ӦНІЯ ДЫРЙИ

Натур серпастор


«...Йитчас сэк ичӧтик котыръя йӧз —
унакӧд, йӧз мукӧд тӧдсьыны кутас...»
(«Коми кыпӧд». 1921 во).

Мӧскуаса «Коминтерн»
Став Союзлы — камертон:
Кутшӧм сійӧ сетас тон,
Быд пельӧсӧ кылас «тоннь»!..

Арся лун. Кымӧра. Жуглясьӧ ывла. Зэрыштӧ... Посньыда, посньыда, вӧсньыдик си пож пыр, сысъялӧ-зэрӧ...

Ывлаын ар, но сьӧлӧмъясын — тувсовъя лун! Помӧсдін «яг вылын», гу йӧръяс дорын мыйкӧ ёна ызгӧны, жуӧны йӧз... «Нн-о-о-о...» — горӧдласны кылӧ, да бара.

— Мый нӧ сэн керсьӧны, увгӧны сідзи?!.

Котӧртӧны челядьяс кӧмтӧг. «Радио!»...

— Ра-а-дийо!..— горзӧны рада.

— Со мый!.. Радиомачта вӧлӧмкӧ лэптӧны! — шуӧны бокӧвӧй йӧз.

Вайисны-кыскисны кытыськӧ ылысь, нийӧдзысь, кымӧрӧдз мытшалан пуяс, сё нёль-ӧ-вит арӧса ниаяс мачтаяс вылӧ. Кодйисны гуяс. Мачталысь помъяссӧ пыдіӧдз му пытшкас мӧрччӧдісны-сюйисны. Кутчысисны. Кыпӧдӧны: «Нн-о-о-о...». Ӧтчыд, мӧдысь, унаысь... Коркӧ и команда «стой» воис. Сувтіс. «Стой тані! Сулав, эн вӧрзьы тэ, мукӧд муяскӧд йитӧдлӧн «часӧвӧй»!»

Сувтіс. Чурвидзӧ-сулалӧ: керкаяс, пожӧмъяс йывті ылісянь тыдалӧ, ёсьтысьӧ-кыпӧдчӧ енэжлань вылӧ, кыпӧдӧ-лэптӧ бӧрсяньыс тушатӧ, ловтӧ...

— Ок, джуджыд жӧ лои! Видзӧдлан — шапкаыд усьӧ!

— Пӧрӧ кӧ?!.

— Оз.

— Э-эй, кымӧрыс крукасис!..

— Мый нӧ сэсся?

— Мый? — Сёрнилысь шыяссӧ пондас ыліысь кутавны, юӧръяс миянлы вайны...

— Кысянь нӧ?

— Оз бара матісянь: Мӧскуа карсянь!

— Сюрс верст сайысь оз жӧ кыв?!

— Вот и оз. Аддзылан!..

— Аттӧ да дивӧ!

— Дивӧ и эм.

Лунвывсянь войвылӧ кымӧръяс тӧвзьӧны, ӧтмӧда-мӧднысӧ тойлалігтырйи, чуш-чаш лестукӧн мачта йылын косясьлӧны... Жувгӧны сюръяяс тӧв шыысь, шувгӧны гӧгӧр сулалан пуясыс гу йӧръяс вылын.

Шуштӧма пожӧмъяс шувгӧны, — пӧльяслысь олӧмсӧ жугыля мойдӧны... Бувгӧны-жургӧны збойпырысь мачтаяс, кымӧркӧд вензьӧны, выль олӧм ошкӧны...

— Э-эй! Кыланныд, пӧльяс, ті, гуясын куйлысьяс? Мый кутісны керны йылӧмыд, пияныд тіян!..


Гижысь: 
Гижӧд
Ӧнія дырйи
Гижан кад: 
Ӧшмӧс: 
Пасйӧд: 

Нийӧдз = ниа пу быдманін.

lkejrlkelkrgner klrjnelknfrkl ekjnrjkenfrej

1