ВАЖ КЕРКА
Мир туйлань бан бока важиник керка — Быттьӧкӧ берегӧ шыбитӧм баржа. Кадсӧ он сувтӧд, кадсӧ он бергӧд, Коркӧ сэн вӧвлі зэв кыпыд да гажа. Лун-мӧдӧдз юргывліс гудӧка кӧлысь, Сьывліс да йӧктывліс ставнас сэк грездыс. Ӧні со жыръясӧд шутьлялӧ тӧлыс, Ӧшиньяс пыддиыс сук черань везъяс. Коркӧ, войнаӧдз на, чужлісны челядь, Чилзігтыр ворслісны ӧшинь ув йӧрас. Кыйлывліс батьыс сэк Эжваысь черлядь, Пармаысь — сьӧла-тар, шедліс и йӧра. Вердысьлӧн олӧмыс фронт вылын орис Сталин да чужан му вӧсна ёсь косьын. Грезднымлӧн лов шыыс ӧтарӧ нормис, Дӧва-мам шогысла дзоридз моз косьмис. Морт моз жӧ керкаыс пӧрысьмӧ-ружтӧ, Олӧм сэн лӧдсавтӧм бипур моз ваймис. Сэн ӧні кадыслӧн повзьӧдчысь вуджӧр, Оз весиг поздысьны пельӧсас кайяс. Гӧльлунсьыс коми морт мынлас-ӧ коркӧ? Синваӧс жальысла кута ме ӧдва. Чукырӧсь бан бока сулалӧ керка — Быттьӧкӧ шогысла ропмунӧм дӧва.
Гижысь: 
Гижӧд
Важ керка
Жанр: 

lkejrlkelkrgner klrjnelknfrkl ekjnrjkenfrej