«И-И-И...ГГО...ГГООО!..»

Прелюдия «Кӧрт» трилогияӧ


Шупкысис-пуксис парма весьт сап пемыд вой. Уліник кымӧръяс улиса ӧшйисны, вӧр-пу йылыскӧд ӧтлаӧ кысисны. Лӧнь. Шы оз сет ывлавыв, чӧв. Чирӧстлӧ сӧмын корсюрӧ нярборд, да шпоргывлӧ сылӧн небыда борд шыыс. Кӧнкӧ кылӧ омлялӧ пон. «Уу… ууу…» нюжӧдлас нюдза. И бара лӧнь.

Ыркыд нин. Узьысьӧс сарайысь керкаӧ пыртӧ — ныргорӧн шкоргӧны сэн. Би сюръя уйт весьтын юклӧдлӧ сынӧдсӧ, вешталӧ пемыдсӧ, мунӧ-катӧ ю кузя кыбӧда би: зяльскысьлӧ кылӧ азьлас кӧрт изйӧ; трачкӧдчӧ пыж нырын пес, шпургӧ-ломтысьӧ сирӧд пу; кыбысьыс ачыс — кочегарпу!.. Кыбӧда муніс, пемыдсӧ бӧрвывтіыс не сы мында колис.

Сикт сайын шуштӧм. Быд пу сайысь кажитчӧ ош, быд потшӧс бокысь — кыйӧдчысь шыш… Шуштӧм… Ок, кутшӧма тайӧ здук колӧ: мед эськӧ эсті, сьӧд парма шӧртіыс, вожӧдіс пемыдсӧ, кожӧдіс-муніс курьерскӧй поезд!.. Со нин, со!.. — кажитчӧ меным, кылӧ нин пельын сылӧн победнӧй гӧлӧса гӧрӧктӧм шыыс: и-и-и…го…гоо!!! — лэчыда чилӧстіс ылын. Дрӧгмуні-вӧрзис войся сук сынӧдыс, пемыдыс шемӧс моз шельӧдіс-пышйис, кытчӧкӧ ылӧ ӧтарвыв вешйис (чошкӧдіс пельсӧ чуалысь ош). Энлӧ, со — бара! (Тайӧ абу нин вӧт!) — «И-и-и…гго…гооо!..» Мый юрас гӧлӧсным горӧдам воча: «Воронко, сьпро!»


Гижысь: 
Гижӧд
«И-и-и...гго...ггооо!..»
Ӧшмӧс: 

lkejrlkelkrgner klrjnelknfrkl ekjnrjkenfrej

1