ЗАРАВА
Тулысыд быдӧнлы муса да любӧ. Муртса на мӧдас ворсӧдчыны шонді, пышкай сьылӧ нин гажа да кыпыд кад матыстчӧм йылысь. Юыштас керка вевтъяс вылысь гылалысь войтва, жбыркнитас-лэбзяс матыса пу вылӧ да бара сьылӧмӧн сьылӧ.
Кывлан кӧ сьылӧм-гажӧдчӧмсӧ водз тулысын виж морӧса пысталысь, дыр он вунӧд. Дарӧм тай ичӧтик лэбач, а мындӧм мичлун кутӧ ас пытшкас. Кор кынӧмыс пӧт да войвывса лэчыд тӧв оз дӧзмӧд сійӧс, сьылӧ торъя мылаа да сьӧлӧмсяньыс.
Кыдзкӧ ӧти тулысӧ ме ветлі вӧрӧ. Кӧнсюрӧ, увтас местаясын, пыр на куйлісны сьӧдасьыштӧм, топалыштӧм лым пластъяс. Коръя пуяс сулалісны ӧта-мӧд бердас йӧжгыльтчӧмӧн, вель дыр на оз вевттьысьны веж коръясӧн. Аддзи неыджыд кос места, кӧні сярвидзисны пув коръяс. Окота лои пукыштны, шойччыштны ывла вылас, кӧні кажитчис сэтшӧм гажа да лӧсьыд.
Син улӧ уси ӧткӧн сулалысь кыдз. Кыз, джуджыд, уна вояс, тӧдӧмысь, сулалӧ. Пуяслысь улысса вожсӧ кодкӧ чегӧма, гашкӧ, зверь, гашкӧ и ветлысь-мунысьяс. Оз ӧд этшаӧн волыны татчӧ. Чегӧм вож местаас артмӧма неыджыд розь. А сэтысь тюрӧбӧн петӧ зарава да кыдзлӧн кыз кок кузя исковтӧ муас. Видзӧдлі гӧгӧр, абу-ӧ кӧнкӧ сёйӧд му, кӧсйи тупкыны пуыслысь доймӧмсӧ, но немтор эг аддзы.
Ӧткӧн сулалысь кыдз вылӧ кысянькӧ виччысьтӧг пуксисны кык пыста. Вожйысь-вожйӧ чеччалігтыр, найӧ лэччисны пыр улӧджык и улӧджык. Ме кӧть пусяньыс пукалі зэв матын и, дерт, лэбачьяслы бура тыдалі, пыстаяс асьнысӧ кутісны збоя.
Лэччисны сійӧ местаӧдзыс, кытысь вияліс зарава, сэсся табанитчисны кокъяснас сюмӧдӧ, паськӧдісны вомъяснысӧ да заводитісны чӧсмасьны пуысь войталысь зараваӧн. Тяпкӧдӧны вомнысӧ, тыдалӧ, сэтшӧм чӧскыд, весиг синъяснысӧ куньласны.
Тадзи найӧ чӧсмасисны минут дас, сэсся, быттьӧ команда серти, лэбзисны орчча пу вылӧ и ӧтвылысь заводитісны сьывны.
— Пинь-пинь-пинь... — Ылӧдз кыліс лӧнь ывлаын налӧн гӧлӧсыс. Сьылыштісны мыйкӧ дыра и бара зарава юӧны.
Тайӧ лэбачьясыс кужӧны не сӧмын лӧсьыда сьывны, но и радейтӧны коми йӧз моз зарава юны.
Рытӧдзыс ветлӧдлі вӧрын. Пукышті гажаа варовитысь шор бокын, нимкодяси медводдза веж петасъясӧн. Тані, карыдкӧд регыд кежлӧ торйӧдчылӧм бӧрад, кажитчис ставыс мӧд пӧлӧсӧн. Вӧрса чӧскыд сынӧдыс, лэбачьяслӧн сьылӧмыс, вӧр-ваыслӧн выль серпасъясыс быттьӧ кутісны ас берданыс, эз тшӧктыны тэрмасьны гортӧ.
Бӧрсӧ гортӧ лэччигӧн туй бокысь аддзи сёйӧд му. Кабырті ки тыр да заводиті небзьӧдны. Кор вои ӧткӧн сулалысь кыдз дорӧ, пыстаяс сэні эз нин вӧвны.
Важ моз бӧрдіс кыдз. Сылӧн доймӧм местасьыс му вылӧ пыр на тёпкисны-войталісны анькытш тусь гырся войтъяс. Туй бокысь вайӧм сёй ёкмыльӧн ме небыдика тупки сылысь доймӧминсӧ. Кыдз пыр и дугдіс бӧрдны.
Аски, колӧкӧ, зарава юны татчӧ бара воасны пыстаяс да кутасны видны менӧ. Сьӧлӧмсянь кора: эн дӧзмӧй, донук лэбачьяс! Кыддзыс ӧд ловъя лов жӧ. Кутшӧмджык сылы терпитнысӧ, лунтыр синва кисьтны!
