ЭН ОШЙЫСЬ ВЕСЬШӦРӦ


Кыдзкӧ ӧти тӧвся лунӧ чукӧртчисны кӧинъяс, тшыгӧсь, скӧрӧсь. Медся пӧрысь кӧин, кодлӧн вомас вӧлі сӧмын кык пинь, кутіс норасьны:

— Сиктъяс дорӧ колӧ матӧджык сибӧдчыны, кыйӧдны понъясӧс. Найӧ ӧні ёна рӧдмисны, кутав сӧмын да номсась. И ёна котравны оз ков.

— Пон яйыд — омӧль яй. Колӧ йӧраӧс кутны: сылӧн лёка чӧскыд госыс, — пӧрысь кӧинлы паныда кыв шуис сувтса синма кӧин, кодӧс зверьяс нимтісны баквалӧн, ышнясьысьӧн.

— Йӧра яйыд, дерт, чӧскыд, но кыдзи сійӧс судзӧдны, кодлӧн тырмас вын-эбӧсыс кутны сійӧс, — вочавидзис пӧрысь кӧин. — Вӧлі кад — кужлім и тайӧ кузь кока зверсӧ кутны, а мый ӧні тіянысь.

— Эн сёрнит тадзи, кӧинушко. Кӧсъян кӧ, ме аски йӧра гозъяӧс джагӧда, кык лун чӧж номсӧдла тіянӧс айбарчӧн. Нювсьыны кутад да меным копрасьны. Кӧн олӧны йӧра гозъяыс, ме тӧда. Асывнас пета кыйсьыны, а рытнас пируйтны нин кутад да меным аттьӧ висьтавны.

Кӧинъяс пиысь кодсюрӧ кутісны нюмрӧдлыны вомнысӧ, лапйӧдлыны синъяссӧ, эз эскыны ышнясьысь кӧинлы. Куим кока кӧин-инвалид, коді неважӧн веськавлӧма вӧралысьлӧн капканӧ и унджык кадсӧ вӧлі тшыг, мыйлакӧ мӧдіс кекӧначасьны водз лапаяснас, а сэсся шуис:

— Зэв бур кыв висьталіс миян вокным. Мыйла сиктъяс дорӧ матыстчыны? Сэн ӧд ок мыйта вӧралысь, здукӧн вермасны бырӧдны миянӧс. Ме ногӧн, бурджык тані кыйсьыны.

— Тэ али мый кутан кыйсьыны куим кокнад? — скӧра печиктіс кывъяссӧ понӧль дорын куйлысь кӧин.

— Мыйла ме? Со тай миян вокным аски кӧсйӧ кутны кык йӧраӧс. Оз ӧмӧй гӧститӧд и миянӧс?

— Ті мый, он эскӧй меным? Аски пемыднас и пета кыйсьыны. Оз коль кык-куим час, кыдзи йӧра гозъя кутасны куйлыны менам кок улын.

— Ӧтнад кӧть эн сёй став яйсӧ, миянӧс тшӧтш кор пир вылас, — кӧрталіс ассьыс кывсӧ пӧрысь кӧин.

Войбыд кӧинъяс куйлісны ӧтчукӧрӧн лым вылын да гӧлӧс быртӧдзныс омлялісны. Унаӧн тайӧ войнас вӧталісны мича вӧт: лупсуйтӧны-сёйӧны чӧскыд яй, дундӧмаӧсь кынӧмъясыс, а найӧ сёйӧны и сёйӧны, вильӧдӧны госа лыяс, быттьӧ праздник воис.

Кор садьмисны, баквал кӧин эз нин вӧв. Тӧдӧмысь, водз мунӧма кыйсьыны, йӧра гозъяӧс кутны, ассьыс чой-воксӧ гӧститӧдны.

А тайӧ здукас баквал кӧин вӧлі нин Дурака шорын, кытысь тӧрыт аддзыліс йӧраяслысь кок туйсӧ. Талун найӧ тані жӧ узьӧмаӧсь, ас бӧрсяыс кок туйяссӧ кольӧмаӧсь, кор эновтӧмаӧсь узян местанысӧ.

Кӧин радысла весиг чеччыштліс и тэрыба мӧдіс вӧччыны йӧраяс бӧрся, кодъяс дзик на ӧні мунӧмаӧсь.

Час вӧччӧ, мӧдӧд час вӧччӧ, а кузь кокъясӧс некыдз суӧдны оз вермы. Мудзис нин, кывсӧ вель тшӧкыда нюжӧдлывліс, а вӧрса зверьяс эз на тыдавны.

Рытъявылыс сӧмын суӧдіс найӧс. Сулалӧны посньыдик пожӧмъяс пытшкын, сёйӧны пуыслысь небыдик вожъяссӧ. Кӧин лэптыштліс кокъяссӧ, жергӧдіс пиньяссӧ и пыр жӧ уськӧдчис йӧраяс вылӧ.

Вӧтӧданторъяс казялісны врагӧс, одйӧ чеччыштісны водзлань и мӧдісны тэрыба-тэрыба пышйыны.

Вӧччӧ на бӧрся кӧин, кыв ӧд сетіс, мый кутас йӧра гозъяӧс, гӧститӧдас ассьыс став рӧдвужсӧ.

Кӧин пӧсяліс, кокъясыс мудзисны, а пышйысьясӧс суӧдны некыдз оз вермы. Мӧдіс пемдыны, а сетӧм кыв пыр на эз вермы пӧртны олӧмӧ.

Рытъявылыс сӧмын йӧраяс мудзисны. Сувтісны ыджыд коз пу дорӧ, мӧдісны нювны-шыльӧдны ӧта-мӧдсӧ. Кӧинлы тайӧ и вӧлі колӧ: ловшысӧ тупкӧмӧн матыстчис энь йӧра дорӧ, кӧсйис нин орӧдны сылысь кок сӧнсӧ, но ачыс эз тӧдлы, кыдзи синъясыс пемдісны.

Вӧлӧмкӧ, казялӧма рӧзбойникӧс ай йӧра да бӧрса ён кокнас зятнитӧма кӧинлы юрас.

Нювсисны, радлісны йӧраяс. Насянь неылын туплясис жер пиньяса кӧин, коді дзик на неважӧн кӧсйис бырӧдны тайӧ мича зверьяссӧ, парма гажӧдысьяссӧ.


Гижӧд
Эн ошйысь весьшӧрӧ
Жанр: 

lkejrlkelkrgner klrjnelknfrkl ekjnrjkenfrej

1