ВЕДРА ТЫР ЯБЛӦГ


Визинсянь Ыб пыр Сыктывкарлань муніс грузӧвӧй машина. Ыбса тьӧтка кисӧ лэптіс, сувтӧдіс машинасӧ, шуӧ: «Нуышт менӧ Сыктывкарӧдз, менам со нуанторйыс даддьын — сӧмын ӧти мешӧк да тыртӧм ведра!» Шофёр пыксьӧ: «Ог, ог!» Тьӧтка кевмысьӧ: «Ну, ен могысьӧн! Ведра яблӧг сета!» Шофёрыд ыштіс яблӧг вылад! Кыдзи нӧ он ышты? Тӧв шӧр тӧлын ведра яблӧг кӧсйысьӧны да! Тӧвнад ӧд Коми республикасьыд яблӧгтӧ он аддзы!

— Но, пуксьы инӧсь! Нуа пӧрысь мортӧс! — Ачыс думайтӧ: вот гӧститӧда ассьым невестаӧс рытнас яблӧгӧн!

Воисны карӧ, базар дорӧ. Тьӧтка чеччис машинаысь, разис мешӧксӧ да ведраӧ кисьтіс... картупель! Сетӧ шофёрлы да сё пасибӧ висьталӧ. Шофёр чуймӧма, скӧрмӧма, шуӧ: «Тэ яблӧг кӧсйысин, а сетан картупель! Ак тэ, сэтшӧм-татшӧм, омӧль ань!»

— Миян ногӧн кӧ, тайӧ яблӧг, а тіян ногӧн, гашкӧ, и карта пель ли, карко пель ли... Ог тӧд, бур мортӧй, кутшӧм пель сэсся... Пасибӧ нуӧм вылад!

Шофёр скӧрмис да сьӧвзис картупель ведра вылӧ, шуӧ: «Пасьмунас мед тэнад пасибӧыд картупельнад и ставнад!» Эз и босьт картупельтӧ. Муса нывтӧ, ассьыд невестатӧ, кыдзкӧ яндзим жӧ кын картупельнад гӧститӧднытӧ! Слабог, ӧні абу война кад: быдсяма сёянторйыс юр вывтырыд! А вот яблӧгыд эз вӧв сэк: Ыбса тьӧткаыд кӧсйысис, но эз чӧсмӧдышт шофёрыдлысь невестатӧ! Мый сэсся керан!?

Ыбад ӧд збыльысь картупельтӧ яблӧгӧн шуӧны.


Гижысь: 
Гижӧд
Ведра тыр яблӧг
Жанр: 

lkejrlkelkrgner klrjnelknfrkl ekjnrjkenfrej