ВЕЖЛАСЯНА ПОВОДДЯ

Помавтӧм повесьт



АСЛАНЫМ ЛАСТА ВЫЛЫН


Сэтшӧм бур, мича поводдя вӧлі мӧдӧдчигӧнным. Тувсов яр шондісьыс, шоныд лун тӧвсьыс ымралӧ ывла вылыс. Ытваыс косіс, ваыс юас шоналіс, да чайтім жӧ нин, мый лун-мӧд мысти мыкыс кульмыны пондас. Мӧдлапӧвса бадь йывъясыс талун нин со весь суда мында чурвидзӧны ва веркӧсас. Пышйис ваыс вӧрсьыс, лэччис-исковтіс гудыр ёльясӧн. Но, тӧдӧмысь, эз на ставыс. Кӧнкӧ козъя вӧръясас, гуа-гӧптаинъясас, кытчӧ шонді югӧрыс ӧдвакӧ писькӧдчыліс, колис на лымйыс. Сӧмын бура кузь, со татшӧм жӧ шоныд бӧрын помӧдз сетчас лымйыс, некытчӧ лоӧ воштысьнысӧ. Мӧд ва лоас, бара на юыс вывлань вӧрзьылас. Бара на зырӧдлас чериыс ойдӧм видзьяслӧн куръя йывъясӧ, мед чӧсмасьыштны ва улӧ веськалӧм веж туруннас. Мукӧд восӧ мӧд ваыс ыджыдджык на овлӧ тувсовъя ытвасьыс.

— Колӧ тэрмасьны, — шуи Лёнялы.— Тӧдан ӧд татчӧс приметасӧ. Кор мӧдлапӧвса баддьыс джынвыйӧ петас васьыс, сэки и пондас мыкыс кульмыны. Ставыс-ӧ дась тэнад?

— Эн шогсьы, ставыс дась. Колӧ сӧмын транспорттӧ корсьны.

Асывнас ме ветлі Вась Микӧл дорӧ. Рытнас кӧсйис нуӧдны. Лёнякӧд ми важӧн нин ӧтлаын ветлӧдчам. Сыкӧд миян вирным лӧсялӧ. Быд тулыс босьтам отпуск лун дас кежлӧ да мунам Мозын йывса ласта вылӧ. Коркӧ унджык кыйлам, гожӧмбыд кежлӧ... Коркӧ этшаджык. Он на ӧд быд пӧрйӧ поводдяас веськав, а корсюрӧ и кульман кадсӧ прӧзевайтлам, кыдз войдӧр во вӧлі. Мунім, ӧснуйтчим, палатка зэвтім, донкаяс, вугыръяс чӧвталім да быд здукӧ видлалам, виччысям, кор шедны кутас. Куим лун олім, да ваыс дзикӧдз усис. Баддьыс ласта вылас косӧ колис, да думайтам, кӧні нӧ мыкыс сэсся кульмыны пондас, кытчӧ сэсся зырасьны кутас. Пыжа тшукис ми дорӧ — мужик мӧдӧдчӧма кулӧмъяссӧ видлавны. Ті нӧ, шуӧ, мый тані вӧчанныд, мыкыс таво важӧн нин кульмис.

Он тӧд чериыслысь модасӧ — аслас юрӧн олӧ.

Вась Микӧл шуӧ, аслам пӧ бензиныс да сэтысь мынтысьны ковмас. Чериныд кӧ шедас пӧ, чериӧн и босьта. Чериӧн кӧ и чериӧн, а доз сетны лишнӧйыс миян эз жӧ вӧв дай. Сёйӧдсӧ бабаясным пуктісны дас лун кежлӧ, а этайӧ вылӧ пыксьӧны киӧн и кокӧн. Юны пӧ сэтчӧ мунанныд али мый? Воим, да ю дорӧдзыс колӧ на мыйтакӧ подӧн лэччыштны. Микӧл миянкӧд жӧ лӧсьӧдчис. Лэччыла, шуӧ, бипурвывса пӧсь чайсӧ юны. Муннысӧ эськӧ абу ылын, но оласным... нопъяс, бакъяс, ружьеяс. Зэв на и бур, Микӧлыс кӧ тшӧтш лэччылас, нуас кӧть мыйсюрӧ.

Юӧдзыс сэсся кыддза вӧр, зэв на жебиник коръя. Нырӧ ӧвтӧ кольӧм вося сісьмӧм кор дукнас. Рытъя сынӧдыс васӧд да ыркыд, а ыркыдыс кайӧ лым сылан ва гуранъяссьыс — быдлаын тай со сійӧ югыд раскас. Та вӧсна веськыда он на и мун, кытшлавны-гӧгравны колӧ. И быдлаын кӧч гӧгыль. Тӧвнас, тыдалӧ, ёна олӧмны тані, жыкруйтӧмны небыд кырся пипу понӧльяс дорас.

Петім ласта вылас. Вежыс сӧмын на заводитӧма чеччыны. Шоныд зэр колӧ ӧні туруныслы, а войтӧвтас кӧ, нямырмунас и сійӧ, мый петавлӧма нин. Ю вылас ру лэдзӧма, довъялӧ. Таті сэтшӧм нин векни юыс, мый кыснан кӧ шыбитны, мӧдлапӧвса лапкорйӧдзыс судзан.

Шондіыс саймовтчан выйын нин, сёр рыт, но ми первой эг палатканымӧс зэвтны кутчысьӧй, а донкаяс да вугыръяс чӧвталім, мед сэсся висьталасны миян, кор мыкыс шедны пондас. Войнас, гашкӧ, оз на, но асывводзладорыс ковмас нин ветлӧдлыны ласта кузяыс да корсьны, кытчӧ чукӧртчӧма чериыс, кутшӧм бадь дорын кульмыны лӧсьӧдчӧма. Быд во вежлалӧ кульманінсӧ, да корсьысьӧмыс на ӧд кутшӧм. Но, шуим, мед кыйӧдасны, чӧвталӧма тай. Палатка сэсся сувтӧдім. Сэтчӧ жӧ, важъяинас. Тупйӧднас юлань. Микӧл тайӧ каднас пес лэччӧдӧма вӧрсьыс да бипур нин вӧчӧма. Первой зэв полӧмпырысь мыччысис жебиник битор, сэсся ловзис-збоймис, вужляясас кутчысис, чукӧртіс ставнымӧс ас дорас. Лёня шуӧ, кор шыбитчим коз лапъяс вылӧ чай пузьӧмсӧ виччысигмоз:

— Но и бур, но и лӧсьыд жӧ нин тані. А, Олег, мый тэ шуан? Ме тай быттьӧ ас пайысь тайӧ здуксӧ кузь тӧвбыд виччыси-а.

— Тулыснас нин, — ме шуа, — кор ваыс воссис, тайӧ ластаыс, тайӧ дорӧсыс пондісны вӧтӧн петкӧдчывны. Вӧтаси ӧтчыд, тэкӧд жӧ быттьӧ кыйсям... Мыксӧ сы мында кыйим, ласта вылыс ставнас еджыд лоис. Асывнас висьталі гӧтырлы вӧт йывсьыс. Шуӧ, еджыд сьӧма чери пӧ уна сьӧм водзӧ. Кытысь нӧ эськӧ уна сьӧмыс. Совхозным киссян выйын, удждонсӧ весиг йӧлӧн да яйӧн сетыштлӧны. Став совхоз пасьта скӧтыс сӧмын ӧти карта тыр колис. Сьӧмыслысь серсӧ нин вунӧдлам. Гӧтыр киысь аддзывла ылісянь, да ог куж висьтавны, дас сюрса али ветымын сюрса билетыс. Но дак этійӧ... Даръясьны кутам ог? Ме тай ог кӧсйы-а. Микӧллы оз позь — руль сайын, а Лёнялӧн сӧптыс висьӧ.

— Некутшӧм сӧп менам оз вись. Мый лэрган нинӧм абусӧ?

— Ог, ог. Медводдза юкваӧдз нинӧм оз войтышт, век кӧть дультӧ сӧдзты.

Банка восьтім, тушёнка, чай пондім юны. Лёня песласьӧ лыс вылас, думайтчӧ, кӧнкӧ, кыдзи пычкыны менсьым доз. Гӧтырыс сылӧн, Линаыс, дозъяссӧ магазинсьыс меным и вайис. Тэ, шуӧ, крепыдджык та серти, командуйт ачыд. Эськӧ, гашкӧ, этшасӧ и кисьтышті Лёнялы, но сэки и Микӧлсӧ эз позь ӧтдортны. Ми абу сэтшӧм озырӧсь, мед сійӧс юктавны да нӧшта на и чери ведра вевсьӧн сетны. Тӧда, кутшӧм сылӧн «аслас бензиныс». Йӧйӧн миянӧс лыддьӧ. Микӧл гӧгӧрвоис жӧ, мый тані сылы нинӧм оз резсьы. Юис чайсӧ да лӧсьӧдчӧ нин бӧр гортланьӧ.

— Кывзы, Микӧл, — шуи.— Лун дас мыстиыс, гашкӧ, волан миянла? Бура сёрнитчам, кутшӧм лунӧ.

Микӧл балябӧжсӧ пондіс гыжъявны:

— Ог тӧд... Врад ли. Ремонтӧ колӧ сувтлыны.

— Пуксьыв, пуксьыв нӧшта, чайсӧ тай этша юин.

— Чай абу водка, уна он ю.

— Но, либӧ и, доз восьтам. Сэсся узьыштан, да быттьӧ нинӧм абу и вӧлӧма. Воан удж вылад.

— Воа эськӧ да.

— Да-да, — шуӧ Лёня.— Дознад, куим вылӧ кӧ, нинӧм он ло, ӧдвакӧ и син-пельыд вежсяс. Сідз, Олег?

— Тэнад тай, эн на юлы-а, вежсис нин. Югзис гӧгӧр. Кывворыд воссис и. Сідзкӧ, Микӧл, июньнас, коймӧд лунас, ми тэнӧ виччысям. Воигкежлад новлам оласнымӧс туй дорас, асьным сэні лоам. А?

— Он ӧд мын тіянысь, быть волы. Рытнас, инӧсь, воа.

Микӧл эз кут узьны сэсся, муніс. Ми кывзыштім кольӧм вося кор вывтіыс сылысь шура-шара мунӧмсӧ да пырим палаткааным.

Тані колӧ водзвыв висьтавны, мый Микӧлыд мила сідз эз и во. Татысь мунігӧн машинаыс кытчӧкӧ гӧптӧ буракодь зутшкысьӧма. Асьсӧ некыті весиг абу гыжнитӧма, а машинасӧ кытісюрӧ дойдалӧма ёнакодь. Мед узис, колӧкӧ, шулім ӧд. А ӧні, гашкӧ, и миянӧс мыжаӧн лыддьӧ да?


КАДНАС ЭГ ВОРССЬӦЙ


Садьми узьлан мешӧкам, а юр весьтын кузь кока ном лэбалӧ. Лёня дорӧ ветлас, ме дорӧ волас, а пуксьыны оз лысьт. Дзизгӧ и дзизгӧ. Петі мешӧксьыс, а сэсся и палаткасьыс гызымйи нёль кока подӧн. Шонді мачыс вылӧ нин качалӧма, но рытъя руыс век на некытчӧ абу вешйылӧма. Кыпӧдчыштӧма сӧмын, да шондіыс сы пыр ӧдва тӧдчӧ, быттьӧ гудыр ёль пыдӧсын ыргӧн тасьті. Лӧнь, шоныд. Видзӧдлі ю вылас, а сэні быттьӧ и ловъя некоді абу — тильс ни тёльс. Думышті — оз на кульмы. Мыкыс век на кӧнкӧ пыдын, гуясас, век на абу зэлалӧмны пӧк сюрӧсъясыс. Татшӧм бур поводдяӧ налы эськӧ бадь дорын сӧмын и зырасьны. Эз на во кадыс, сідзкӧ. Колӧ эськӧ донкаяссӧ видзӧдлыны, но ме водзвыв нин тӧда, мый сэні йӧршысь кындзи некоді оз ӧшав. Абу окота весиг и ва дорас лэччыны. Лёня мед кыялас, чеччас да.

А асылыс кутшӧм! Кӧнкӧ ва гуранъясас лягушаыс пондіс кульмыны, да, тӧдӧмысь, лунтыр пондасны вутшкыны. Найӧ и кылӧны сӧмын гӧгӧр. Посни кайясыс тай кылӧны жӧ эськӧ да, ю дор баддяс чукӧртчӧмны да шондісӧ, асывсӧ сьылӧдӧны. Мӧдлапӧлас кодъяскӧ тшӧтш кылӧны. Неважӧн на воӧмны, тыдалӧ. Варовитӧмыс да бак-ведраӧн клёнӧдчӧмыс кылӧ, а асьныс ру пырыс оз тыдавны. Ми моз жӧ, гашкӧ, дыр кежлӧ воисны, а гашкӧ, и войколӧн сӧмын.

Ме песла нин вӧрас пыралі, бипур нин тшынасьӧ, чайник ӧшӧді, а Лёня век на оз пет палаткасьыс. Думышті, чеччӧдны колӧ. Восьті палаткасӧ, горӧді: «Эй, узьысь мӧс, чеччы!» Шы ни тӧв, и палаткаын Лёня абу. Видзӧда, да вӧрсьыс петіс, пескӧн жӧ локтӧ.

— Мый нӧ эн чукӧсты?— юалӧ.

— А думышті, мися, гашкӧ, шоныд мешӧк пытшкас бабатӧ вӧтасян, да эг нин понды сорны.

— Кутшӧм баба, выльӧн на воим да. Донкаяссӧ эн видзӧдлы?

— Эг на вевъяв. Чайыс пузигкості мун тэ лэччыв.

Лэччис ки пӧлас капрон ведраӧн да эз дыр и ветлы.

— Со, — шуӧ, — медводдза юква миян лоас.

— Медводдза юква? Ме тӧда, кытчӧ кӧсъян бергӧдны. Тӧрыт нин юкваасим. Ноко, мый ведраад?

— Быд вугырын йӧрш, да со нӧшта куим мык.

Мыкъясыслысь ӧдйӧджык рушкуяссӧ писькӧді, абу-ӧ пӧктӧмӧсь нин, абу-ӧ кульмӧмны митӧг.

— Лёня вок, пӧкаӧсь на, пӧкаӧсь. Зэв нин кизьӧр пӧкыс. Дыр узьны сэсся кад оз ло. Вай чай юны пондам.

— А юквасӧ кор пуам?

— Юкваыд некытчӧ оз пышйы.

— Донкаяссӧ эськӧ, йӧрш понда кӧ, ваас оз сулав видзны — став нидзувсӧ нятшкасны да мыксӧ нинӧмӧн лоӧ вердны.

— Тӧлкӧн сёрнитан, но рытӧдзыс мед на кольласны.

Чай юим да корсим кольӧм воӧ дзеблӧм шатинъяснымӧс. Найӧ нӧшта на косьмӧмны, да ӧласьнысӧ оз ло сьӧкыд. Кор вуграсян заводсӧ ставсӧ дасьтім — домлалім, пысалім, свинечалім — пуксим ва дорас куритчыны. Кольӧм тулысӧ дзик жӧ тадзи заводитлім, сӧмын Лёня сэки эз куритчы, чӧвтчыліс мыйкӧ дыра кежлӧ. Аслыс вылӧ табаксӧ абу и босьтӧма вӧлі. Сэсся менсьым пондіс вомсьым нетшкыны, вай пӧ некымынысь кыскышта. Видзӧда да, меысь унджык пондіс шпуткыны. Кык пачка эз мӧд тырмыны лун кежлас.

— Тэ вай, братан, — шуи ӧтчыд, — либӧ дугӧдчы, либӧ мун аслыд табак корсь. Табакным бырас, да гортӧ ковмас мунны. Туй вылас петав, Мегйылас машина век ветлӧ.

— Мый вылӧ ньӧба? Менам весиг кӧпейка абу.

— Кӧпейка ӧні некодлӧн абу, весиг медся озыр банкирыслӧн. Менам эмышт... Сетла, инӧ.

Муніс. Час на эз коль, локтӧ нин.

— Транспортыс, — шуӧ, — кок дорам сувтіс, но эз и ковмы пуксьыны. Кооператоръяс нуӧны Мегйылӧ машина тыр груз, а вузасьысьыс менам сусед, Сергей. Мый нӧ, юалӧ, тані леган? Мися, чери кыям, а куритчанным помасис, да кӧсйи сиктас ветлыны. Сергейыс шуӧ, миян пӧ тані абу сӧмын табак, а ещӧ на мыйсюрӧ эм. Уна-ӧ пӧ колӧ табакыд? Дас пачка сетіс да кык водка доз. Сьӧмыд пӧ, кӧнкӧ, абу жӧ нин-а, коркӧ мӧдысь пӧ мынтысян. Бур сусед менам — унаысь нин мездыліс збетьсьыс.

Кольӧм восяыс ӧні дум вылам усис, да юалі Лёняыслысь:

— Таво, гашкӧ, эн жӧ табактӧг лок?

— Эг, дерт. Табакнад ме таво тані и гожйыны верма.

— Но, бур... Вай, сідзкӧ, вуграсьны босьтчылам. Пернапастӧ чӧвт да кор енмыслысь, мед став мыкыс вӧлі нека-пӧка. Кольӧм во тай, помнитан, кык вылӧ нёль банка чукӧртлім. Сэтшӧм закуска дорас пуксян гортса пызан саяд, да бабаыд унаысь юавлас: «Лёня, гашкӧ, нӧшта на?» А тэ и шуан: «Бур закусканад юрам весиг эз и жӧвгыв, да мый огыс».

— Пиньтӧ жӧ эськӧ кеслан да. Кымын во нин сыкӧд олам, да сэтшӧмтор эз на вӧвлы, мед ассяньыс доз сувтӧдліс ныр улам. Воа вӧлі чери дорысь, пывся, пукся пызан сайӧ, да первой корӧмнас оз на и сет. Абу пӧ дай ставыс, эг на пӧ тэнӧ виччысь. Но, Лина, — шуа, — ӧні сёр рыт да кытысь корся? Сет. Ваяс жӧ тай коркӧ.

— Чорыд тэнад бабаыд.

— Чоры-ыд... А тэнад Вераыд быттьӧ и небыдджык?

— Первой дозсӧ некор ог корлы, сӧмын видзӧдла сы вылӧ. Часлы, часлы, шуас. Ачыс на румка-мӧд юас да шуас, тэныд пӧ кыйны, миян сёйны... Но, бур эськӧ да. Тэ вай кывтыдсӧ видзӧдлы, а ме тані заводитла.

Лёня муніс лӧз капрон ведранас. Нидзувсӧ дзоляник банкаын зептас босьтіс. Ме кыпӧдалі сапӧг чӧръясӧс да келі пидзӧсӧдз ваас. Визув таті, да мед вугырыс ӧдйӧджык вӧяс, свинечсӧ содті и табсӧ вӧчи ыджыдджыкӧс кос коз чалльысь. Мыкыс шедны кутіс, но кольӧм во серти посниджык. Ведрасӧ эг босьт, да коді шедас, ласта вылас шыбита. Во куим сайын, Лёня сэки первойысь на мекӧд кыйсис, ассьым понйӧс босьтлі гаж пыдди. Тадзи жӧ, коді шедас, вывланьджык шыбита вӧлі. Бӧрнас понді ӧктыны, да мык кызь сӧмын лои. Ме чайтӧм серти, ведра джынтӧ кыйлі-а. Понйӧй водӧма выльӧн на петӧм эжӧрас да вом дорсӧ нюлӧ. Дерт, гӧгӧрвои, мыйла кыйӧм чери лыдыс чиніс, да мый нин сэсся, он ӧд ви.

Лёнялань бергӧдчывла, но ог гӧгӧрво, шедӧ оз сылы. Юавны-горӧдчывны абу окота — мыкыс вермас рӧзьнитчыны. Ми век сідз — кодлы кутас шедны, корам ӧта-мӧднымӧс. Лёня пыр меысь унджык кыйліс, шедӧ сылы чериыс. Мукӧддырйи дзик орччӧн ваас сулалам: сылы кыкнан вугырас кутчысьӧ, а ме и ӧтисӧ гежӧда кыпӧдла. Оз тай быдӧнлы ӧтмоза шед, вӧрысь кӧть ваысь. Сэсся шудыс бергӧдчылас жӧ тай мелань. Со ӧні кыкӧн да кыкӧн нетшка-кыпӧдала. Думышті, мися, оз-ӧ позь коймӧд вугыр на домны. Нинӧмла эськӧ горшасьнысӧ да, меть колӧ тӧдны. Кыдз думышті коймӧд вугыр йывсьыс, и шеднысӧ дугдіс. Ачым ачымӧс вомдзалі. Бытшки шатин помӧс нюйтас да муні Лёня дорӧ.

— Уна тай лэпталӧмыд, мык варыш.

— Эм нин, позьӧ и куритчыны.

— Меным тай дугдіс шеднысӧ... Бура эськӧ пондыліс да.

— Мӧдлаӧджык вешйы либӧ татчӧ лок. Комъяс на со шедісны.

Комыс чукӧртчылӧ жӧ тай мык кульманінас — пӧксӧ налысь кыйӧдӧ. Лёня шуӧ, комыс пӧ сідз лӧсьӧдчас, мед пӧкыс сылы веськыда вомас петӧ.

— Аддзылін али мый?— юала.

— Мый колӧ аддзывны. Сідз чайта-а.

— Но, тэ вай вугрась, шедӧ кӧ, а ме муна, йӧршъяссӧ пуа. Сэсся горӧда.

Мунігмоз черисӧ ассьым чукӧрті, ведра неуна эз тыр. Абу лёк, абу лёк. Понді пусьыны. Кольӧм во медводдза юквасӧ Лёня пуис. Синнас сійӧ матысянь оз аддзы ӧчкитӧг, да сов пыдди сода вӧлі вайӧма куим пачка. Шуӧ, кык первой буквасӧ пӧ аддзи да солӧн и чайті. Содасӧ вайӧма татчӧ. Сійӧн и солалас юквасӧ. Ме бокынджык чери кера. Шуӧ, зэв посни сов пӧ, гашкӧ, и бур. Пуӧм черисӧ мӧд тасьтіӧ босьталіс да вылітіыс соданас нӧшта на кӧдзӧма. Сёйны пондім. Лёня паньыштіс юквасӧ да мыйлакӧ ме вылӧ видзӧдӧ, вомнас тяпкӧдчӧ. Ноко, шуӧ, видлы, ме мыйкӧ нинӧм ог гӧгӧрво. Паньышті.

— Тэ нӧ татчӧ мый пуктін?

— Нинӧм лишнӧйсӧ эг. Картупель да лук.

— Кӧні солыд?

— Со нӧ.

— Тайӧ жӧ сода.

Юкваыс эз туй сёйны, но черисӧ вильӧдім жӧ тай, кӧдзыд ваӧн пожъёвтім да. Лёняӧс ме сэсся унаысь на крукыштлі. Мися, ноко, висьтав, кыдзи юквасӧ соданас солалін? А мый, шуӧ, сійӧстӧ нин казьтывны.

Юкваыс пусигкості мыксӧ понді бытшлавны. Сьӧмйӧмас кадыс уна кольӧ. Лёнялы тай дыш, да оз и сьӧмйысь. Шуӧ, коді сёяс, мед сійӧ и сьӧмйӧ. Энь мыкыслӧн вылысыс шыльыд, а айыслӧн, кор сьӧм паныдсӧ кинад нуӧдан, быттьӧ тертука. Тӧдӧмысь, мед кульмигӧныс эньсӧ бурджыка зыртіс. Кульмӧм бӧрас сэсся бӧр шыляммас.

Менам юква эз на пусьы, а Лёня локтӧ нин, горзыны эз ковмы.

— Дугдіс жӧ, — шуӧ.— Тайӧ кадас век дугӧдчыласны, шойччыштны вӧля сетласны ми коддьӧмыслы. Сьӧмъян? Но бур, тэнад бакӧ перво, сідзкӧ, и солыштам. Менсьым со кырлав жӧ сэсся.

Лёнялӧн ведраыс тырӧма жӧ, чукйӧн на весиг, дай мыкыс гырысьджык быттьӧ.

— Вай сёйыштам, васӧ кӧть панялам. Йӧршас кӧ кутчысям, рыт воас.

— Сійӧтӧ сідз, — шуӧ Лёня.— Йӧршнас чӧсмасьны-вильӧдчыны кадыс лоӧ на.

Кисьтім юквасӧ тасьтіӧ, да Лёня нырсӧ перво матӧдліс кайысь ру дорас. Ак, шуӧ, ак, йӧршыд юкватӧ вӧчас. Ме думысь, висьталӧ, картупельысь да лукйысь кындзи юкваӧ сэсся нинӧм оз и ков пуктыны. Переч ни, лаврӧвӧй кор ни. Найӧ юквасӧ торкасны сӧмын. Мукӧдыс тай пуктӧны-а.

— Кодсюрӧ на и сода пуктӧны, — содта татчӧ.

— Век на серавлан менӧ?

— Татшӧмторйыс ӧтпырйӧн юрсьыд оз пет.

— Но? Мый сэсся?— Лёня кежӧдӧ сёрнинымӧс.— Вай юква дорас... Этійӧсӧ...

Лёняысь, крукасяс кӧ, он мын. Лои пыравны ташкаам * , доз судзӧдны.

— Вӧльнӧйинас ӧд ок кутшӧм лӧсьыда юсьӧ, — шуӧ Лёня да чышкыштӧ вом дорсӧ.— Дерт, этшаникӧн, апетит восьтігмоз ли, кынмӧмысь ли. Ме вӧр-ваас петавла праздник вылӧ моз, да кыдз нӧ праздниксӧ пасйытӧг. Быть вылӧ, быть вылӧ.

— Этшаникӧн пӧ. Тэа-меа эськӧ ог тӧдӧй мерасӧ, воманым кӧ воас... Том на вӧлі, Бадьюын чери кыйим Микит Вась дядькӧд. Сэки медводдзаысь на сэтчӧ катлі, Бадьюас. Палӧй тьӧтыс, гӧтырыс Вась дядьлӧн, дозъяссӧ меным сетіс. Дзеб, шуӧ. Корны кутас, да этшаникӧн сетав. Сылӧн кытчӧдз ставыс оз быр, дугдыны оз куж. Ладнӧ, ладнӧ, шуи. Катім эськӧ бура — ӧтчыд эз казьтыв... Воим керкаӧ, катасим-ӧснуйтчим, пачсӧ ломтім, чай пузьӧдім, коркӧ и сёйны пуксим. Тэныд, шуӧ, гӧтыр нинӧм эз сетлы? Кисьта, кисьта, шуи, кык рунка. Юис. Сэсся ми узьны лӧсьӧдчим, а дозсӧ аслам юрлӧс улӧ пукті. Аддзыліс, дерт. Сӧмын кӧсйи кӧмкотӧс пӧрччыны, Вась дядь и шуӧ:

— Вот ог помнит, пыж доман кӧртсӧ шыбитім эг дорӧсас. Тэ он жӧ помнит? Лэччывны ковмас, а ме пӧрччыси нин.

Лэччылі, видзӧдлі. Ставыс бур, пыж якӧритӧма. Кайи, а Вась дядьлӧн вежсьӧма син-пельыс. Ме, шуӧ, пиук, гулькниті сэтысь, эн пӧ дӧзмы. Ме сэсся ташкасӧ, кӧні дозъясыс, босьті посводзсьыс да лэччӧді берегдорса баддяс. Бура дзеби ас думсьым. Вась дядь дыр на мыйкӧ аслыс сёрнитіс-бражжитіс да пезьдіс медбӧрын. Ме тшӧтш унмовси. Асывнас чеччим, да шуи Вась дядьлы, мися, ме сюмӧдла пырала вӧрас, нинӧмӧн бипурсӧ ырзьӧдны да. Юалі на, оз-ӧ юрыс вись. Висьӧ эськӧ да, шуӧ, гашкӧ, кисьтыштан? Ог дай ог, шуа сылы, колӧ чӧвтасьны петны. Вои керка дорӧ сюмӧд юкнас, видзӧда вывсянь: кодікӧ критша-кратшаӧн вадор баддьӧдыс ветлӧдлӧ. Кыз шум. Ош, думышті, мися, колӧ висьтавны Вась дядьыслы. Пыри — некоді абу. Первой чайті, мый ыджыд могнас петӧма. Ывлаас петі ружьеӧн нин. Эй, — горӧді, — коді сэні?.. Петіс бадьсьыс, кайис. Ньылӧмыс шорӧн киссьӧ. Гач пидзӧсыс ва, пидзӧсчань вылас, буракӧ, уялӧма. Гачсӧ тай косялӧма и. Лолыс тырӧма, пон моз кывсӧ кӧть ӧшӧдас.

— Мый, эн аддзы?

— Эг тай. Аддзылі тӧрыт, баддяс лэччӧдін-а.

— Но, лок. Менам аслам эм доз, да кисьта ӧти рунка, мед пыжас сувтан да кокыд эз тірав.

— Кык рунка, — зэв ӧдйӧ шуис Вась дядь.— Сэки бур лоас.

Ӧти ног да, мӧд ног да, кык луннас ставсӧ пычкис, мый вӧлі. Сэсся усьпаньвыв пуксис, да зэв бура и кыйсим.


КУЙӦД РУЫД — АБУ КЫНӦМПӦТ


Рытӧдзыс бара на кыйим. Весиг унджык на асъя дорсьыс. Орччӧн и сулалім, ӧти гуысь быттьӧ кыпӧдалім мыксӧ. Лёнялӧн кор мынас, шуӧ, абу менам пӧ вӧлӧма. Вояс сайын, кор татчӧдз туйыс эз на вӧв, пыжӧн волывлім. Гортсянь колӧ вӧлі лунтыр катны. Дерт, бензиныд уна коліс. Талунъя донъясӧн кӧ, абу рад и мотора пыж вылас. Мык чериыд, пыжад кӧть тырыс кый, бензин донсӧ некор оз вешты. А мед кӧть ӧні и машинаӧн воим, прӧдукта донсӧ оз жӧ вешты. Сэсся вина дозъясыд, табакыд. Гӧтыр колис дзик сьӧмтӧг. Но мед, шуӧ, аски, гашкӧ, сетыштасны миянлы. Сетӧмыс на ӧд сійӧ код тӧдас, мед и бюджет помысь вердӧны.

— На тэныд сё сюрс, — шуис сэки гӧтыр.— Бергӧдчы, кыдз кӧсъян.

Ме эг и чайт, мый татшӧм лышкыда сетас. Быттьӧ юаліс кӧ, уна-ӧ колӧ, та мында жӧ висьталі-а. Тӧда, мый сетас век этшаджык, мыйта кора. Муні магазинӧ, а сэні бабъяс ньӧбасьӧны. Кыкӧн.

— Ок эськӧ, — шуӧ ӧтиыс.— Этійӧ треска вылас дулльӧ петӧ да он на тай кватит.

— Мыйла нӧ он кватитыс?— шуӧ мӧдыс.— Пенсияыд тэнад ыджыд, мужикыд война вылад усьлі да. Сьӧмыд, кӧнкӧ, кӧшелёкад ружтӧ.

— На, на, видзӧдлы, ружтӧ али мый сэні вӧчӧ. Но? Уна-ӧ ньӧбан та вылӧ, а пенсияӧдз вежон на колӧ овны.

— Ме ньӧба ӧти лов. Мед. Кодрасян субӧт локтӧ. Гашкӧ, рӧдительяс отсыштасны сьӧкыд вой-лунсӧ турбыльтчыны.

— Отсыштасны, вомтӧ паськӧд. Тэ, дерт, ньӧбасян, пи-монь дорын олан да, а меным некод вомысь видзӧдны.

— Нылыд дорӧ мун дай, карас.

— Карад ме лун ог вермы овны, пыр жӧ и кокӧ пондас пыктавны. Сэсся найӧ бурджыка али мый олӧны? Менсьым на, воласны да, увтӧдӧны. Абу эськӧ жаль да, морттуйӧ мед волас-а.

— Ноко, вайлы пуртсӧ, — шуис сэсся треска ньӧбысьыс вузасьысьлы да вундіс ньӧбӧм лов джынсӧ.— На со, босьт. Верман кӧ, пенсиясьыд мынтысян. Кодрасьнысӧ кайлы. Миянлы тэкӧд некоді нин сэсся оз отсав, найӧ кӧ оз, шонъянъяс.

Ме ышловзи сӧмын — эз ло ладнӧ сьӧлӧм вылам.

Лёнялы талун долыд, чериыс шедыштіс да. Мыксӧ керигмоз мыйкӧ сьылӧ вомгорулас.

— Мый пуан?— юалӧ.

— Лунся йӧршыс нӧ мый, абу сёйӧд?

— Мыксӧ содтӧд пу — сійӧ яяджык, а йӧршнад тшыг мортыд верман и виньдыны. Пӧт вылӧ кӧ, нӧшта на-а... Поводдяыс вежсьыны окотитӧ... Видзӧдлы, кутшӧми рытыввылыс. Зэрмас, тыдалӧ.

Рытывладорсяньыс збыльысь мыйкӧ кайӧ, лым ли, зэр ли. Сьӧд тай-а. Сэтчӧ, сьӧдас и лӧсьӧдчӧма сунны шондіыс.

— Мед зэрмас, — шуа.— Мык кӧ босьтчӧма кульмыны, мед кӧть сэсся вывсянь из шер киссьӧ, нинӧм оз сор. Зэригӧныс бурджыка на босьтлӧ.

— Босьтнысӧ мед босьтӧ, а миянлы кутшӧмджык зэр улас йӧжгылясьнысӧ?

Ужнайтім да бара на лэччылім, но медводз кӧтасян олассӧ палаткаӧ пырталім. Зэрмас кӧ, шуам, мед сэсся сӧмын аслыным сэтчӧ сюйсьыны. Рӧмдіс, да Лёня весиг ӧчкинас эз кут аддзыны нидзувсӧ вугырас самавны, пыр менӧ чукӧстӧ. Со, шуӧ, бара нин сёйӧмны кӧ-а. На, ӧшйӧдышт кыдзкӧ.

— Кыдзсюрӧ ӧшйӧдӧмӧн лад оз ло. Чери оз сюр, а нидзувтӧ нуасны. Тэ вай кай, либӧ. Гашкӧ, и збыльысь зэрмас, а ӧні вӧрыс кос на, он кӧтась. Песла пырав, кытчӧкӧ коз улӧ чукӧрт.

Неуна ӧласьышті на шатиннам да кайи жӧ — эз кут шедны. Бипурсӧ ырзьӧді. Чайник пукті — Лёня чайтӧг оз вод. Да нӧшта на и корас кружкаас этійӧс чолькнитны бурджыка узьӧм вылӧ. Луннас кӧ — для аппетита, асывнас — мед помӧдз садьмыны... Кӧнкӧ тай со кылӧ керасьӧмыс.

Некымын во нин Лёняыскӧд ветлӧдчам. Быдӧнкӧд на ӧд он и ладмы. Слӧймывлісны чери кыйысь другъяс: кодкӧ горш, асланьысджык видзӧдӧ кыскыны, кодкӧ дыш, некытчӧ ассяньыс оз кватитчы, быдлаӧ колӧ нырнас люкӧдны. Овлӧ сідз, мый ӧти мортын горшыс да дышыс зэв на и бура ладмӧдчӧны. Татшӧмъяс йывсьыс шуӧны: дыш и азым. Ми ордӧ отпускъяс дырйиыс свӧяк волывлӧ карысь. Оз жӧ быд гожӧмӧ-а. Мунам, ветлам, шуӧ, чери кыйны. Ме эськӧ кыдз верма, киӧн и кокӧн пыкся сыкӧд кыйсьӧмысь да. Некутшӧм пӧльза абу сыысь. Сетьяс весавны оз кӧсйы, пыжын сынны дыш, весиг черисӧ весавны сямыс абу. Мый меным сэтшӧм тӧварышсьыс. А мый кыйлам, ставсӧ нуас. Оз кӧ вермы ставсӧ аскӧдыс кыскыны, водзвылас пӧсылка мӧдӧдас. Отпуск джын вӧр-ваӧд келалан татшӧмъясыскӧд, а гортад чери лов оз волы.

Лёня вӧрсьыс петіс:

— Мый нӧ би дорын пукалан?

— Дугдіс тай. Кыдзи тэ мунін, быттьӧ пуртӧн вундісны.

— Сідз и тӧді. Мися, менӧ ӧні песла мӧдӧдіс, а ачыс бипур дорӧ каяс. Чайсӧ пымтін?

— Ю лок. Со этійӧс на неунаӧн видлам.

— О-о!

— Мый, о! Тайӧ абу сійӧ, мый чайтан. Кансер яй тайӧ, кодӧс тай луннас восьтылім.

— Лешакыс тӧдӧ, мый сэсся тэнад серти этайӧыс лоӧ... А мый ме чайта, сійӧ оз ло али мый?

— Вермас лоны, ки вылад кӧ бипур гӧгӧрыс верман мунны.

— Эн челядясь. Но... Мыйла эськӧ и ог? Видзӧд.

Лёня ыкнитӧмӧн сувтіс ки вылас, коксӧ бӧрвыв кусыньтіс да мӧдіс, мӧдіс. Кодікӧ бокӧвӧй морт кӧ аддзис, мый тані сюра-тошка мужикъяс вӧчӧны, семдыліс эськӧ серамысла. Ме тай быттьӧ, ас пайысь, кочӧг бытшкытӧдз сералі-а. Но и Лёня!

— Нажӧвитін, другӧ, нажӧвитін, — шуа.— Тшӧкта кӧ, колӧкӧ, и пель вылад на скачӧн зырӧдан, да ог нин.

Шмонитыштны ӧд колӧ кык ӧткодьлы. Он кӧ, и йӧймыны верман лунтыр таб вылад видзӧдігӧн. Дыр на пукалім бипур дорас, а сьӧдыс рытывсяньыс кайӧ и кайӧ, зэр кыскӧ.

— Ме думысь, — шуӧ Лёня, — вежсяс и эм поводдяыс. Чеглӧм кокӧс пондіс нетшкыны. Сійӧ оз пӧръясь. Гожӧмнас тай асывъяссӧ вӧлі локта кантораӧ, да управ пыр юалас, кыдзи узи да эз-ӧ кокӧй юкав. Ме и шуа, мися, неуна пондыліс, но асъявывсӧ нин. Сідзкӧ, шуас татчӧ управ, рытланьыс сӧмын зэрыштас, вевъялам Матвей кулигасӧ курыштны. Тадзи кӧ лоас, шуас, удж бӧрын ме тэныд доз пукта. Луннас кӧ пӧ зэрас, — тэ меным. Мужикъяс гигзьӧны: ворссян пӧ, Александр Иванович. Зэртӧ, шуӧны, Лёнялӧн кокыс висьталас стӧча и таысь кындзи кылӧ, кор миян удждон сеталасны...

— Ноко, Лёня, висьтав?

— Илля лунӧдз эн и виччысьӧй. Лоӧ кӧ коркӧ мыйкӧ, сӧмын аванс неунаӧн. Начкӧй, Александр Иванович, куим-ӧ-нёль кук, да кӧть яйнас мыйтакӧ вештысянныд. Нӧшта чеглӧм кокӧй висьталӧ, мый туруныс таво лоас сӧмын джынйыс. Мыйӧн понданныд скӧтсӧ вердны?

— Да-а, другъяс, — шуӧ управ.— Дзикӧдз збетьӧ воим. Директорным тай пышйыны кӧсйӧ-а, совхозсӧ кисьтіс да. Дерт, колӧкӧ, и абу сӧмын сійӧ мыжаыс.

— Тэ вай мыжаӧс эн корсь, — скӧрмӧны мужикъяс.— Звӧнит, юав, кор сьӧмсӧ ваясны. Челядьнымӧс нинӧмӧн велӧдчынысӧ мӧдӧдны.

— Мый тӧлкыс звӧнитӧмсьыс, кор совхозным пельӧдзыс уджйӧзын. Висьталіс тай Лёня, Илля лунӧдз пӧ эн виччысьӧй.

— Лёнялӧн кок пӧлыс вермас на и ройӧ увтны. Сылы ӧд ставыс тайӧ шмонь. Гӧтырыс почтальон, да сійӧ миысь шудаджык, оз киссьӧм совхозысь абутӧм нажӧтка видзӧд.

Лёня шуӧ, ме пӧ сэксӧ эг нин некодарӧ кывлысь, пурасны сӧмын. Найӧс позьӧ гӧгӧрвоны, кор гӧтыръясыс унджыкыслӧн тшӧтш совхозничаяс. Скӧт дорын да кӧн да. Свежӧй куйӧд рунас али мый пӧтасны?


КРУТА ЗЭРМЫЛІС


Водім, да ме дыр на эг вермы унмовсьны, а Лёня, кылӧ, шкоргӧ нин. Шуда и эм мортыс, вермас кӧ татшӧм регыдӧн унмовсьны.

Сэсся тӧв ныр лыбис. Первой кылі, кыдзи сійӧ мӧдлапӧвса раскас воис — ыджыд шумӧн локтӧ вӧр-пу йывтіыс. Ён тӧв ныр, мӧдлапӧвсянь кӧ локтӧмыс кылӧ. Палатканым миян буретш ӧдзӧснас тӧлыслань. Вуджис ми дорӧ да пӧльтіс палатканымӧс гадь моз, весиг пельӧсъясыс гӧгрӧсмылісны.

— Лэбзям кӧ?— садьмӧма Лёня.— Качам кӧ палатканас и быдсӧн?

— Эн пов, пуясӧ ӧд домалім.

Сэсся гырысь войта зэр кучкис зэлалӧм брезентас, быттьӧ дрӧбйӧн сявкнитісны. Зэр шы улас коркӧ и унмовсим да эг нин кывлӧй, кор дугдӧма. Гашкӧ, и войбыд кисьтіс. Гашкӧ, и гымыштавліс на — нинӧм тай эг кывлӧй-а. Асывнас петі, да ывлаас ыркыд, но тӧвсӧ абу вежӧма. Ме полі, мый войтӧвтас и дыр кежлӧ. Сэки абу жаль и чериыс, кынмалан сӧмын. Кольӧм восӧ Лёнякӧд вой тӧв дырйи мӧдӧдчылім и бӧр гортӧ воим. Ни ӧти шоныд лун эз вӧв. Кытчӧ мунам кыйсьыны, сэтчӧ и бипур ӧзтам. Киыд сэтшӧма гегдас, мый шатинсӧ он вермы кутны. Би дорас и зырӧдлам, соталам кияснымӧс жар весьтас. Лёня задсӧ радейтӧ шонтыны, дась пуксьыны бипур вылас. Юавла сылысь, мися, мый нӧ задтӧ пӧжан, тэ ӧд абу баба? Косьта, шуӧ, ог пӧж. Пуксьылі лысва вылас, да кӧтасьӧма.

А ыркыд, ыркыд ывлаыс — колӧ бисӧ регыдджык пестыны. Лёня сійӧ узьысь мӧс — дась би дорӧ петавлӧ палаткасьыс. Кодкӧ воӧ тай, оз вӧлі кӧсйы некыдзи чеччыны да, лягушаӧс пуктылі кымӧс вылас. Эз на ӧд и садьмы дзик пырсӧ, а сэсся, петіс да, этійӧ, шуӧ, лёкторйыс кытыськӧ вачӧдӧма да лӧсьӧдчӧма сьылі вылам. Быдӧнлы шоныд колӧ... А вӧталі пӧ, быттьӧ ичӧтнам на, горшӧ висьӧ да, мамӧ компресс вӧчис спиртӧн. Туяна бумагасӧ эз аддзы, да сы пыдди дас тысячаа деньга шняпкис вата вылас. Тайӧ, шуис, зэв на пӧ и бур.

Шонтіс биыс лысьӧмӧс. Лёняӧс дыш садьмӧдны, но палаткаас пырті тшыналысь уль турун. Видзӧдлам, мый лоӧ... Пукала би дорас да кыла: «Олег, Олег, чеччы, сотчам!» Сэсся быйк петіс палаткасьыс, аддзис менӧ да пычиктіс:

— Но тэ и лӧстӧм бӧлбан. Морт ногӧн эн вермы чуксавны.

— Мый нин ӧні вӧталін?— шуа, а сэсся быттьӧ дорйысьышті.— Номйыс тай уна пырӧма, да мед тэнӧ оз садьмӧдны, мися, тшынас вӧчла. Дыр узьны некор, ачыд тӧдан. Мыкыс со бӧрдӧ бадь дорас. Мый нӧ пӧ, шуӧны, тайӧяс сэсся оз локны, нидзув вылӧ номсӧдлӧ-а? Вай пӧсь чайсӧ сыркнит, да мед тури-бариӧн вӧлі лэччӧма шатин дорад. Ме юи нин да лэчча-а.

— Энлы, энлы. Вай садьмӧд менӧ, а то тэнад тшынасыд сӧмын чеччӧдіс. Ыркыд на и. Вирӧй сукмӧма, оз пышъяв сӧнъясӧд.

— Чайнас кизьӧрмас. Ог кисьт, кытчӧдз ведра чери он кый.

— Он кӧ и эн, ёнасӧ ог жӧ и кӧсйы быттьӧ. Мися, гашкӧ, ваас сулавны шоныдджык лоас, да сы пондысь-а. Пӧлинӧ... Дум вылам усис: Митрей вежайӧлӧн талун кулан луныс. Бур эськӧ, казьтыштам кӧ шоныд бипур дорас.

— Пӧръясян эськӧ да...

— Ог, ог. Тувсов Микӧла коймӧд лунӧ кувсьыліс. Кыдз помнита, рытнас на батькӧд кулӧмъяс кыйны ветлісны. Шедӧма вӧлі чериыс. Бать шуӧма братаныслы, мед пӧ тэ ордын овлӧ чериыс, асывнас пӧ и вола аслам пайла. Мунас асывнас, а мама-нылаыс кыкнанныс клыпью бӧрдӧны. Асекритушко, шуӧ пӧ кӧзяйкаыс, Митрей вокыд ӧд кын. Бать тшукӧдчас быттьӧ век на узьысь вокыслы пельпомас, а мӧдыс ставнас вӧрзяс.

Дмитрий Алексеевич нэмсӧ велӧдіс сиктаным начальнӧй школаын. Ме сы дорын жӧ нёль восӧ велӧдчи. Век беддьӧн ветлӧдліс, кокас ранитчылӧма да. Помнита, сентябр первой луннас бать нуӧдіс школаас. Кильчӧ дорас киасисны. Со, шуис бать, нӧшта ӧти зырымбедь тэныд, велӧд, колӧкӧ. Ме думысь пӧ, грамотаыс сибдыны кутас талы.

— Мыйӧн тӧдан?

— Бабыслысь вом пытшкӧссьыс пиньсӧ лыддьыны кужӧ нин, уна-ӧ кольӧма. Ӧтиыс чунясьӧ бабыс вомын, а мӧдыслы любӧ. Ушлӧй морт пӧ лоӧ, шуӧ бабыс. Мед эськӧ да. Ен ки вылӧ.

— Но, мун пыр школаас, ушлӧй морт, а ми тані батьыдкӧд сёрнитыштам, — нюмдіс сэсся Митрей дядь.

Нёль во чӧж сэсся мыркӧдіс миянӧс Дмитрий Алексеевич. Витӧн и велӧдчим сӧмын, ставным лучшӧйясӧн петім. Помнита, коді уроксӧ оз тӧд, сэтчӧдз янӧдлас да изгаляйтчас ичӧт морт вылас, сутшъявтӧдз и бӧрдтӧдз воштылас. А-а, — шуас сэки, — имитіс? Он и лысьт сэсся школаӧ локны урок велӧдтӧг... А коді бура тӧдӧ, ошкас да ошкас. Шуас на, батьтӧ пӧ аддзӧдлыны колӧ, мед вӧжжитӧ оз лэдз.

Казьтыштім Лёнякӧд Дмитрий Алексеевичӧс, но сэсся колӧ и лэччывны ва дорас. Сы вылӧ кӧ локтӧма.


ПОСНИ КЕЛЬЧИЫД ДОЗ ВЫЛӦ ОЗ ТУЙ


Тадзи кӧ кутас шедны, кыдзи талун, лун-мӧд-коймӧдӧн и тырасны бакъясным. Но мед, миян целопан кулёкъяс на эмӧсь, быдӧ матӧ ведраӧн тӧрас. Ме тай висьтавлі нин — Лёня пыр меысь унджык кыяс. Сылы и комыс на шедлӧ корсюрӧ. Меным тай со ӧти кебӧс шедіс, кык весь кузьта. Орччӧн сулалам ласта вылас, пидзӧсӧдзным ваынӧсь. Лёня сійӧ пыр мыйкӧ висьталӧ, тыдалӧ, шомыс юрас кольӧма на.

— Ноко, мун лэччӧдлы приёмниксӧ, — шуа.— Дышӧдіс сэсся тэнӧ кывзыны. Сэні, гашкӧ, мыйкӧ коланаӧс висьталасны.

Квайт батарея колӧ приёмникас, да найӧс судзӧдӧмыс на ӧд кутшӧм вӧлі. Эз батареяяссӧ, а ньӧбӧм вылас сьӧмсӧ. Коммерсантъяс волісны машинасянь вузасьны, и батареясӧ вайӧмны. Но доныс, доныс! Ӧтиыс куим тысяча шайт, сідзкӧ, квайт вылас колӧ дас кӧкъямыс тысяча. Ми Лёнякӧд гӧтыръясным дорӧ. Эз сетны... Приёмниктӧгыс пӧ шедас чериыд. Дай абу нянь пӧ, тшыглы сытӧг он кулӧй. Но, мый, — шуа Лёнялы, — колӧ эськӧ транзисторыс гаж вылад да... Думайтчыв, кытысь корсьны сьӧмсӧ, тайӧяс ӧд сэсся мунасны.

— Тӧдан мый?— вӧзйис Лёня.— Менам гортын эм ньылӧм косьтан вентилятор. Чуланысь ог пыртлӧй. Ме сійӧн нинӧм ог вӧч, а гӧтыр, колӧкӧ, и вунӧдіс нин сы йылысь да ӧдвакӧ кватитчас. Коммерсантъяс, сёрнитӧны йӧзыс, быдкутшӧм электротӧварсӧ ньӧбасны. Торйӧн нин кӧні мотор бергалӧ.

— Котӧртлы ӧдйӧ, а ме тайӧясӧс кутыштла мунӧмсьыс. Со тай, буракӧ, лӧсьӧдчӧмны нин пӧдласьны.

Матыстчи фургон дорас:

— Менам тӧвар эм, колӧ кӧ быттьӧ.

— Кутшӧм-сэтшӧм тӧвар?

— Водзвыв ог висьтав. Виччысьыштлӧй да асьныд аддзанныд.

— Ладнӧ. Кӧсйим нин эськӧ вӧрзьыны да.

Лёня петкӧдчис: ки пӧлас сумка, а сэтысь мыччасьӧ вентиляторыс.

— Ноко, ноко, мый сэні?— ловзис купечыд.

Лёня эрдӧдӧ тӧварсӧ. Кооператор дыр видзӧдӧ вывсянь, фургонсяньыс, думайтчӧ, кӧнкӧ, донысь-ӧ вермас вузавны кодлыкӧ.

— Но и... уна-ӧ кӧсъянныд таысь?

— Чери кыйны ветлыны лӧсьӧдчим, а приёмниканым батареяыс абу. Квайт колӧ, коді тай гӧгрӧсыс да медыджыдыс.

— Но! На, босьтӧй. Ме талун лышкыд, да «Прима» на сета дас пачка.

— Но и бур, но и сё бур, — ӧта-мӧдлы вежмӧн шуалам.— Зэв ыджыд аттьӧ тіянлы.

Дерт, лышкыд, куим пӧв донысьджык кӧ вузалас вентиляторсӧ.

Лёня локтӧ. Приёмниксӧ восьтӧма да музыкаӧн варгыльтӧ юланьыс. Пуктіс транзисторсӧ эжа вылас: кывзы, шуӧ, да мед на и мыкыс унджык чукӧртчас музыка дорас. Ме вежи волнасӧ да «Коми горӧ» веськалі — буретш бӧръя юӧръяс висьталӧны. Сэсся поводдя юӧртісны. Сійӧ пӧ вежласяна лоас, ӧтилаті-мӧдлаті зэрыштас, петас рытыв-лун тӧв. Татшӧм тӧв миян и колӧ, но зэрыс эськӧ эз ков. Гашкӧ, ӧтилаті-мӧдлаті кӧ, вермам и косӧн кольны.

— Миян пыр вежласяна поводдяыд, — шуӧ Лёня.— Кыдзи олӧмыс вежласьӧ — тытчӧ-татчӧ, пӧлясьысь тӧв ныр моз, сідз и поводдяыс усьпаньвыв оз пуксьыв. Тані миян эськӧ бур на, сетӧ на кыйсьыны. И овнысӧ миян тані абу на сэтшӧм лёк. Вевт улын узьлам, шоныд мешӧк пытшкын. Кынӧмпӧт эм, табак эм, музыка кывзам, черитор кыйыштам. Мый сэсся колӧ?

— Тэ, Лёня, талунъя лунӧн сӧмын олан. Регыд помасяс тайӧ мойдыд. Воан гортад, мунан кантораад, а сэні удждон пыдди бара вый да яй сетӧны. Мыйӧн сэсся совхозыс мынтысяс. Отделениесьыс стада джынсӧ вердісны нин, да сэсся и яйнас оз кутны вермыны мынтысьны. Рушкутӧ ковмас потшӧс йылӧ шӧтны. Тайӧ поводдя-олӧмыс дыр на кутас вежласьны, кытчӧдз вежӧраджык йӧз оз кутчысьны рульсӧ бергӧдлыны. Ӧнія, власьт дорӧ азым синма йӧзыс, сӧмын ӧта-мӧдсӧ йирӧны кузь шайт вӧсна. Со пӧ неважӧн бара виӧмаӧсь кутшӧмкӧ нималана предпринимательӧс. Депутатӧн на Думаас вӧлӧма. Миян эськӧ жаль абу да, мед, колӧкӧ, пурсьӧны, но сыын омӧльыс, мый пурлынысӧ веськавлӧны и бур войтырыс.

Меным сэсся, гашкӧ, кокньыдджык лоас — арнас пенсия вылӧ пета, да оз-ӧ кӧть сійӧс пондыны сьӧмӧн сетны, дай ас кадӧ. Миян сиктса пенсионеръяслы тай, индӧм лун воас да, ныр улӧдзныс ваясны. Заслужитӧма, мый сэсся шуан татчӧ. Ов да радуйтчы. Мукӧдыслӧн абу на и ичӧт пенсияыс, ог нин шу фронтовикъяс йывсьыд. Миян быд мужик, том и пӧрысь, тӧдӧ быд пенсионерлысь, баблысь кӧть дедлысь, пенсия лунсӧ. Тӧдӧны, код дорӧ позьӧ пыравны удждысьны. Водзӧссӧ мынтӧмыс гежӧда овлӧ-а. Яйӧн ли выйӧн мынтысясны, кор совхозыс сетлӧ, либӧ чериӧн, тшӧкыда — кыйтӧмнас на. Дерт, оз ставӧн доз вылӧ корны. Кодкӧ и табак вылӧ, чай-сакар вылӧ ли. Ёна, палявлытӧг юысьыс миян кыкӧн ли куимӧн, мукӧдыс мера тӧдӧны. Татчӧ мӧдӧдчытӧдз аддзылі: Петыр Сашка сувтӧдіс улич шӧрас Парась бабӧс да шуӧ:

— Бур лун, Спиридоновна! Кыдз нин олан-вылан? Ваыс воссис, а свежӧй чериыс вомад воліс эз кӧть на? Эз на? Ме тӧрыт на кулӧмъяс вӧйталі да рытнас видлыны петала. Мый шедас, ставсӧ тэныд и вая, сӧмын ӧні сетлы меным доз вылӧ. Пенсиятӧ тай тӧрыт почтальоныд пыртіс, аддзылі.

— Чери вылад верма эськӧ сетны, сӧмын посни ёкыш да кельчи эн вай. Гашкӧ, оз и шед нинӧмыс, а вузасян нин. На со, кӧшелёкам даса и эм сӧмын.

Аскинас Парась бабыс меным воча лои, да юалі, мися, Петыр Сашкаыс пыртліс эз черисӧ. Вайис пӧ, вайис, ведраыс пӧ эзджык вӧв тыр. Абу на и лёк чериыс: шӧри вундана сир да абу ёна посни ёкыш. Вайис, вайис мортыс.

Шуалӧ тайӧс Парась баб, а ёна ыджыд радлун оз жӧ тӧдчы мортыслӧн.


ДУМСЬЫНЫМ ЮГЫДЛАНЬ ЖӦ МУНІМ


Лёня орччӧн вуграсьӧ, воськов дасӧн улынджык. Шедӧ мыкыс, сӧмын нидзувтӧ нетшкӧ. Ласта вылын романсъяс сьылӧны, классика ворсӧны — приёмникным шыалӧ, кылӧ. Кор этійӧ йӧй рокъясыс кывлысясны, мыкыс весиг шедӧмсьыс дугӧдчылас, эновтлас баддя дорӧссӧ. Тыдалӧ, ланьтӧдчылас кытчӧкӧ йираинӧджык, а сэсся тай бӧр жӧ воасны. Унджыкыслӧн кульмыссьӧма нин, пӧктӧмӧсь. Найӧ сэсся пӧк сюрӧсъяссӧ пожъявны пондасны. Лун куим-нёльсӧ зэв на горшӧсь, кор пожъясьӧны, шедӧ на сэки. Сэсся мунасны кульманінсьыс, ӧтчукӧрӧн катчӧс ӧдӧбтасны, кынӧмпӧтсӧ корсигмоз да гожйигвыв пырасны посни ю-ёльӧ.

Дӧзман жӧ тай сэсся дырсӧ таб вылас видзӧдны. Шонді на сэтчӧ петіс да ӧзтіс быттьӧ ва веркӧссӧ. Табйыс веськавлас шонді югӧр улас, да вошлас весиг син водзсьыд — некӧн абу. Синмӧс и ачымӧс шойччӧдігмоз пукси приёмник дорас, музыка дорас, а сэсся и гатшӧн шыбитчи ызӧн вылас. Горӧді Лёнялы:

— Тэ вугрась, вугрась, колӧкӧ, а ме шойччышта.

— Мыйӧн нӧ мудзин? Дыш висьӧмыд кӧ босьтіс-а... Менӧ эськӧ сійӧ жӧ мучитас, да тэ ӧд он эскы... Менам бабаӧй моз жӧ. Менсьым некутшӧм висьӧм оз кӧсйы тӧдны, кытчӧдз кок йывсьым ог пӧр. Сэки выльӧн градусник ётшкас киняулам. Видзӧдлас да, о-о, шуӧ, тэнад тай зэв вылын температураыд, ковмас мыйӧнкӧ юктавны. Ме сылы: «Горш висьӧ, да компресс пуктыв водкаӧн, шебрасьла сэсся. Бур эськӧ, шула, водкасӧ кӧ перечӧн рунка-мӧд». Ме тэныд, шуас воча, рунка-мӧд петкӧдла... Компресс вылас кӧ войтӧдышта, зэв нин бур. Тэныд, гашкӧ, компресс жӧ пуктывны? Лэдзас висьӧмтӧ регыдӧн.

Лёняӧс ме эг нин кывзы, а казьтышті ассьым колхоз кадся челядьдырӧс. Музыкаыс на сэсся сэтшӧм — кытчӧкӧ быттьӧ важас, кольӧмаас йӧткылӧ, казьтывны тшӧктӧ... Уджалысь киыд миян колхозын некор эз тырмыв. Талун тай со, удж вылӧ кӧ он пет, бригадир пернапас чӧвтас-а. Ӧтилы кӧть, шуӧ, талунъяысь пӧденнӧй оз ков мынтыны... Меным дас кык арӧс тырис, да быд гожӧм пастукавны понді. Колхозлы бур, и мамлы отсӧг — лишнӧй трудоденьыд Сибырӧ оз вӧтлы. Вӧв сетісны, кодӧс ме ачым видзи-йирсьӧді-юкталі. Аслам вӧв лои, гожӧмбыд кежлӧ. Сідзсӧ эськӧ сӧмын луннас колӧ меным пастукавны, а войяссӧ ӧчередьӧн аслыныс лысьтысьысьяслы вӧлі шуӧма. Но налӧн унджыкыслӧн посни челядь, сэсся скӧт, гортдор удж. Унаысь ковмыліс на пыдди войяссӧ пӧскӧтина вылас коллявны. Вежӧн меным нӧк ваясны, сакар, йӧв кисьтасны лысьтысьӧм бӧрас.

Ставыс эськӧ бур, да ӧшкыскӧд, Колокольчикӧн шуисны, дыр эг воӧй ӧти кывйӧ. Первойсӧ некыдз эз матӧд ас дінас, аддзас менӧ да лёкысь буксӧ. Сэсся сакарнам понді мевйӧдны, да сэтчӧ велаліс. Ачым эськӧ сэтшӧма кӧсъя сакарсӧ нёнявны, а ӧшкыслы, вӧлӧм, колӧджык на. Первой вӧв вывсянь и мыччи сакарторсӧ — пола. Босьтіс вомас да некыдз оз гӧгӧрво, мый ме сылы сэтшӧмторсӧ сеті. Тешкодя нямлясьӧ, синъяссӧ кылӧдлас и. Сідз сэсся сакар дорас велӧді, мый мӧсъяссӧ вунӧдіс, менӧ кутіс вӧдитны.

Арланьыс войясыс ыркыдӧсь лоины. Узьлынысӧ сарайтор эськӧ эм, тьӧскысь тувйыштлӧмаӧсь, но пачтӧм. Войсӧ коллявны ме ӧшкыс дорӧ куті лӧсьӧдчывны: вольсышта сы бокӧ кос турун, ляскыся мышнам бокланьыс — шоныд. Асывнас водз вӧтла скӧтсӧ, ачым сэсся лэчча вуграсьны. Ӧти местаын век кыйся. Ытваыс коркӧ ыджыд пожӧм пӧрӧдлӧма, вужлянас и быдсӧн, йылыс ва горулас нин. Кела пожӧм кузяыс, да ваыс пидзӧсӧдз. Сэтысянь и вуграся, сэтчӧ и саммӧдӧма черисӧ. Коркӧ ӧтчыд ускӧттьӧ менӧ суис. Вуграся вӧлі пожӧм йывсяньыс, пидзӧсӧдз ваын, зэв ыджыд сир кӧмтӧм кокӧд кватитіс да пондіс ваас кыскыны. Ме кутчыси пожӧм чалляс да горза, ог на кӧсйы ва улас пырны. Эг сетчы, лэдзис, сӧмын кок лап вылысладорсьыс кусӧ ыджыдакодь кульыштӧма. Вирӧн ойді. Пӧрччи улыс дӧрӧмӧс да тӧби дойсӧ, а сэсся вӧв вылӧ дай гортӧ.

Сійӧ гожӧмсӧ менам пастукавсис. Районнӧй больничаын кык тӧлысь видзисны, сэсся гортын на мый дыра чотікті. Мамӧысь гусьӧн ветлывлі жӧ эськӧ да, вуграси аслам пожӧм дорын. Первойсӧ вои да шай-паймуні — юдор видз вывсьыс унджык турунсӧ вердӧмаӧсь скӧтыслы. Дас кык зорӧд лыдди, а туруныс сійӧ и эм, мый кольӧма пыкӧдъяс вылас. Со ӧд кутшӧм пастуктӧг олӧмыд. Сійӧ воӧ скӧтӧс йирсьӧдігӧн миян колхозын медуна йӧв лысьтӧмны быд мӧслысь. Меным козин сетлісны весиг: куим килограмм нӧк, курӧг кольксӧ дасӧс дай сандали гоз.

Мыйла тайӧс казьтыла? Сы вӧсна, мый колхозыслӧн нимыс вӧлі «Югыдлань». Век югыдлань, югыдлань мунім, а сійӧс эг и сулӧй, кыдз кӧза некор оз су ныр водзас бедь йылӧ пысалӧм корӧсь, ӧд сійӧс домӧма сюрас. Миян колхозным некор тыр-бура эз овлы. Кыдз помнита быдман кадӧс, век тшыг нисьӧ пӧт. Бӧрнас эськӧ босьтчылім, трактор и локомобиль вайӧдлісны колхозас, тракторысла ачым на тшӧтш ветлі и... Армияын танкистӧн вӧлі, да предным менӧ и мӧдӧдліс. Сетісны тӧварышӧс, Педӧр Васьӧс.

Бура ветлім, нинӧм лёкыс эз су, мый сӧмын тракторнас нин бӧрсӧ локтігӧн поводдяыс вывті кӧдзыд слӧймис-а. Помнита, Крещенньӧлы паныда войӧ кутшӧмкӧ сиктӧ воим, абу на весиг асланым районын... Ӧти керка сӧмын биа. Сэні миян индісны магазин, а вузасьысьыс пӧ мӧдар джынъяс и олӧ. Мунім тракторнаным. Битӧм, узьӧны. Зэв нин ёна кынмим, да быть колі магазинас пыравны шонтысянла. Мыйкӧ на и гӧтшкыштны эськӧ колӧ, тшыгӧсь ӧд. Двигательсӧ, дерт, эг кусӧдӧй. Ме кайи кильчӧ вылас — ӧдзӧсыс пыдісянь калича. Полӧмпырысь гыжъялышті ӧдзӧссӧ надзӧник, но мед быттьӧ кылісны жӧ-а. Некымынысь тадзсӧ вӧчи, но пытшкас шы сетысь эз ло ни би эз ӧзйы. Сэсся чунь лутшнам «тук-тук-тук» вӧчи, быд дырйи гораджыка и гораджыка. Век на нинӧм, кӧть эськӧ пыдын кылӧны гӧлӧсъяс, весиг кодікӧ быттьӧ кызӧктіс ӧдзӧс саяс. Кулакнам понді лӧзгыны, важ кильчӧыс быттьӧ вӧрзьыліс весиг. Пола жӧ ӧдзӧссӧ жугӧдӧмысь. Пыдын шер ни шебер эз вӧчлыны, а сёрни век кылӧ. Ме суловкери, кывзысьышті, но кӧдзыдыс оз сет прӧстӧсӧ сулавны. Вӧрны тшӧктӧ.

Бара на игӧдчи, ӧдзӧссӧ чужъялышті, да повзи жӧ сэсся — друг кӧзяиныс петас пищальӧн. Ладнӧ, думышті, Васьсӧ мӧдӧдла, мед сійӧ шонтысяс. Видзӧдлі тракторланьыс, а сы дорӧ тырыс йӧз чукӧртчӧмны сиктсаыс, варовитӧны мыйкӧ ас костаныс. «Эз восьтны, — шуи Васьлы, — вывтісӧ сэсся ог лысьт гымӧдны — керкаыс киссяс, жебиник да». «Оз и восьтны, — кывлысис кодкӧ йӧз чукӧрас.— Дарьяыс дас во нин продавечалӧ, да сэтшӧмтор эз на вӧвлы, мед кодлыкӧ войын восьтыліс. Тіян кӧ восьтас, историяӧ пыранныд». «Кусӧд тракторсӧ», — шуӧ татчӧ Педӧр Вась. «Мый нин думыштін?» «Кусӧд, а сэсся пускачсӧ заведит. Мед торгӧ, кытчӧдз оз пымав. Пымалас, да кусӧдлы. Сэсся бара заведит. Биасясны, эн шог».

Пускач шыыс чашнитіс-поткӧдіс кынмӧм-йизьӧм войся сынӧдсӧ, шеныштіс чӧв-лӧньсӧ ылӧ-ылӧ, ыб чулькъяс саяс. Пон чукӧрыс, коді воліс йӧзыскӧд, бӧрыньтчис пывсянъяс дорланьыс, а сиктас эз коль битӧг ни ӧти ӧшинь. Сӧмын продавечыслысь ӧшиньяссӧ век на тӧлысь югзьӧдіс. Кор нёльӧдысь заведиті пускачсӧ, Дарьялӧн ӧшиняс югӧртор сявкнитіс, регыд чепӧсйис и ачыс.

— Коньӧръяс, гегдінныд, кӧнкӧ, дыр эг восьт да? Локтӧй, локтӧй, зӧлӧта чукӧръяс, сӧтана лыысь жуглӧмторъяс. Спирт колӧ? Сета, сета, да ӧтпырӧн чӧвтӧй кын голяад, он-ӧ чергысьӧй кытчӧкӧ юж вылас. Ватӧг колӧ юны. Сэки быд чунь коластӧд жарыс кутас петны.

— Ми туйвыв йӧз, да сьӧмтӧмӧсь, нӧштаысь волігӧн мынтысям.

— А магазинсӧ кӧть ставнас сета, сӧмын регыдджык весасьӧй менам ӧшинь улысь.

Татчӧс мужик миянкӧд слӧймӧдчис, восьтас кӧ пӧ, тшӧтш пырала, шуринкӧд пӧ пукалам, да эзджык тырмы. Сійӧ и нуӧдліс сэсся гортас. Шонтысим, ӧти рункаӧн юим. Вась мӧдӧс на эськӧ корліс, да, мися, оз позь балуйтны, ми туй вылынӧсь, а ывлаас кӧдзыдыс нелямын вит.

Бура сэсся мунім. Воим гортӧ мӧд лун рытгорув, югыд на вӧлі. Сиктыс ставнас петӧма миянлы воча. Сувтім, петім кабинаысь, да кыдз тай миянӧс кватитісны, вывлань качӧдісны. Трактор кабинасьыс выліджык на лэбалім. Сэсся митинг вӧлі. Кыдзи нӧ — медводдза трактор! Быдса праздник, быттьӧ Войвыв полюс пыр Америкаӧ лэблім бӧра-водза.

Торйӧн сулалӧны школаса велӧдчысьяс: плагъясӧн локтӧмны, горнӧн чирзӧны, барабанӧ кучкалӧны. Плакат гижӧмаӧсь да ӧвтчӧны: «Югыдлань восьлалам, ёртъяс!»


ВЕСИГ ВУЗӦС ВЫЛӦ НА КЫЙИМ


Лёня петіс васьыс кос вылас, ӧктіс черисӧ ведраӧ да кайис палатка дорӧ — мыксӧ бытшлавны пондіс. Меным тшӧктіс жӧ вайны чериӧс, сэсся пӧ и пусьыны босьтчы.

— Мый нин пуам талун?— юалі.

— Риссӧ пу. Кулёк тыр босьтім, а эг на пулӧй.

— Рис пусигкості мыкыслӧн кульмыссяс. Мыйкӧ эськӧ мед регыдджык артмас. Пачкаа шыдсӧ кӧ-а... тушёнкасӧ пуктыштам да.

— А, пу мый пуан, меным ӧткодь, мыйӧн рушкуӧс тыртны. Чери баксӧ сӧмын кыпӧд васьыс да матӧд мелань.

Асывнас бара на висьталісны, мый луннас лоас вежласяна поводдя, но миян тані некодарӧ эз вежсьыв — кыдз асывнас петіс шондіыс, эз и саймовтчыв. Кытыськӧ тай волісны жӧ ыж ку пасьта, пырыс тыдалана кымӧрторъяс, да, гашкӧ, на вӧсна и шуисны синоптикъясным поводдясӧ вежласянаӧн.

Лёнякӧд ми таво веськалім поводдяас. Сэсся кӧть мед ӧні войтӧвтас ли зэрмас, вермам и дугӧдчыны кыйсьӧмсьыс. Шедіс чериыс, нинӧм шуны. Бакъяс тырӧсь, а нӧшта кӧ на шедны пондас, кыям на мыйтакӧсӧ. Менам сусед эм, Василь Вась. Чери дорӧ мунас да некор некутшӧм дозмук оз босьтлы. Челопаныс нӧ, шуӧ, мый вылӧ. Коркӧ ӧти гожӧмӧ, черисӧ солалігӧныс ли кор, мешӧкас сылы лӧз гутъяс пырасны. Ачыс, дерт, абу и тӧдлӧма, а пуд-мӧд чериыс вӧлӧма. Сир-ёкыш да гырысь кельчи. Сылӧн кӧнкӧ аслас ты эм, сэні кыйсьӧ. Воас гортас да кӧсъяс ректыны мешӧксьыс черисӧ ведра-бакӧ. Восьтас мешӧксӧ, а кымӧсас тачкысяс лӧз гут. Мӧд лэбзяс, коймӧд. Сітавлӧмаӧсь сэтчӧдз, мый чериыс ставнас еджыд лоӧма номыр пондаыс. Но мед, шуӧма гӧтырыслы, мыськам да мӧдысь солыштам, сідз жӧ мачитан. Гӧтырыс шуӧма, колантор пӧ татшӧм чериыд, мун сельпоӧ сдайт. Сдайтас сэсся. Сэні ӧд эз аддзывны номыр позсӧ.

Лёня мыкъяссӧ керӧ да мыйкӧ рувкӧдӧ вомгорулас — чериыс шедӧ, да гылыд сьӧлӧм вылас. Талун весиг рунка йылысь эз на казьтыв. Тӧдӧ ли оз, а менам дозйыс эм на. Дерт, тӧдӧ. Абу дзебӧма, абу вӧрас нуӧма вужля улӧ, нопъям и эм, да кисӧ сэтчӧ сюйлытӧг ӧнӧдз эз ов. Шоби-ис... Но некор оз сибӧдчы юасьтӧг-висьтасьтӧг, мед кӧть кыдзи горшыс доналӧма. Ковмас кӧ сылы, быть вылӧ корас — не ӧти ног, дак мӧд ног.

— Кывзы, — шуӧ сэсся Лёня.— Талун, гашкӧ, сола пӧксӧ макнитлам. Сьӧлӧмӧй корӧ, быттьӧ номсалысь бабалӧн.

Вот, вот. Ме казялі нин Лёнялысь визьсӧ. Закуска дорас пӧ, шуас сэсся, мыйкӧ оз тырмы. Видзӧдлам, сідзи-ӧ лоас. Сувтіс пуклӧс вывсьыс, задсӧ гыжъялӧ.

— Мыйкӧ сітанӧй луддзис. Мый водзӧ эськӧ татшӧмторйыс?

— Вый донтӧммас...

— Сӧран, детина. Выйыд оз нин донтӧммы шондіыс кустӧдз.

— Но, сідзкӧ, эн и гыжъясь, а солышт черисӧ. Бакыс дорад.

— Тайӧ бакад ставыс оз нин тӧр. Бакӧн да ведраӧн морт вылӧ лоис, мый сэсся колӧ. Гожӧм улӧ лишнӧй чериыс эськӧ дзик нинӧмла да. Тэ кыдз думайтан?

— Нинӧмла кӧ, и нинӧмла. Гортын свежӧйнас сёйны неуна кыйыштам дай. Солавтӧг мыйтакӧ лэччӧдам, кӧсъян шуны. Лок, сёям. Шыд пусьӧма, чай пӧжӧма, нянь шӧралӧма, сола пӧк на пызан вылӧ лэптӧма и. Позис на эськӧ и черисӧ пуны, коді бакас эз тӧр.

— Ставыс тӧрис — тальӧмӧн тэчи.

Посни чериыс бакад уна тӧрӧ, сёйнытӧ дыр тырмӧ и. Гырысь сирсӧ вӧлі кыйла жӧ аръяссӧ. Лов пыртан баксьыд, мӧдӧс пыртан, кватитчан, а бак джынйыс нин абу. Кыйӧмсӧ и тӧдлан сӧмын.

Лёня солыштіс черисӧ, вевттис, вылыстіыс ротӧн домис — лӧз гут пырӧмысь. Кыпӧдліс баксӧ. О-о! Ӧти мортӧн он и лыбӧд, колӧ на ӧд и петкӧдны туй дорӧдзыс. Но мед, тані абу ылын, надзӧник новлам. Чери сювсӧ на идраліс: гутор вӧчлім, да сэтчӧ. Чери керан пӧвсӧ лэччӧдліс ва дорас мыськыны да вӧлисти матыстчис пызан дорас.

— Татшӧм закуска дорас, кыдз помнита, гӧтыр доз пуктывліс.

Ме нинӧм эг вевъяв вочавидзны. Видзӧдлі юланьыс, а резинӧвӧй пыж тшукӧма дорӧсас, да мортыс милань кайӧ. Тыдалӧ, мӧдлапӧвса кыйсьысьяссьыс кодікӧ.

— Чолӧм, вокъяс, — шуӧ, — кос мык юр вильӧдысьяс. Аддзи, аддзи пызан вывсьыныд пӧк тасьтінытӧ, да дулльӧй тюрӧбӧн пондіс визувтны. Гашкӧ, матӧдланныд?

— Пуксьы, — шуам.— Мый сэсся. Ми, коми войтыр, тшыг мортлы пызан сайысь места век корсям. Висьтась, коді сэтшӧмыс. Кытыськӧ тай быттьӧ аддзывлӧм морт-а.

— Со менам начальникӧй, мӧдлапӧв дорӧсас сулалӧ. Вуграсьӧ думсьыс. Ме сылӧн шопер.

— Ыджыд начальник, али сӧмын чина номыр?

— Ыджыд. Главнӧй инженер леспромхозас. Хохолъяс рӧдысь, ов сертиыс кӧ. А сэсся ӧд лешакыс тӧдӧ, кутшӧм рӧдысь, кымӧсас абу гижӧма. Сьӧд тай-а, ваувса вужля кодь, нырыс крукыля и... Чериыс миянлы слаба шедӧ. Мый кыйлам, ставсӧ пуны тшӧктас. Ме, шуӧ, соланас ог сёй да кӧть тані пӧттӧдз чӧсмася. Вож вывтіыс и сёяс, да сэсся час-мӧд рушкусӧ быгльӧдлӧ ласта вылас. Гӧтырыс коми, дай, кыдз гӧгӧрвои, номсасьӧ на нӧшта. Корӧма верӧсыслысь сола чери. Кытысь сійӧ, сола чериыс, кор этшаника кыйлам да ставсӧ сёйӧ... А мунны нин сэсся колӧ. Машинаыс кӧть и быттьӧ аслас, кыдз главнӧй инженерлӧн, а век жӧ казённӧй. Татшӧмъясыдлӧн эськӧ полан дум некутшӧм абу да.

— А кыдзи нӧ сы дорӧ шопернас веськалін? Найӧ ӧд сэтшӧм-татшӧмъяссӧ оз на и матӧдны.

— Коми войтырсӧ нинӧмӧн оз лёкӧд. Сэсся вӧр-васӧ радейтӧ пакӧститны да, кӧнкӧ, чайтіс, мый ме, татчӧс мортыд, бурджык тӧварыш лоа. Тулыснас таво бура менӧ песіс: пемыд на, а чеччӧдас нин. Мунам пӧ, видзӧдлам вӧр кыскалан туй вожъяссӧ. Туйяс вывсьыс лымйыс сылӧма нин, да дозмӧрыс локтӧ кушмӧминъясас посни изторъяссӧ ӧктыны. Машинасьыд дозмӧрыс оз видзчысь, а сылӧн мелко эм. Швучкӧ сӧмын. Мелкосӧ эськӧ сэсся мырддис милиция. Кодікӧ сӧритӧма, тыдалӧ. Меӧдз коді вӧлӧма шоперыс, ӧні пукалӧ. Рейдъяс тай вӧчлӧны милиция да чери видзысьясыс, дак налы веськалӧмны сьӧмга тыра мешӧкӧн, машинааныс и вӧлӧма. Талы нинӧм, депутат, а шоперсӧ мӧдӧдасны принуд уджъяс вылӧ. Депутатскӧй корпусыс шуӧма, прӧститлам пӧ, первойысь на да. Ӧні сэсся и мык вылас рад. Бурджык места кӧ аддза, муна эськӧ та дорысь да, чӧрту. Менӧ ӧд мӧдӧдіс тіянлысь чери юавны, он-ӧ пӧ ӧти ведра вузалӧй.

— Ме бара-й ог тӧд. Менам на ёрт эм, сійӧ мый шуас. Мый шуан, Лёня? Сетам ведрасӧ, а аскиӧдз выльӧс кыям. Сьӧмыс эм сьӧрсьыс? Неуна кульыштам, сэтшӧма кӧ нин колӧ чериыс.

— Сылӧн миллион кӧ абу кӧшелёкас, весиг зептас оз босьт. Сытӧг, дерт, оз ветлы.

— Чериыд ӧні дона, — шуа шоперыслы, — ачыд тӧдан. Пессьытӧг оз шед, а малированнӧй ведраас мыкыс тӧрӧ дас кык килограмм. Абу вывті посни, шӧркоддьӧмыс. Лёня, мун кыпӧд ведрасӧ.

— А доннас кыдзи? Меным ӧд ковмас корны. Мыйта шуанныд?

— Дас сюрсӧн килограмм. Ме весиг ачым ог тӧд, уна тайӧ али этша, нэм нин эг вузасьлы черинас. Со, вуджӧд.

— А этійӧыс эм сылӧн?— кывлысис Лёня голяас тшукӧдчылӧмӧн.

— Некор оз босьтлы, мода абу. Ветліг-мунігӧн юӧм эг на аддзыв. Гортас мый сэсся вӧчӧ, ог тӧд-а. Сытӧм абу... Но найӧ ӧд кужӧны юны, кӧть миысь оз этшаджык сакны... Абу, тані абу сылӧн сэтшӧмторйыд. Ёна кӧ нин колӧ, менам аслам эм, вуджӧда.

— Но, ачыд тӧдан...

Вуджис сэсся чери ведранас.

— Ничего на мортыс, — шуӧ Лёня.— Весиг и нимсӧ эг юалӧй, кытысь ачыс да. Сёрнитанногыс тай кывтыдсалӧн-а.

— Кывтыдса и эм. Найӧ лабутнӧйӧсь. Со, мортыслӧн весиг доз на эм запасын, а тэнад эськӧ ӧшйис-ӧ. Век пытькан-коран — вай да вай. Мортыс кӧ ӧні эз кӧсйысь дозсӧ вуджӧдны, эн кор али мый эськӧ пӧк тасьті дорас кисьтыштны неуна? Кори-ин...

— А мый, кора кӧ, сюр али мый тэныд быдмас? Абутӧмтӧ ӧд кӧть век кор, изйысь он пыдзырт.


ЧЕРИ КОРСИГМОЗ


Кыдзи вузалім чери ведранымӧс, сідз и шеднысӧ дугдіс, быттьӧ вомдзаліс кодікӧ. И кывтчӧс, и катчӧс зырӧдлам, ветлӧдлам дорӧсӧдыс йӧйяс моз — некытысь нинӧм. Сэсся и поводдяыс, тыдалӧ, збыльысь вежсьыны кӧсйӧ.

— Мый кутам вӧчны, Лёня?

— Ог тӧд да. Ведраас колі эськӧ кыйны, сё кызь сюрс шайтсӧ ӧд он солышт. Во вит-ӧ-квайт сайын, тэ на сэки татчӧ весиг эн волы, Гыда Климкӧд вуграсим ӧти тулысӧ. Дорӧсӧдыс кӧ мунны катыд, километр куим лоас... Машинаӧн ветлан туй, дерт, сэки эз на вӧв, пыжӧн локтім гортсянь. Мыкыс вӧлі кульмӧма нин, да вугыр вылӧ ыджыд лача эг и кутӧй. Сеть заводыс пыж тыр вӧлі. Неыджыд йир сэні эм. Ме ог тӧд, ӧні, гашкӧ, и пузувтіс нин. Вот сэтысь ми зэв гырысь мыксӧ кык ва бак кыйим. Кульмӧм бӧрас, тыдалӧ, сувтласны сэтчӧ прӧстмӧм пӧк сюрӧсъяссӧ пожъявны. Воськовтлам, гашкӧ, сэтчаньыс, мый сійӧ куим километраыд? Сёйӧд запастор босьтам, а узьнысӧ коз улыд пыр эм. Водзынджык и керка на эм совхозлӧн, кӧдзыд кӧ лоас да он кӧ кӧсйы бипур дорын йӧжгылясьны.

— Тӧда ме сійӧ керкасӧ. Совхоз ньӧбліс Кирей Ванькалысь. Дзоньталыштлісны и. Позьӧ, шоныд лоӧ керкаад.

Узим палаткааным на. Асывнас Лёня менӧ чуксалӧ:

— Но и узьысь вань. Ме час сайын нин чеччи, нопъяс дасьті — сӧмын кышав пельпом саяд да коклябӧртӧ тшӧгъяв. Чай пузьӧді и.

— Кыдз-мый нӧ тэ талун меысь водз чеччин? Шондіыс сэтысянь-ӧ кӧть петӧма?

— Сэтысянь, сэтысянь. Миян кык ведра лои тыртӧмыс. Черисӧ ӧтисьыс бакъясӧ тӧрӧді. Ведраясас и прӧдуктатӧ нуам. Тэнсьыд тай дозтӧ пукті жӧ-а...

— Сэтшӧмтор он жӧ коль... Но мед, либӧ.

Восьлалам ласта вывтіыс катчӧс. Шондіыс ставнас нин мыччысьӧма да балябӧжнымӧс пӧжӧ. Ме бергӧдчывла Лёнялань да аддза, кыдзи выльӧн на чеччӧм веж вылас кок туйясным кольӧны — турун вывсьыс лысваыс киссьӧ, кыті мунам. Ю весьтас войся руыс довъялӧ со: абу на шоналӧма да сьӧкыд на, оз вермы кыпӧдчынысӧ. Дзик берег дорас со сьӧд ёскыс чукӧртчӧма да ворсӧ. Вугырад кӧ шедны пондас, ылӧджык мун сійӧ местасьыс — бурӧн он мын. Рушкуныс больган кодь, тырӧма курыд сітнас да. Коді некаыс, айыс либӧ, бокӧдыс гӧрд визь мунӧ. Сэтшӧмсӧ Лёня генералӧн шуӧ. Талун Лёня мыйкӧ чӧв олӧ, нинӧм оз висьтав.

Сӧмын думышті тадзи, кывлысис:

— А тэ тӧдлін эн Кирей Ванькасӧ, кодлысь тай, ачыд висьталін, керкасӧ совхозыд ньӧблӧма?

— Эг, эг тӧдлы. Йӧз сиктысь, да кытысь тӧднысӧ.

— Ме эг жӧ, мый сӧмын йӧзыс висьталӧм серти-а. Тешкодь пӧ мужик вӧлӧма. Шмонитны радейтлӧма да йӧз вылас сералыштны. Висьталӧны, ӧти арӧ ваыс зэв ыджыд тулӧма кузь зэръяс бӧрын. Колхозлысь видзьяссӧ ойдӧдӧма, зорӧдъяс тшӧтш ваын. Ванас нуӧмысь пыжӧн да пурйӧн турунсӧ пондӧмны вуджӧдавны. Кирей Ванька вӧлӧм пес пурйӧн кывтӧ. Аддзас — берег дорас морт ӧласьӧ, тшуклыны корӧ. Ляскысьӧма дядьӧыд пурнас, а мортыс тӧдса, районса прокурорныс. Висьталӧ, пыжӧс пӧ сеті турун кылӧдны, бӧр кӧсйисны локны, а эз воны. Босьт пӧ пур вылад... Босьтӧма. Кывтӧны. Мег куим-нёль кылӧдчасны, да Кирей Ванька шуӧ, тані пӧ менам турун зорӧд эм, да колӧ эськӧ пур вылас босьтны. Тэ пӧ, шуӧма прокурорыслы, лэччӧдав, абу уна, а ме гӧпъяссӧ видзӧдла, оз-ӧ кӧнкӧ чӧжъяс пукавны. Ыджыд чина дядьӧыд ставнас колхознӧй зорӧдсӧ пур вылас кыскалас. Воасны Кирей Ванькалӧн сиктӧдз. Ӧні, шуӧма прокурорыслы, татысянь тэнӧ пыжӧн нуӧдасны... А турунсӧ аслыс сараяс пыртлас. Воасны колхозникъяс турунла сэтчӧ местаад, а быдса зорӧд абу, пинь-пыкӧдыс сӧмын. Юасьны пондасны, да кодкӧ аддзылӧма — Кирей Ванька пӧ турун пурйӧн тшукис, сараяс нӧбйӧн катӧдаліс. Судӧ сетасны Кирей Ванькаӧс, прокурор дорӧ районӧ корасны. Менам мыж абу пӧ, шуӧма сійӧ прокурорыдлы, зорӧдсӧ пӧ ме эг вӧрзьӧдлы, ачыд тай лэччӧдалін пур вылас. Судӧдз оз воны, мынас Кирей Ванька.

Лёнялысь висьтасьӧмсӧ бура кыла, мышкам шлёпиктӧ да. Ме кӧ мыйкӧ шуа, сизимысь юалас-а: мый шуин да мый шуин... Ёльясыс, нюрсьыс юас лэччысьясыс, вааӧсь на. Вомӧдыс он во вуджны, да мыйтакӧ колӧ вӧрас пыравны, корсьны гӧгӧртанін либӧ ёль вомӧнсӧ пӧрӧм пу. Медбӧръя ёльыс, воны пондім да, медся на паськыд вӧлӧма. Бура пыдӧ нин вӧрас пырим, а кевны он подйы ни вуджасыс абу некутшӧм. Сэсся потш аддзим, ёль вомӧныс тасасьӧма. Абу ёна кыз дай сіськодь нин быттьӧ. Лёня шуӧ:

— Тэнӧ, кос тёвтяӧс, гашкӧ, и кутас, а ме таті ог лысьт вуджны. Мед кӧть, шуам, и кутас, но менӧ сідз и тадз кодарӧкӧ шеновтас. Ог кӧтӧдчы.

Ме вуджи. Шӧрӧдыс потшкыс крутшнитліс, но эз чег. Лёня мӧдарпӧлас коли сулавны: чатрӧдлӧ юрнас, оз-ӧ позь кытыськӧ ёнджык потш сӧтны. Матігӧгӧрын абу нинӧм сэтшӧмыс-а. Пуксис, нетшкис сапӧгъяссӧ, пӧрччис гач-трусиксӧ. Ставсӧ, нямӧдсӧ и, думсьыс тубраліс да шыблаліс ёль вомӧныс меным кок улам. А ёльыс крут дорӧса. Лёня кыдз пырис ваас, сідз и гӧгйӧдзыс.

— О-о!— горзӧ.— Кӧдзыд тай ваыс вӧлӧма, сотӧ яйтӧ.

— Эн горзы, а кев вароладжык, дӧбратӧ кынтан.

— Вароласӧ ог вермы, пыдӧсыс йи. Верма и пласьткысьны ёль шӧрас.

Воис, да ӧти здукӧн ставсӧ бӧр кӧмаліс-пасьталіс, сэсся котӧрӧн шыбитчис водзын, шоныд йӧрны. Кыддза-козъя вӧрӧдыс сэсся увлань лэччим дай воим Лёнялӧн йир гу дорас, кӧні мыкыс, сы думысь, пӧк сюрӧсъяссӧ полькӧдны-пожъявны сувтіс, миянӧс виччысьӧ.

— Абу на косьмӧма, — ыкӧстіс Лёня.— Тані чери эм! Висьтавлі тай, Гыда Климыскӧд сэки гырысь и мык кыпӧдалім! Климыслы шедас вӧлі, да некыдз оз эскы. Тайӧ, шуӧ, абу кӧ мык-а? Мися, сьӧмга ли мый?

— Климыс ӧні пенсия вылын? Мыйкӧ ог тай аддзывлы сиктсьыс, оз кӧ и петавлы гортсьыс-а?

— А кытысь аддзывлан... Гортсьыс да пыжӧ, пыжысь да гортас. Вуграсьны ветлывлӧ, а сетьӧн сійӧ оз радейт кыйсьыны. Коркӧ тай гӧтырыс ошйысьӧма менам гӧтырлы, тӧвбыд кежлӧ пӧ вугыр помысь чери кыяс. Октымнас сынсӧ ёна жӧ кыйӧ и. Некоді оз тӧд, кӧні кыйсьӧ, мый вылӧ, кутшӧм сам вылӧ сылы ыштӧны сынъясыс.

— А ме кывлі, презервативӧн пӧ кыйсьӧ.

— Йӧй кӧ тэ-а...

— Сё збыль. Чорыд сутугаысь вӧчас капкан. Кор пезьдӧ, сыныслысь улі и вылі юр лысӧ розьӧдлӧ. Он мын, абу вугырыд... Но вот. Капкансӧ сиалас, сюяс резинаас, пӧльтас неуна да сӧн йылысь лэдзас ва горулас грузӧн. Боль боль и эм — бовъялӧ ва визӧб вылас. Сыныс, кӧні эм, быть видлас, сёянтор али абу тайӧ.

— Но, бес сыкӧд, мед кыяс, — ӧвтыштчӧ Лёня.— А миянлы колӧ ведраяснымӧс тыртны. Мун, песла пырав — ӧні тэнад ӧчередьыд пусьыны. Ме видла вугырнас.

Лӧсьыд жӧ нин вӧрас. Мукӧддырйи и кывйыд оз сюр, мед висьтавны, кутшӧм кӧрӧн ӧвтыштӧ, кор сапӧг нырнад кок увсьыд вӧрзьӧдан кольӧм вося сісь корсӧ: важъянас, кольӧм арнас, али талунъянас нин, воӧм тулыснас. А енэжыс лӧз-лӧз. Кымӧръясыс вылынӧсь-вылынӧсь...


Гижӧд
Вежласяна поводдя
Жанр: 

lkejrlkelkrgner klrjnelknfrkl ekjnrjkenfrej