петкӧдлас кӧні.

Кокосов пырис керкасӧ видзӧдлыны, кытісянь кыліс бабаяслӧн гигзьӧм шыыс. Пыраліс да бӧрсӧ петіс пуля моз.

— Тайӧ ті ӧшлінныд картинаяссӧ?

— Мыйла нӧ ми? Кодъяскӧ, тыдалӧ, олӧмны тані бабаястӧг. Тіянлы, дерт, на серти бурджык лоас.

— Эн лысьт тадзи сёрнитны, ми ставӧн семейнӧй войтыр.

Ваняк, кӧнкӧ, думыштіс ас кежсьыс, видзӧдлам пӧ, но шуны нинӧм эз шу.

— А этійӧ нӧ зверыс мыйла тані?— аддзис кӧзасӧ Кокосов, — да ещӧ и сюр пӧла.

Татчӧ сэсся ме кывлыси:

— Мый нӧ сюр пӧла кӧ? Йӧвсӧ ӧд ог сюръяссьыс лысьтӧй. Нёньясыс мед ставыс вӧліны-а...

Ваняк серӧктіс, а Кокосов ӧлыштіс кинас да бӧр керкаас пырис.

— А кӧні миян Мишыс узьлыны пондас?— юалі ме Ваняклысь.

— Керкаас, кӧні сэсся. Мужикъяс дорас куимӧн тӧран, но бабаясыслы лоас дзескыд.

— Ладмӧдчасны колӧкӧ.

Сэсся ме тайӧясӧс песла нуӧдлі. Асьныс пилитісны, асьныс лэччӧдісны. Ӧчкиа нывкаыс тай коді, Людаӧн шуӧны. Гашкӧ, томиник на, да сы вӧсна жебӧн кажитчӧ. Ставӧн нин мунісны, а сылы колисны йыв кражсӧ. Шуи Людалы, мися, бур ныв, вай тэ пила-черсӧ лэччӧд, а тайӧ кражйыс меным шедас на. Мунігмоз сёрниӧ воим.

— Кыдзи нӧ тэ тайӧяс дорӧ веськалін? — юалі.

— А ме орсын уджала товароведӧн, да мӧдӧдісны тай. Кодлыкӧ ӧд колӧ...

— Дерт, колӧ... совхозлӧн быдлаӧ выныс оз судзсьы. Ме тай со пензия вылын да локті. Верӧс сайын нин, гашкӧ?

— Эг на вевъяв, ме техникум бӧрын на сӧмын.

Рытгорувсӧ Кокосов збыльысь чукӧртіс собраниесӧ. Миянӧс тшӧтш корис пыравны. Ваняк шуӧ:

— Миянлы эськӧ и дзик нинӧмла сэні лоны, но йӧзыскӧд колӧ тӧдмасьны да ним-овъяссӧ пасйыны тетрадьӧ, мед табельсӧ нуӧдны. Пыралам нинӧм вӧчӧмысь.

Картинаяссӧ абу нетшкӧмны, а Кокосовыс буретш сэтчӧ сувтӧма, кӧні картина вылас нывбабаыс быньгӧдӧма куш задсӧ. Инструктор висьтасьӧ партиялӧн политика йылысь. Ме видзӧді-видзӧді да эг вермы серамӧс кутны, чепӧсйи ывлаас.

Сёр рыт нин, а некоді на узьысь абу, керкаын ни палаткаын. Керкаас гажӧдчӧны. Люда пукалӧ бипур дорын, бура дыр нин пукалӧ, шуӧ, дыш пӧ меным на дорӧ.

— А узьнысӧ сэні куимнас тӧранныд? — юалӧ Ваняк.

— Тӧрӧдчынысӧ, гашкӧ, и позьӧ, но найӧ телӧаӧсь да менӧ стенланьыс топӧдасны. Сэсся ном дӧсадитчыны пондас. Кӧнкӧ кӧ эм дзизгысь, ме нин узьны ог вермы.

— Павел дядь, — шыӧдчӧ ме дорӧ Ваняк, — тэнад вонйыд паськыд, а ми тэкӧд векниӧсь, тӧрам кыкӧн. Ме вонйын мед Людаыс узьлӧ.

— Ме пайысь, — шуи.— Узьлы мекӧд, он кӧ брезгуйт, а Людалы сэні ӧтнасӧн зэв бур лоас.

Людалӧн вирыс кайис чужӧмбанас. Код тӧдас, мый ӧні думыштіс. Гашкӧ, сійӧ, мый быттьӧ и абу лӧсьыд йӧз вонйын узьлыны, а мӧдарӧ кӧ, мыніс мустӧм йӧз дорысь. Он ӧд тӧд, кутшӧмӧсь на дядьӧясыс, войнас, гашкӧ, вылад пондасны кавшасьны.

Ме ог жӧ куж висьтавны, мый думыштіс Ваняк тайӧ здукас. Гашкӧ, нывкаыс сьӧлӧм вылас воис да кӧсйӧ декнитчывны бурджык здукӧ. Орччӧнӧсь ӧд. Вермас лоны и сідз, мый аддзис нин Людаын ассьыс гӧтырпусӧ. Тадз кӧ, зэв эськӧ бур. Сэки на верма и отсыштны Ваняклы, мый вылӧ сямӧй тырмас. Абу лёк мужик — тэчаснас кӧть, сямнас кӧть.

Миш век на абу, ытшкӧ. Но и мужик — сетлӧма тай сьӧлӧм уджавнысӧ. Мед кӧть нин вӧвъяссӧ шойччӧдіс. Тайӧ кадас ытшкысьнытӧ, дерт, лӧсьыд. Абу жар, абу лӧддзӧсь. Югыд, да тыдалӧ. Миш вермас и луннас шойччыштны. Ваняк сола комсӧ вайис Людалы, медгырысь ловъяссӧ бӧрйӧма.

— Ой, — шуӧ мӧдыс, — сё во нин эг сёйлы, а сэтшӧма радейта. Бать кор ловъя вӧлі, вердліс на, а ӧні сэсся некодлы кыйнысӧ.

— Чери кыйысь сайӧ пет да сылысь и видзӧд, — шуи ме да бергӧдчылі Ваняклань.

Некоднанныс кыв эз шуны, а Ваняк чеччис места вывсьыс. Часлы, шуӧ, ме Миш дорас воськовтла, видзӧдла. Людакӧд ми кыкӧн колим бипур дорас.

— Кайлім тіян сиктӧ, — шуӧ, — да сэтшӧма сійӧ меным кажитчис. Ю дорын, дорӧсыс изъя, сиктыс сӧстӧм, понъяс дом йылынӧсь, веськыда сиктас баляяс йирсьӧны. Мойд, сэсся нинӧм. Ме ачым сиктын жӧ чужи-быдми, да меным сэтшӧм любӧ. И со этійӧ джынвыйӧ саймовтчӧм шондіыс, и юыс кок уланым, и страдаыс, коді менӧ виччысьӧ. А нӧшта кӧ на вонйын кута узьлыны... да мед коркӧ войнас садьмӧдчывны да кывзысьыштны вӧр-ва тіпкӧмас, сылӧн лов шыас...

— Тэ тай, бур ныв, зэв мичаа кужан сёрнитны. Ме эськӧ кыла жӧ ас ногӧн вӧр-ваыслысь лов шысӧ, но тадзисӧ шуны ог куж. Тані быд гожӧм страдуйті пенсия вылӧ петтӧдз, да став мичыс меным быттьӧ и веськодь нин, а кувны понда, да сійӧ медся на жаль коляс. Либӧ Роман Алексеевичнымӧс босьтам. Вӧр-ваыслысь мичсӧ сы кодь гӧгӧрвоысьыс этша. Музалы сюр вылас бобув пуксис... Шензис да шензис. Сё дивӧ пӧ, татшӧмторсӧ некор на эг аддзыв. Таво миян тӧлка звенорг слӧймис. Дерт, абу звеноргын делӧыс, а сідз тӧлка морт. Кыйны-овны кӧть, уджавны кӧть. Мусӧ и васӧ бергӧдлас. Оз ю. Став шудыс сылӧн вӧр-ваыс да уджыс и эм, да прӧст кадас газет-журнал лыддьӧ. Кад нин эськӧ гӧтрасьнысӧ, но миян сиктын Роман Алексеевичлы абу пӧлыс. Том нывъяснад ми гӧля олам.

— Но, ме муна узьны, Павел дядь, гашкӧ, миян звеноргным водз чеччӧдас. Ог кӧсйы ассьым ныв унмӧс джынъявны.

— Мун, мун, бур ныв, бажук, шойччы да мед тэныд вӧтӧн петкӧдчылас, кодӧс тэ радейтан. А висьтав, кодӧскӧ радейтлін-ӧ?

— Павел дядь, вой улӧ тайӧ вывті сьӧкыд сёрни. Бура узьны тіян.

Ваняк да Миш локтӧны, гораа варовитӧны. Найӧ ӧні чай юны на пондасны. Керкаас тай ланьтісны, водісны, гашкӧ. Бипур весьтас чайник ӧшӧді. Важыс на кольӧма да мед пымалас. Миш, дерт, тшыг, но шыдыс эм на, пӧсь и.

— Дыр уджалан, косар, — шуи ме Мишлы.— Вӧвъястӧ пуксьӧдан.

— Со кык пурт вайи, ковмас лэчтыны асывнас. А вӧвъяслы и аслым шупыд лоис, да мися ытшкыся нин кытчӧдзкӧ.

— Дерт, эськӧ сідз да, мед поводдяыс оз вежсьы-а.

— Гашкӧ, оз. Рытыс тай нинӧм лёксӧ оз висьтав. А рытыс бур и эм. Весиг ӧтка-ӧтка кымӧрторъясыс быттьӧ сибдӧмны места вылас — улын ни вылын тӧвру абу. Кузяджык кӧ видзӧдан, казялан жӧ тай — найӧ войлань сетчӧны. Посни лэбачыс баддяс лӧнис и, но ӧні нин эз дыр кежлӧ. Шондіыслӧн медводдза югӧрыс садьмӧдас найӧс.

Ваняклӧн юрыс, гашкӧ, эз на и во юрлӧсӧдзыс, а узьӧ нин. Орчча вонъяс Людалӧн весиг лов шыыс оз кыв. Эм сэтшӧм йӧз, кодъяс лов шытӧг узьӧны, быттьӧ кулӧмаӧсь. Ме дыр на эг унмовсь, песси-быгляси ӧтар бок вывсянь мӧдар бок вылӧ. Гатшмоз лӧсьӧдчыла и. Сэсся коркӧ шонді петігас сӧмын воши. Гортын ӧд тадзи жӧ, дыр ог вермы унмовсьны. Мыйкӧ век катас юрам — думайтча да думайтча. Пӧрысьмыны понді.

Асывнас Ваняк юалӧ Людалысь:

— Кыдзи нин узьсис выль местаын?

— Ой, Рома, сэтшӧм бура узи. Шоныд шебрас пытшкас зэв лӧсьыд. Вон саяс номъяс дзизгӧны, но ме тӧда, мый найӧ менӧ курччыны оз вермыны, да эг и тӧдлы, кыдзи унмовси. А мый ми талун кутам вӧчны?

— Куртны кутам, кыскавны да чӧвтны. А тэ мый кужан вӧчны?

— Быдтор кужа, абу первойысь видз вылас. Школаын тай велӧдчигӧн век вӧлі зорӧд вылас йӧткыштасны турунсӧ митшкӧдны. Бӧрсӧ лэччигӧн лэбын вороп кузя вӧлі исковта.

— Но ми, сідзкӧ, тэнӧ кыпӧдлыны жӧ пондам зорӧд вылас.

Ставӧн мунісны куртны, а ме кольччи зорӧд пиньяссӧ бытшлавны, пыкӧдъяссӧ лӧсьӧдны. Чӧвтнысӧ ми кутам Ваняккӧд — этша йӧзнад унджыкыс оз и ков. Миш узьӧ керкаас на — шойччас кытчӧдзкӧ да, гашкӧ, и куртны ставыскӧд заводитлас.

Сӧмын казьтышті Миш йылысь, ачыс петіс керкасьыс. Садьмӧма нин, но унмыс, тыдалӧ, абу палялӧма, очсалігтыр ме дорӧ матыстчис. Юалӧ, мыйкӧ пӧ пӧсьтор эм-ӧ.

— Чайниксӧ да пӧртсӧ ӧгыр вылас кольлі, эз на кӧдзавны.

— Тайӧяс тай страда заводитчӧмсӧ зэв бура пасйӧмны, пир восьтылӧмны. Ме пыри, да ӧтиыс бабаяс дорсьыс петіс, а мӧдыс вӧлі чергысьӧма нин. Слабджык, тыдалӧ, либӧ азымджык вина дорас.

— Но мед, Ваняклы нинӧм эн висьтав. Сідз нин партейнӧйяс вылас кӧин моз видзӧдӧ. Найӧ ӧд йӧз жӧ, кӧть кӧсйӧны асьнысӧ ангелӧн петкӧдлыны. Ме тай сідз чайта: гуся пӧдругаяссӧ татчӧ вайӧдӧмны. Людаыс тайӧс казялӧма нин, тыдалӧ, да пыр и ӧтдортчис на дорысь. Дерт, казяліс, эз ӧти лунӧн воны татчӧдз. Ми пӧ семейнӧй войтыр. Талун нӧ ытшкысьны пондан жӧ?

— Ог. Ӧти вӧвсӧ позьӧ доддявны турун юръяссӧ кыскавны, а мӧднас пинь пыкӧдсӧ разӧдны зорӧд местаясас. Муна, сёйышта.

Видз помланьыс, но абу ылынӧсь — куртысьяссӧ аддза. Турунсӧ чукӧртӧмаӧсь вӧлӧкъясӧ да регыд юрасьны пондасны. Бабаяс пасьтӧмӧсь, петкӧдлӧны ассьыныс мичлунсӧ другъясныслы. Люда пӧрччӧма жӧ ковтасӧ, но трикоа. Гашкӧ, купальнӧй костюмыс сылӧн абу. Ваняккӧд орччӧн курасьӧ, мукӧдсьыс бокынӧсьджык. Кор дугдыласны кураннас вӧдитчӧмысь, мыйкӧ сёрнитӧны. Мый бара сёрнитӧны-а? Миш доддяліс вӧвсӧ вуж доддьӧ — турун кыскавны пондас. А со и Ваняк локтӧ, Миш дорӧ матыстчис:

— Кӧнкӧ тай понйыд оз тыдав?

— А лешакыс тӧдӧ, кӧні шӧйтӧ.

— Талун жӧ мед вӧлі домӧма. Он дом — лыя.

— Мый нӧ лоас вӧр-ваыслы, ӧти котыр кӧ ням-ням? Сылы ӧд колӧ жӧ.

— Сідз нин этійӧ коддьӧм коммунистъясыс вӧрсӧ и васӧ тшыкӧдісны, да нӧшта налы тэнад Тузӧыд отсасьӧ. Чӧж котырӧн сійӧ оз прӧймитчы, кӧч пиянсӧ на тшавкнитас. Мед вӧлі домӧма.

— Мыйӧнкӧ тэныд коммунистъясыс ёна жӧ нин солыштӧмны.

— Али тэныд эз? Нэмтӧ мырсин ош моз, а бур гач кокад эз волы. Ставыс сэтчӧ муніс, ад горшас. Пармаыс куштӧм жыдач кодь лоис, сӧмын кӧнкӧ-кӧнкӧ тювӧяс кольӧмны.

— А мый нин тэнад помечыд?

— Мыйкӧ тай легӧны-а, кольмӧм лудікъяс моз визлалӧны видз кузяыс. Налы ӧд мый, туруныд лоас кӧть оз. Курортӧ моз и локтӧмны да. Ныр выв вӧтлыштны ковмас.

Кык зорӧд сувтіс первой луннас. Абу джуджыдӧсь, но паськыдӧсь. Люда сьӧлӧмсяньыс талис-митшкӧдіс кыкнансӧ. Бӧръя зорӧдсӧ сувтӧдігӧн, кор нывкаыс вылынкодь нин лоис, горӧдіс:

— Ой, Рома, пола, шатласьӧ зорӧдыс да.

— Эн пов, ӧти кинад пиняс кутчысь, а мӧднад со этійӧс босьт.

Ваняк мыччис йыв йылӧ домӧм кык бадь. Тайӧ мед тӧлыс эз пашкурит турунсӧ.

— Но, ӧні сэсся лэччы.

— А кыдзи нӧ лэчча, мыччы лэбынсӧ.

— Оз ков лэбын. Баддяс кутчысьӧмӧн надзӧник гывдӧдчы, а сэсся шыбитчы — ме тэнӧ кута.

Люда воис зорӧд джын метяс, кунис синъяссӧ да эз и тӧдлы, кыдзи веськаліс Ваняк сывйӧ. А мӧдыс топӧдӧма сійӧс морӧс бердас да некыдз оз кӧсйы лэдзны.

Люда микӧд и пондіс сёйны-юны. Но мед, миянлысь нинӧм оз джынъяв, ачыс тушонка банкасӧ тырыс вайӧма. Тӧргӧвечыдлы ӧд сюрӧ — ылысь корсьны оз ков. Зэв бур эськӧ, Ваняклы кӧ пӧв сюрас, но сӧгласитчас-ӧ Людаыс петны сы сайӧ. Ме ог тӧд, кутшӧм сёрни вӧлӧма на костын, кӧть Ваняк ни ӧтчыдысь на эз видлы пыравны Люда дорӧ, вонъяс. Гашкӧ, и вӧрзьӧдлытӧм на нывкаыс. А сідзсӧ кутлысьлӧны-жмитласьӧны. Люда шуӧ сэки:

— Лэдз, Рома, со Павел дядьыс сералӧ миянӧс.

— Ме пайысь... Коді нӧ мый шуас бур кутлысьӧмысь да радейтчӧмысь. Асланыд шуд вылӧ.

Рытнас водам, да Ваняк дыр на оз унмовсь, пессьӧ бокам. Ышловзьылас и. Мый вӧчан? Матын чӧскыдторйыс, но он кватит, век кӧть пессьы. Гӧтрась, думайта ме, да сэки, бур пи, кӧть мый вӧч, аслад лоас.

Мича жӧ поводдя сулалӧ, да зорӧдъясыд миян тшак моз быдмӧны. Сэсся неуна тӧвруа, туруныс син водзад косьмӧ. Помечнас звенорг дӧвӧлен. Мӧдарӧ кӧ, абу ӧд сэсся челядь, оз жӧ ков ныр выв вӧтлыны. Ваняк бур ног пондіс сёрнитны Кокосовыскӧд. А мӧдыс коркӧ петіс ми дорӧ, ужнайтам вӧлі.

— Ті тай, Роман Алексеевич, мырддинныд миянлысь нывкасӧ. Он-ӧ кӧть ӧти вонйын узьлӧй? — ачыс сералӧ.

— Дерт, ӧти вонйын. Мыш мышлань водам дай... Абу ӧд гозъя.

— Ӧти вонйын кӧ, мышланьтӧ ӧдвакӧ артмас. Меным эськӧ абу жаль да...

Татчӧ сэсся Люда содтӧ:

— Роман Алексеевич, мыйла нӧ сӧранныд? Ог жӧ ӧтлаын узьлӧй.

— Гашкӧ, и ог, — шуӧ Ваняк.— Ме шмонита.

— Со ме тіянлы газет-журнал петкӧді, — шуӧ Кокосов.— Лыддьӧй, эн кольччӧй олӧмсьыс.

— Миян олӧмыс ӧні ӧти — турун. Турун, дай нӧшта турун.

— Да ещӧ перестройка, — содтӧ Кокосов.

— Код тӧдас, кодарӧ кучкас тайӧ перестройкаыс. Видзӧдлам на.

— Тӧдӧмысь, абу лёк вылӧ сійӧс панӧма.

— Гашкӧ, и абу лёк вылӧ. Но, кыдз тай шуласны, вӧлыслӧн вӧжжиыс лёньзис, и вом кӧртсӧ босьтӧма. Некоді оз тӧд, кутшӧм туй вожӧ сійӧ кежас. Газетсӧ ми лыддям жӧ, да ок, мый на лоас.

— Со тіянлы «Правда» да «Советская Россия» — лыддьӧй.

— Сійӧ газетъяссьыс бакшасьӧм дукӧн ӧвтӧ. Миян колӧ мыйкӧ мӧдтор.

— Асьныд тӧданныд, миян библияяс абуӧсь.

— Дерт, абуӧсь. Сетінныд кӧ вӧля йӧзыслы лыддьыны библиясӧ, некутшӧм перестройка эз ков.

— Но, бур, — шуӧ Кокосов.— Та йылысь дыр позьӧ вензьыны и некытчӧ не воны. Роман Алексеевич, нуӧдлӧй менӧ чери кыйны, окота юква сёйыштны. Тіян ӧд эм мӧд вугыр шатин, и рытыс со кутшӧм бур.

— Сэтшӧма кӧ нин кӧсъянныд, лэччылам. Мунӧ пасьтасьӧй.

Найӧ мунісны, а ме вӧзйи Людалы:

— Гӧп доръясас гӧрд сэтӧр эм. Талун видзӧдлі, воӧма нин. Ставыс гӧрд ӧшалӧ, корйыс оз тыдав. Ведра босьтам да ветлам.

— Ветлам, ветлам, Павел дядь. Рома свежӧй чери кыяс, а ми сылы вотӧс ваям, морс вӧчам сэтӧрсьыс.

Дзик гӧпъяс дорас, кытчӧ омӧля веськалӧ шонді югӧрыс, сьӧд сэтӧр быдмӧ, а гӧрдыс вывтасінасджык. Сэтӧрӧдзыс зэв сьӧкыд писькӧдчыны льӧм пу коластъясті, ӧмидз кустъясті, да ещӧ на пӧрласьӧм пуыс гӧгӧр. Гӧпсяньыс ӧвтӧ сісь дукӧн. Лёкӧн-шогӧн писькӧдчим сэтӧрӧдзыс. Люда аддзис вотӧссӧ да горӧдіс:

— Павел дядь, а сэтӧрыс мыйта! Вай татчӧ и сувтам.

Висьталӧны, гӧрд сэтӧрын пӧ некутшӧм витамин абу. Кыдзи нӧ сідзи, вотӧсын витамин абу, мыйкӧ век нин эм. Сэтысь зэв бур варенньӧ лоӧ чайӧн юны. А морсыс кутшӧм артмас! Зэв на и бур вотӧс. Неыджыд местаысь и тырис ведраным, да ӧні колӧ бӧр писькӧдчыны. Во сайын татысь жӧ чукӧртлі сэтӧрсӧ быдса ведра, но бӧрсӧ петігӧн кокӧй крукасис, ме тури-бариӧн уси. Вотӧс киссис да нем мында эз во. Ведра пыдӧсас сӧмын. Ӧні Людалы тшӧкті петкӧдны ведрасӧ.

Воим, а чери кыйысьясыс буретш локтӧны жӧ. Кокосов гораа висьтасьӧ кайигмозыс:

— Ах, Роман Алексеевич, бур жӧ ком лэдзи. Ӧд киам нин вӧлі. Кыдзкӧ лёк ног песовтчис-туркнитчис дай исковтіс ваас.

Ваняк юкис кыйдӧссӧ шӧрипӧв, шуӧ:

— На, пуӧй. Свежӧй юкваыд сійӧ... ачыд тӧдан. Гашкӧ, гӧтыртӧ дум вылад уськӧдлан.

Чай на пымӧдім сэсся да юим. Ме пыри узьны, а Люда пуксис сэтӧрсӧ весавны, Ваняк — черисӧ керны. Меным кылӧ налӧн сёрниыс.

— Катыд коськъяс весьтас ветлім сотчӧминтіыс. Ёна пӧрӧма, да сьӧкыд муннысӧ. Кокосов шогӧ усис. Кытчӧкӧ тай, шуӧ, вӧзйысян. Лок, лок, шуа, чери кӧ колӧ. Вугыр шатинсӧ киас абу кӧ некор кутлӧма-а, быд чӧвтігӧн кыснаныс баддяс сибдӧ. Сэсся велалыштас неуна, некымын ком тай кыйис жӧ. Сапӧгыс дженьыд чӧръя, ылӧ кевны оз вермы — кытысь сылы уна чериыс. Но, менам ставыс, ковмас тэкӧд тшӧтш сэтӧрас кутчысьлыны.

— Отсышт, регыдджык мынам. Аски морс вӧчам да нуам ведраӧн чӧвтанінас. Гашкӧ, кӧдзыд ваӧ позьӧ вӧйтлыны ведрасӧ?

— Позьӧ ёляс, кӧні чери-яйыс. Сэтчӧдз абу ылын лэччывны. Нӧшта кӧсйи висьтавны: ю бокас сэні ошкыс ёна олӧ. Ӧтилаын куйлӧма турунас да, тыдалӧ, кылӧма миянӧс, водзвыланым чеччӧма. Локтім, а личкӧм туруныс сувтӧ. Сіталӧма, да руалӧ на. Кокосовлӧн дзикӧдз усис настроениеыс. Паныдасяс кӧ, шуӧ, мый кутам вӧчны. Шатинъяснас, мися, синъяссӧ тойлам. Тэ, шуӧ, век шмонитны видзӧдан-а, вермас быдторйыс лоны. Ошкыс таніясын уна рӧдмӧма, быдлаын шӧйтӧны. Павел дядьыс кӧзасӧ лысьтыліс эз?

— Лысьтіс. Йӧв бидонсӧ кытчӧкӧ ёляс жӧ нуис.

— Кывзы, Люда. Талун, гашкӧ, лэдзлан дінад?

— Сёрни абу, терпит гӧтрасьтӧдзыд.

Ок, думышті ме, тайӧяслӧн тай ставыс лад вылын. Ваняклы гӧтырпу сюрис, кытысь и думыштны некоді эз куж — Изъю йылысь. Пӧрысь мамыслы радыс лоас, том кӧзяйкасӧ кӧ вайӧдас пиыс. Люда магазинсӧ примитас — Петыр Ӧльгаыс важӧн нин пенсия вылын, быд лун петсьӧ, тшӧктӧ мортӧс корсьны. Сэтшӧмджык мортыс миян и абу, некодӧс сувтӧдны прилавок саяс. Ме эськӧ ог тӧд да... Ыджыд деньга вылӧ Люда вермас и фермаӧ мунны, лэдзас кӧ верӧсыс. Дерт, оз лэдз служащӧй гӧтырӧс. Татшӧм мичатӧ чача пыдди пондас гортас видзны.

Кутшӧм нӧ сійӧ страда, оз кӧ зэрмыв да оз шойччӧд войтырсӧ. Рытсяньыс ӧд дзик нинӧм эз висьтав зэр йывсьыс. Асывнас чеччи, водз на и петі вонсьыс, а рытыввылыс сьӧд. Тӧвсӧ вежӧма, зэрӧн пушкӧ. Ӧдйӧджык колӧ бипурсӧ ӧзтыны да пусьыны, а сёйны-юны, гашкӧ, и палаткаас вӧтлас. Тӧрытъя кыйӧм черисьыс юква пуа — сійӧ регыдджык артмас. Пӧрт-чайник ӧшӧді, буретш Ваняк мыччысис палаткасьыс, видзӧдліс гӧгӧрбок.

— Мыйкӧ тай, — шуӧ, — син-пельыс ывлаыслӧн талун абу сэтшӧм. Думыс, тыдалӧ, зэрыштны.

— Муркӧдчӧ нин да. Дерт, зэрас, татчань тай кайӧ. Бура и косьмыліс туруныс, но кӧтӧдас.

— Да, шойччӧдас. Мишсӧ колӧ дугӧдлыны ытшкӧмсьыс. Вежон мысти ли, гашкӧ, водзджык на, орасны видзьясыс, тэрмасьны нинӧмла.

Люда садьмӧма, кылӧма сёрнинымӧс, петіс вонсьыс.

— Эз на весиг войт усь, — шуӧ, — а ті нин шойччыны кӧсъянныд. Гашкӧ, и бокӧ тӧлӧдас кымӧрсӧ.

— Кӧтасьтӧг ог мынӧй, — кайтӧ Ваняк.— Талань локтӧ.

Сӧмын шуис тадзи, сяркнитіс гымыс дзик юр весьтаным, а сэсся медводдза войтъяс усисны. Менам ставыс пусис, да сёйны лӧсьӧдчим палаткаас.

— Но ӧні мед зэрас, веськӧдас сьӧлӧмсӧ, — шуӧ Ваняк.— Муыс ёна шоналіс, гымавны пондас крепыда. Люда, тэ он пов гымсьыс?

— Палаткаас нӧ мыйла повнысӧ?

— Менам братан эм — сідзсӧ зэв повтӧм морт. Ошкӧс ӧтнас чеччӧдас гусьыс, а гымысь да чардбиысь полӧ. Чери кыйны коркӧ мӧдӧдчим, пыжӧн катам. Юр весьтаным кымӧр локтіс, чорыда гымавны пондіс. Менам братаныд дыр тай эз думайтчы, тшукӧдіс пыжсӧ, лӧдіс олассӧ ласта вылас. Пыжсӧ кыским, кымим. Эз на зэрмы весиг, а сійӧ пыж улын нин. Пернапас пондіс помся креставлыны да свят-свят дольны. Сэсся мӧдысь коркӧ ми ордын слӧймис гымалігас. Кыдз тай заводитіс сикт весьтас сяркӧдны. Братан повзьӧмысла туалетӧ дзебсис. Ме петі да юала, мися, мый нӧ сэні вӧчан. Эн кывзысь! — горӧдіс лёк ног. Шуи сылы, мися, гачтӧ кӧть лэдз, мед пакӧсь оз ло татшӧма повзьӧм бӧрад. Кольӧм во выль ружье ньӧбліс, кыйсьыны коркӧ муніс. Горӧдіс да пыжӧн сыла вуджи. Бӧрсӧ локтігӧн пондіс ёна гымавны. Думайта, кытчӧ ӧні воштысяс, тані туалетыд абу ни ваас он шыбитчы. Братаныд менам босьтіс выль ружьесӧ да ваас чивгис. Шуӧ, кӧрт да вермас лыйны. Ружьесӧ корсис бӧрнас. Гымалӧмысь татшӧм полысь мортӧс ме сэсся эг на аддзыв.

Ваняк висьтасигкості ёна зэрмис, а гымыс вошйис кытчӧкӧ.

— Ӧні сэсся вой кымышсӧ лэдзас, — шуи ме.— Быд гымалӧм бӧрын на войтӧвтліс. Эз кӧ дыр кежлӧ зэрыс зарадит, бур на эськӧ. Няньным миян быран выйын, гашкӧ, Мишыс мед лэччылас верзьӧмӧн?

— Ог тӧд, позьӧ-ӧ Мишӧс мӧдӧдны. Вермас и сійӧ зарадитны вежон кежлӧ, горшыс, кӧнкӧ, косьмӧ нин.

— Ог думайт, абу сэтшӧм морт, но стрӧжитны колӧ мӧдӧдчигас. Ӧні узьӧ да мед на шойччас, неважӧн воис.

Аскинас недыр кежлӧ вой тӧв и пӧльыштліс. Зэрыс дугдіс, но шойччӧдіс миянӧс куим лун. Дерт, петавлім жӧ турунсӧ вӧрзьӧдлыны-а. Миш лэччис няньла, куим лун мысти кӧсйис локны. Видзӧдлам, рытланьыс воас оз.

Воис ужын кежлӧ ташканас: аслыс табак запас вайӧма, кымынкӧ газет да кык водка доз.

— Сэні эг нин понды, мися, мед ог дзугсьы. Вайӧ сёйыштамӧй, кынӧмӧй сюмалӧ.

— Мый сиктас выльыс? — юалӧ Ваняк.

— А ме сиктас, бур ног кӧ, эг и петав, кык лунсӧ аслым ытшкысьны ветлі гӧтыркӧд. Первой асывсӧ тай контораӧ пыралі жӧ висьтавны, уна-ӧ турунным лоис. Кызь вит тонна висьталі да шуи, мый мӧд сы мындаыс лоас.

— Лоас, — шуӧ звенорг, — дай унджык на. Ветымын вит тоннаысь унджык эськӧ абу чукӧртлывлӧмны да. Видзӧдлам. Митрей Геньыс ӧд волас примитнысӧ. Тайӧясӧс кылӧдны колӧ и.

— Мамтӧ аддзылі. Горт йӧрсьыс турунсӧ вӧлі ытшкӧ. Литовкасӧ на, тшӧктіс да, дори. Шуӧ, паськӧдышт пӧ, лёка ытшкӧ. Юаліс на, эн-ӧ тэ мыйкӧ кор. Шуи, нянь сӧмын колӧ. Горт дор звеносьыс тракторлӧн коленвалыс лэбзьӧма. Корсьӧны.

— А быд гожӧм на сідз вӧвлі — век страда шӧрас киссясны.

— Пӧскӧтина выланыс ош велалӧма. Мӧсъясӧдзыс эськӧ оз вошйы, но дояркаяссӧ повзьӧдлӧ. Ӧтруб видзанінас пыралӧма да ставсӧ пашкуритӧма. Ӧні накӧд рыт и асыв Прокӧй дядь ветлӧдчӧ ружьеӧн. Пӧденнӧй пӧ мынтӧны.

— Пӧденнӧй. Войнас колӧ кыйӧдны засадасянь, а рыт и асыв век кӧть шлёпъяв дояркаяслы гаж пыдди. Аски сэсся зэлӧдлы ытшкӧмнад — мичаммис поводдяыс.

Ме сэсся муні Музаӧс лысьтыны да ог тӧд, мый ещӧ Мишыс висьталіс. Локті, а Ванякӧс быттьӧ вежӧмны, синмыс шеля-вежа. Мишӧс тӧкӧтьӧ оз нӧшав, кулакъяснас зырӧдлас, шуалӧ, код лешакыс пӧ тэнӧ тойліс кыв вуж дінад. Некыдз ог гӧгӧрво, мый лоӧма. Людаӧс кори палатка саяс, быттьӧ кӧза дорӧ мунім, да сылысь юалі.

— Мишыс висьталӧма Рома мамыслы, мый пиыд пӧ Изъю йылысь гӧтыр вайӧдас. Мед нин сэні висьтасьӧма, но мыйла Ромаыслы та йылысь казьтывны.

Бӧр локтім. Ваняк горзӧ Миш вылӧ:

— Мун ытшкы! Ог вермы тэ вылӧ видзӧдны!

Миш пырис керкаас узьны.

— Но и бот, но и прӧст вома келькан. Мамсянь, колӧкӧ, ылӧ оз паськав, но ӧд сійӧ медводз гӧтырыслы, кӧнкӧ, больгис, а сійӧ кузь бӧжа поштаыс и эм.

Люда ӧнӧдз нинӧм эз шу, но тешкодьӧн ли мый ставсӧ тайӧс аддзис, быттьӧ и нюм ӧшйӧма вом дорас.

— Эн нӧйтчы нинӧм абусьыс, Роман Алексеевич. Лёкыс абу, паськалас кӧ татшӧм сёрни. Друг тэ менӧ тшукӧдан пыжнад ас дорӧсад, катӧдан гортад, да кӧть мамыдлы оз ло тӧдлытӧг. Мый нин сэтысь дзебнысӧ, кор миян ставсӧ сёрнитчӧма.

— Ак, тэ сідз, — сӧмын и вермис шуны Ваняк. Сійӧ босьтіс Людаӧс моздорас да заводитіс бергавны ӧти местаын. Юрыс кольмытӧдз бергаліс.

— Павел дядь, ноко чайсӧ пымӧдлы, пасйыны колӧ тайӧс.

Тайӧ войсӧ Ваняк да Люда узисны ӧти вонйын. Ме дыр эг вермы унмовсьны, томъяслысь шышкӧдчӧмсӧ кылі, да сы вӧсна. Люда некымынысь шуліс: «Нӧрӧвит, Рома, нӧрӧвит, оз на ӧд узь Павел дядьыс...» Сэсся ассьым томлунӧс казьтылі.

Сэтшӧма ме кӧсйи, мед ставыс буретш тадзи эськӧ и помасяс. Ме сэтшӧм рад Ваняк вӧсна, быттьӧ ачым гӧтрася.

Та бӧрын дас лун мысти кымын на мынім страдасьыс. Бара на зэрмыліс да гуис миянлысь кадсӧ. Митрей Гень воис ӧтнас, ӧти пыжӧн, да та вӧсна Кокосовӧс мӧдӧдім Мишкӧд, мӧд вӧвнас верзьӧмӧн. Миш шуӧ, нинӧмла пӧ ытшкан машинасӧ кыскавны, некыті абу жугалӧма ни сваритны оз ков. Бригадир примитіс туруннымӧс, а сэсся сӧвтчисны ӧти пыжӧ да кывтісны. Ми кольччим на. Ваняк шуӧ, чери пӧ колӧ кыйыштны свадьба кежлӧ. Куим лун сэсся ветлӧдлісны Людаыскӧд ю йылас. Комыс сэні гырысь, сьӧд вылыса. Зэв бур чери солалісны куим ведраӧ.

Мӧдӧдчан асылӧ сӧстӧм вӧлі, югыд син-пеля.

— Ми ӧд татчӧ волам на, Рома?

— Быть вылӧ. Мӧд гожӧмӧ и локтам, бара страдуйтны.

Тэчим оласнымӧс пыжас, медбӧрын ме кӧзаӧс лэччӧді, доми пыж нырас. Сійӧ менам тані гӧгрӧсмис чӧскыд турун вылад, шыляммис лысьӧмыс. Воа да сылы на ковмас турунтор заптыштны. Стимулсӧ совхозыс, дерт, мыйтакӧ сетас, додь ли мӧд турун, но туй пуксьытӧдз кыдзи сійӧс вайӧдан?

Эг на вевъялӧй йӧткысьны, а визӧбыс кватитіс пыжнымӧс, сӧмын нырсӧ да бӧжсӧ вомӧнасьӧмысь видз. Люда пыж шӧрын пукалӧ, сӧмын шуышталӧ:

— Рома, тэ эн ме вылӧ видзӧд, пыж ныртӧ видзӧд.

Бӧрӧ колисны миян зорӧдъясным. Мукӧдыс дзик ю дорас, быттьӧ миянӧс колльӧдны лэччӧмны. Гашкӧ, и менӧ колльӧдны да. Ваняклӧн татшӧм страдаыс уна на лоас, а менам, гашкӧ, и медбӧръя вӧлі. Ӧдвакӧ сэсся удайтчылас коркӧ Изъю йылӧдз волыны.


Гижӧд
Кӧза сюр вылын бобув
Жанр: 

lkejrlkelkrgner klrjnelknfrkl ekjnrjkenfrej

1