ПӦРӦМ ПУ ВЫЛЫН ШОЙЧЧИГӦН


Лесник Семён Митрофанович узис вӧр лэдзысьяслӧн баракын, кӧні уна вой нин коллявліс. Мастерлы сетіс индӧдъяс, кутшӧм делянкаысь керавны водзӧ вылӧ вӧрсӧ, сэсся лун шӧр бӧрын мӧдӧдчис гортас. Ёна пемдытӧдзыс колӧ вӧлі веськавны сиктӧ.

Кузь туй вуджигӧн быд сикас местаӧ веськавлан: лоӧ нюръяс и зыбуч местаясӧд вуджны. Бур, мый кык лун эз зэр, и кокньыдджык восьлавны тӧдса туйӧд.

Скупиник шонді заводитіс нин вӧйтчыны стенӧн сулалысь пуяс сайӧ. Лесник вель ёна мудзис. Сюмаліс и кынӧмыс, ӧд асывсянь прамӧя эз на нуръясьлы.

Буретш туй бокысь аддзис пӧрӧм пу. Сэні позьӧ лабич вылын моз шойччыштны и сёйыштны. Кежис сэтчӧ. Посньыдик коз пуяс костӧд татчӧ тӧлыс весиг эз веськав.

Семён Митрофанович керзӧвӧй сумкасьыс перйис вӧлӧга да тэрмасьӧмӧн мӧдіс сёйны. Вӧрын быттьӧ некод эз вӧв, эз кыв лэбачьяслӧн сьылӧмыс, сьӧлаяслӧн ӧта-мӧдныскӧд чипсасьӧмыс. Семён Митрофанович ӧзтіс папирос, кусӧм истӧг тувсӧ шыбитіс муас. Здук мысти истӧг тув дорӧ матыстчис кодзувкот и пыр жӧ видліс, вермас-ӧ кыскыны сійӧс аслас позйӧ.

Кодзувкот кутчысьліс то ӧтар истӧг тув помас, то мӧдарас, но вӧрзьӧдны сійӧс сідзи и эз вермы. Лёка ӧд сійӧ ичӧтик.

Кодзувкот, тыдалӧ, гӧгӧрвоис, мый отсӧг вылӧ колӧ корны ассьыс чой-воксӧ, рӧднясӧ: истӧг тув абу окота кольны вӧрӧ, бурджык, асланыс позйӧ кӧ кыскасны.

Эз на удит лесник эновтны шойччанінсӧ, кыдзи истӧг тув дорӧ чукӧртчисны дасысь унджык кодзувкот. Найӧ мыйкӧ дыра бергалісны еджыд тув дорын, сэсся надзӧникӧн мӧдісны кыскыны сійӧс коз пу дорӧ, кӧні тыдаліс кодзувкоткар.

Артельыд артель и эм, вермисны ӧд позъяныс кыскыны истӧг тувтӧ. Лесник дыр на видзӧдіс вӧрса зіль котыр вылӧ, кодъяс йӧз моз отсалӧны ӧта-мӧдныслы, ӧтув зільӧны, уджалӧны, медым овсис лӧсьыдджыка да гажаджыка.

Кӧть и посниӧсь кодзувкотъясыд, а гӧгӧрвоӧны, мый уджавтӧг нинӧм оз артмы.


Гижӧд
Пӧрӧм пу вылын шойччигӧн
Жанр: 

lkejrlkelkrgner klrjnelknfrkl ekjnrjkenfrej

1