×

Status message

Do something on load!

УР КЫЙИГӦН
Арся лунӧ вӧр керкаын водз Ме узянінысь садьми. Зумыд кок йылӧ ме сувті — Веськалӧма мудз. Тшак би перйи. Сартас ӧзті. Горйӧ сюйи би. Рытъя шыдтор пӧртйын шонті, Сёйи дозмӧр шыд. Блинтор рач пыдӧсын дзожги (Эз тай тырмы дыр). Сэсся ырӧш бӧрын бруньги, Затрек лои бур. Оз позь сёйтӧг кыйсьысь мортлы вӧрӧ-туйӧ петны. Лоӧ ыджыд кытшов вӧчны ӧт пемыдсянь мӧдӧдз. Кыз ной чӧрӧс кокӧ сюйи, Кӧмалі ме кыс. Пельпом вылӧ — еджыд дукӧс, Дзумги юрӧ лаз. Пищаль томан вылӧ видзлі, Лыйсян кӧлуй — дась, Сэсся матка дозйӧс видлі (Кампас — медбур пас!). Кокни койбедь киӧ босьті, Коскам сюйи чер… Ставыс лои. Керка восьті… Пу дзир ӧдзӧс — «дзурк».
* * *
Войся пемыд вешйӧ водзӧ, Лӧзӧдӧ сьӧд вӧр; Вӧр-пу тӧдчӧ, — лыйны позьӧ. Кыа югӧр гӧрд.
* * *
«Мунам, Войтӧв, — понлы шуи, — Петам вӧрӧ, кыч!..» Вирскӧб вартіс тшамъя улысь, Этшсӧ оз тӧд, кыдз Ассьыс нимкодь меным шуны, Чеччӧ морӧсӧдз. «Энлы тэрмась, — шуа сылы, — Мунам кыям ур, Лыям дозмӧр пажын вылӧ. Ӧдйӧджык мун пур!»
* * *
Керка дорсянь лэч туй кузя Мӧдам гажа понкӧд. Кокъяс улын ратшкӧ резюв, Вольдъя вывті кыпыд. Регыд син вылысь и воши Пуяс пӧвстӧ понйӧй — Иса туйыд сылы сюри (Виччысь ӧні, урӧй!). Здук-мӧд коли. Кутіс кывны Вӧр пасьтаыс увтӧм. Ӧдйӧ чепӧсйи ме мунны Веськыд туйӧд, вомӧн. Вои. Чатӧртчӧма коз пу вылӧ: Зэв сьӧлӧмсьыс увтӧ. Урыс некӧн оз и тыдав. «Он-ӧ увт тэ ройӧ?» «Часлы», — шуа понлы, — Эм абу тан, тӧдам». Сэсся чер тышкӧн ме клёнги Судзмӧн выйӧ пуад. Тышкӧм шыыд урлы ёнтіс — Пучӧр бердысь петіс, Шур-шар кайис туган йылас, Ӧдва судзӧ синмыд. Ворсӧ-эльтчӧ, бӧжнас легӧ — Увтчӧмлы оз эскы. Войтӧв сэні: «ув!» да «ув!..» Ме тай урӧс лыйи — «шку-ув!..» Пон шы лӧнис. Урыд эз ло… Лысъяс пӧвстті лэччис. (Пожӧм-козйӧ оз нин кайлы, Пуысь пуӧ чеччы). Кӧть и жаль тэ, мича урӧй, Лоӧ меным лыйны; Кыйтӧг менам оз пӧт кынӧм, Кыйӧм вылын олӧм. Сэсся лаз нопйӧ ме урӧс Тубыртӧмӧн сюйи. Асьным понкӧд водзӧ мӧдім Мӧдлысь корсьны туйсӧ.
* * *
Сідзи лунтыр понкӧд ветлам, Чӧс туй гӧгӧр кыйсям. Коркӧ рытладорыс локтам Вӧлись керка дорлань. Рытын, шоныд гор би дорын, Урлысь кучик пӧрччан. Кыкӧн понкӧд, муса другкӧд, Сёрнитан да ноксян.
Гижысь: 
Гижӧд
Ур кыйигӧн
Жанр: 
Ӧшмӧс: 
Пасйӧд: 

* Вольдъя — выль, неважӧн усьӧм лым (авт.).
* Гор — изйысь тэчӧм пач.
* Койбедь — кыйсьысь-вӧралысьлӧн лыйсигӧн мыджсьӧм вылӧ бедь (авт.).
* Кыс — кӧр либӧ йӧра кок куысь вурӧм кӧмкот.
* Лаз — кыйсьысьӧс кӧтасьӧмысь видзан кучик паськӧм.
* Матка — компас.
* Рач — ляпкыдик пӧрт, скӧвӧрда.
* Тшак би — биасян кӧлуй: кунваын пуӧм, посньӧдлӧм кыдз пу тшак.
* Тшамъя — вӧр керка дорын кыйдӧс видзан кока чом.
* Чӧрӧс — вурун (ной) чувки.

 

lkejrlkelkrgner klrjnelknfrkl ekjnrjkenfrej