УРЪЯС ПЕТӦНЫ ТУЙӦ
Гожӧмнас, кор ті ветланныд вӧрӧ, тшӧкыда аддзывланныд урӧс. Шаркнитас-каяс сійӧ кутшӧмкӧ пу вылӧ, гӧгрӧс сьӧд синъяссӧ веськӧдас морт вылӧ, коді сійӧс повзьӧдіс, сэсся лэчыд гыжъяснас пу кырсьӧ кутчысьӧмӧн, тэрыба каяс вывлань. Дзебсяс пу вожъяс костӧ, бара мӧдас дзоргыны, корсьны повзьӧдчысьӧс. Пельяссӧ чошкӧдӧма, усъясыс вӧрӧны, небыд кузь бӧжсӧ лэптыштӧма вывлань.
Ур ӧти местаын дыр пукавны оз вермы, видзӧдлас матынджык сулалысь пу вылӧ, тойыштчас и биа ньӧв моз вирдыштас синъяс водзад. А бӧжыс, бӧжыс кутшӧм мича! Ичӧтик зверлӧн морӧсыс да кынӧм улыс еджыд, мыш вылыс гӧрдоват, кокъясыс дженьыдӧсь. Вом пытшкас сярвидзӧны еджыд пиньяс, кодъяс отсалӧны сылы кокньыда перъявны да килльыны коз пу да пожӧм кольяс, чӧсмасьны быдмӧг кӧйдысъясӧн, вотӧсъясӧн, заптыны тӧв кежлӧ сёян, ӧшлыны пу вожъяс вылӧ тшак.
Коз пуяс да пожӧмъяс вылын кӧ артмас уна коль, сідзкӧ, урлы позьӧ бура тӧвйыны, оз ковмы тшыглун пыкны. Но оз быд во овлыны кольясыс. Сэки уръяслы быть лоӧ эновтны тӧдса местаяс да эбӧс быртӧдзныс корсьны выль парма-ягъяс, кӧні эськӧ сёянысь эз вӧв тшыгӧм.
Кор уръяс вежӧны олан местаяссӧ, мӧдӧдчӧны лунвылӧ, асыввылӧ, рытыввылӧ либӧ войвылӧ, некутшӧм поводдя найӧс оз торк. Мунӧны лун и вой, зэригӧн и тӧла лунъясӧ, кутӧны ассьыныс нырвизьсӧ пыр водзӧ. Уръяслы мунан туй вылас паныдасьлӧны гырысь и посни юяс, нюръяс, сиктъяс и каръяс. Мудзӧм зверъясӧс куталӧны туланъяс и варышъяс, а найӧ мунӧны сӧмын водзӧ, кӧні позяс пӧтӧса коллявны арсӧ и тӧвсӧ, быдтыны тулыснас пиянӧс, видзны асьнысӧ висьӧмъясысь да тшыглы кулӧмысь.
Комынӧд воясын ме уджалі учительӧн ичӧтик сиктын, коді сулаліс паськыд Печӧра ю бокын. Вӧлі июнь тӧлысь нин, а Печӧра эз на и кӧсйы ямны, лун и вой нуис ассьыс кӧдзыд васӧ вой саридзӧ. Петас кӧ тӧв, юыслӧн здукӧн вежсьӧ серпасыс: кутасны муткылясьны пызан судта веж гыяс.
Кор поводдяыс лӧняс, окота петавны, прӧйдитчыштны джуджыд берег пӧлӧн да выльысь нимкодясьны вынйӧра Печӧра юӧн. Видзӧдны, кыдзи тундралань лэбзьӧны утка да дзодзӧг кельӧбъяс, кывзыны лунвылысь воысь лэбачьяслысь сьылӧмсӧ.
Эг на удит воны сикт помӧдз, берег дорсьыс аддзи кулӧм урӧс. Мунышті водзӧ, и лыа кӧса вылын бара куйліс татшӧм жӧ звер. Сэсся ещӧ и ещӧ. Тӧдӧмысь, юсӧ вуджигӧн уръясӧс суис бушкола тӧв, найӧ эз вермыны водзсасьны гыяскӧд. Кодъяскӧ на пиысь вӧйины, а мукӧдыс воӧдчисны берегӧдз да сэні кынмӧмысла куліны.
Со уръясыдлӧн кутшӧм сьӧкыд туйыс.
