ВӦТЪЯС
Кодыр олӧм оз сет синва И оз петкӧд весиг серам, Вӧтъясӧс кӧ морта-мортлы Висьтавлам, ми бур на керам. Вӧтӧн аддзыны зэв шогмӧ Унатор, мый синмӧн ӧлӧм, Мыйысь лун шӧрын ми полам И мый зывӧктӧдӧ сьӧлӧм. Вӧтӧн аддзыны зэв шогмӧ, Мый пеж иванейяс адас Кӧрт бедьяснас, кузь юрсинас Пырӧмаӧсь кулан кадас. Вӧтӧн аддзыны зэв шогмӧ, Кыдзи петмысьт вичко шӧрӧ Вывті равзӧ дяк апостол… Школяр шуӧ, дяк пӧ сӧрӧ. Вӧтӧн аддзыны зэв шогмӧ, Мый ми воим попӧс корны Кулысь дінӧ. Мунныс зэв дыш!— Мыйысь кӧ со-й пондіс ёрны! Вӧтӧн аддзыны зэв шогмӧ — Вотсӧ перйигӧн мужикысь Комын куимысь тай кучкис Станӧвӧй — эз комын кыкысь! Вӧтӧн аддзыны зэв шогмӧ, Мый кoр шог миянӧс суис, Суддялы ми кызь шайт вӧзйим, «Вит ур содтӧ на пӧ», — шуис. Вӧтӧн аддзыны зэв шогмӧ — Ылӧдлывлӧ крестьянаӧс Тамыш писар. — «Эмӧсь пиян — Школаӧ ог лэдзӧ наӧс!» Вӧтӧн аддзыны зэв шогмӧ — Сотчӧны тшыг кынӧмъясным; Кокъяснымӧс сёръяс вылӧ Лэпталӧмӧн куйлам асьным! Вӧтӧн аддзыны зэв шогмӧ Унатор, мый синмӧн ӧлӧм; Вӧтӧн аддзынытӧ позьӧ Дзик сідз, кыдзи пыр и вӧлӧм!
Гижысь: 
Гижӧд
Вӧтъяс
Жанр: 
Гижан кад: 

lkejrlkelkrgner klrjnelknfrkl ekjnrjkenfrej