ВУЖ КӦРЗИНА


Победа лун водзвылын вӧлі торжественнӧй рыт. Доклад помасьӧм бӧрын вӧвлӧм фронтовикъяслы, кодъяс дорйисны вӧрӧгысь рӧднӧй му, висьталісны уна аттьӧалана кывъяс, сеталісны козинъяс.

Шуисны менсьым овӧс да корисны президиум пызан дорӧ. Нывбаба, коді сеталіс козинъяс, вылӧдз лэптыліс вуж кӧрзина да сетіс сійӧс меным.

— Тэ радейтан вотчыны. Миян коллективсянь тэныд тайӧ козиныс.

Тайӧ вӧлі дас во сайын. Ӧдйӧ тай исковтӧ кадыд, но вуж кӧрзинакӧд ме эг на торйӧдчыв. Быд гожӧм и ар пукта сійӧс рюкзакӧ да мӧдӧдча ылі туйӧ, медым корсявны-вотны тшак да вотӧс.

Тайӧ кад чӧжнас кытчӧ сӧмын эг волывлӧй вуж кӧрзинакӧд, кымын вой коллявлім вӧр керкаясын, бипуръяс дорын! Верман ӧмӧй лыддьыны, кымын километр восьлалім сыкӧд нюръяс да пармаяс вомӧн, кымынысь кӧтасьлім зэригъясӧн, вой тӧвсӧ и бушкова лунъяссӧ аддзылім.

Дас воыд абу дас лун. Вуж кӧрзина отсӧгӧн тайӧ каднас эг этша тшак да вотӧс гортӧ кыскав. Кӧні ми сӧмын сыкӧд эг вӧлӧй!

Мортыд пӧрысьмӧ. Вочасӧн пӧрысьмис и менам вуж кӧрзинаӧй. Пыдӧсыс сылӧн лои сэтшӧм омӧль, полан сэтчӧ вотӧс пуктыны. Вугйыс омӧльтчис жӧ, вермас дзикӧдз орны. Кӧсъя нин вӧлі кӧрзинаӧс шыбитны да выльӧс ньӧбны, но мыйлакӧ жаль лои. Сы мында бур вӧчис меным, сы мында во вӧлім ӧтлаын, эг торйӧдчывлӧй. И друг шыбитны сійӧс! Оз, тадзи оз шогмы.

Кӧрзина пыдӧсӧ гӧтырӧй мелі кияснас пуктіс дӧраысь дӧмас, выль ног лӧсьӧді вугсӧ, и ӧні кӧрзина бара на кутас уджавны мекӧд орччӧн кор ки вылын, кор мышкын. Кымын выль местаясӧ удайтчас меным волыны сыкӧд, кымын тшак да быд пӧлӧс вотӧс веськавласны на тайӧ кӧрзинаас!


Гижӧд
Вуж кӧрзина
Жанр: 

lkejrlkelkrgner klrjnelknfrkl ekjnrjkenfrej

1