×

Status message

Do something on load!

ПЕДӦРЫД ЕРЕТНИК


Ми вӧлім куим вок: медыджыдыс, Педӧр нима, вӧлі школаын нин велӧдчӧ, а ми, кык ичӧт вок, горт олам. Мамӧ удж вылын.

Миян бабӧ пыр висьталӧ: эмӧсь пӧ еретникъяс, найӧ пӧ быдтор тӧдӧны, коді мый вӧчӧ, налӧн пӧ син аканьыс увлань юра. А ми сылы веритам.

Миян батьӧлӧн вӧлі кыз книга, ыджыд вок сійӧс джадж пельӧсын видзис, мед ми ог косявлӧй. Джаджйыд ӧд вылын, ми, дерт, посни челядьыд огӧ сэтчӧ судзӧй. Вот ӧтчыд ми, кык ичӧт вок, горт олім. Ми тӧдам вӧлі, кытӧн куйлӧ батьӧлӧн кыз книгаыс, зэв окота вӧлі сэтысь лист-мӧд нетшыштны да петукъяс да карабъяс вӧчавны. Зэв ӧд мастерӧсь ми вӧлім петукъястӧ вӧчавны! Но кысь ещӧ босьтан бумагатӧ, бумага чир весиг миян эз вӧв. Оз вӧлі сійӧ туплясь сэки!

Но ми вӧлім сюсьӧсь — туйтӧ аддзим книга дорад! Пӧлатьсянь джадж кузя бауӧн мунім джадж пельӧсӧдзыс дай книгасьыд вит лист нетшыштім. Нетшыштім зэв ӧкуратнӧя, мед нетшыштӧмыслӧн оз тӧдчы туйыс. Сэсся лунтыр ми вӧчалім петукъяс, пызанъяс, карабъяс, тыкта пыжаясӧс — быдсяматорсӧ!

Педӧр локтіс школаысь да кутіс батьӧлысь книгасӧ видлавны, эгӧ-ӧ ми листъяссӧ нетшыштӧй (ми войдӧр гозысь-мӧдысь нетшыштлім нин!). Сэсся лёкысь миян вылӧ вувзьӧдчис: «Вит лист бара нетшыштӧмныдӧсь, икӧтаяс!» Ми чӧв олам да шензям: быдысьӧн сійӧ тӧдӧ, кымын лист ми нетшыштім и кытысь нетшыштім. Сё чудеса дивӧ! Мися, Педӧрыд еретник. Кӧсйим син аканьсӧ видзӧдлыны, увлань юра абу, но полам, скӧралӧ да.

Сэсся ӧти рытӧ мамӧлы и гусьӧникӧн висьталім: мися, Педӧрыд миян еретник. Мамӧ ёна и сераліс миян вылын. Педӧрыд, шуӧ мам, грамотнӧй. Книгаад ӧд быд лист бок пасйӧма, сы серти и тӧдӧ сійӧ, кутшӧм лист оз тырмы. Но ми мамӧлы эгӧ веритӧ: мед, мися, грамотнӧй кӧ — еретник сійӧ! Тӧдмалам коркӧ, увлань юра абу син аканьыс!

Коркӧ сэсся ме быдми да гӧгӧрвои, мый велӧдчӧм йӧзыд унатор тӧдӧны: му пытшкӧстӧ, сынӧдтӧ и космостӧ — быдторсӧ! Уна учёнӧйлысь ме видзӧдлі син аканьсӧ: абу сійӧ увлань юра, а вывлань юра сулалӧ-тотшвидзӧ. Сідзкӧ, миян бабӧыд сӧрліс еретникъяс йывсьыд да увлань юра син аканьяс йывсьыд. Дерт, сӧрліс!


Гижысь: 
Гижӧд
Педӧрыд еретник
Жанр: 

lkejrlkelkrgner klrjnelknfrkl ekjnrjkenfrej

1