ЗЭР БӦРЫН


Юяс вомӧн водзӧ келіс
Кӧмтӧм кока шоныд зэр...
Быттьӧ нывбабалӧн морӧс,
Кыпъялыштӧ мыссьӧм эрд.

Шонді югӧръясысь бипур
Лыдтӧм дзоридз ӧзтіс сэн.
Медся бура сьылӧм кузя
Лэбач котыр паніс вен.

Небыд вом доръяса тӧвру
Окалӧ быд турун сі.
Нимлунӧ моз гажӧдчӧны
Бобув, чирк и малязі.

Аслам быттьӧ тшӧтш жӧ нимлун:
Сывъяс кутлӧ менӧ эрд.
Да и со став ловъя лолыс
Меным петкӧдлӧ концерт.