ЖАЛЬ ТЭ МЕНЫМ, ЗАРНИ АНЬӦЙ


Менам нэмӧ (эз на вӧв и важӧн)
Коми кывъя вӧлі Коми муным,
Овліс сійӧ аслыснога гажӧн,
Да и йӧзыс ӧні моз эз юны.

Юргылісны рытын сьыланкывъяс,
Гудӧк ланьтліс сӧмын вой шӧр бӧрын.
Чужан грездса кузь кӧсаа нывъяс
Пукалӧны ӧнӧдз сьӧлӧм шӧрын.

Сиктса морт сэк оліс мӧскӧн-ыжӧн,
Россявтӧм на вӧлі кыйсян ордым,
Кыснасьлі на ачым ветки пыжӧн,
Войколавлі шоныд вӧр-ва ордын.

Ӧдйӧ лэбис каля бордъя кадыс,
Ӧвтчис меным Томлун чышъян помӧн...
Мыйлакӧ тай дзугсис олан ладыс,
Быттьӧ сьӧд кань вуджис мир туй вомӧн.

Тӧвся сад моз тыртӧммисны сиктъяс...
Кералісны ягъясысь ён пуяс...
Ми, поэтъяс, гижим сэки стихъяс,
Веськыд, мися, партиялӧн туйыс.

Кыдъя роч тэ талун, Коми парма,
Чужан кывтӧ вунӧдны нин кутін.
Медся коми карын — Сыктывкарын —
Весиг понйӧй рочӧн кутіс увтны.

Талун, Коми, кывсян Му шар пасьта,
Кыдзи-й кывсьӧ сетласьысь Мадонна.
Быдӧнлы со вузалӧны асьтӧ,
Коми йӧзлы кӧть тэ медся дона.

Тэнсьыд вывсьыд пӧрччӧдӧны платтьӧ,
Азыма зэв нёнялӧны нёньтӧ...
Кӧсйыссьӧ мен косьӧбтыны матьӧн,
Йӧлӧгаыс кыліс мед ООН-ӧдз.

Швед, француз, болгарин, итальянеч... —
Быдӧнлы тэ, озыр муӧй, колан.
Сэк жӧ, коми, регыд колян гачтӧг,
Патерант моз чужан муад олан.

Жаль, мый лоин проститутка туйӧ
Чужан парма — мусаӧй да шаньӧй.
Синва петмӧн жаль тэ, Коми муӧй —
Сёысь мырдӧналӧм Зарни Аньӧй.