ТУЛЫСЛӦН ШЫЯС


ЭЗЫСЬ ВОЙТЪЯС

Шоныд муясысь да саридзьяс сайысь тэрыб кокъяснас воис варов тулыс, кутіс вӧтлыны кузь тошка дзор юрсиа тӧлӧс. Лым толаяс мӧдісны ляпкавны, топавны.

— Тёп... тёп... тёп... — варовмисны керка вевтъяс вылысь лэччысь эзысь Войтъяс. Найӧ зільӧны пыдӧджык пырны-дзебсьыны му бердӧ.

Тадзи найӧ варовитӧны кузь лун чӧж. Чеччыштасны му вылӧ медся джуджыд керка вывсянь, да оз и повзьыны. Воасны му вылӧ — клоп потасны. А жӧлӧбъяс дорын бара нин чукӧрмӧны мукӧдъяс.

Но виччысьтӧг войвывладорсянь уськӧдчис кӧдзыд тӧв, шеныштіс паськыд тошнас.

Повзисны Войтъяс, йитчисны ӧта-мӧд бердас.

— Помасис миян олӧмным.

— Этша и сюри гажӧдчыны.

Войтъяс кӧсйӧны лэччыны му вылӧ, дзебсьыны, но некыдз оз вермыны торйӧдчыны ӧта-мӧдсьыс.

Войбыд изӧймитісны-кынмисны. Мыйӧн югдіс ывлаыс, кодсюрӧ асьнысӧ эз тӧдны: нюжалӧмаӧсь, быдмӧмаӧсь, быттьӧ ёсь штыкъяс чурвидзӧны.

Надзӧникӧн сайкалісны да бара варовмисны, мӧдісны ошйысьны.

— Ме медся кузь да мича!

— А ме тэысь кыз да шыльыд.

— Менӧ сакар пыдди позьӧ сёйны.

— Шонді петігас ме сэтшӧма дзирдалі быттьӧ пытшкын югыд пӧнар ломзис.

Налысь ошйысьӧмсӧ кыліс шонді, веськӧдіс ассьыс югӧръяссӧ йи нёньяс вылӧ, здукӧн и сывдіс найӧс.

И бара керка вевтъяс бокысь кутіс кывны войтвалӧн тӧдса гӧлӧс:

— Тёп... тёп... тёп...

Дженьыд вӧлӧма нэмыс йи нёньяслӧн.


ТУРӦБ ДА ШОР

Сьӧдасисны карса туйяс, варовмисны жебиник Шоръяс. Гӧлӧсныс слабиник на. Воас кад и збоймасны, лун и вой оз ланьтлыны сэсся. Ӧд найӧ тэрмасьӧны асланыс мам Эжва ю дорӧ, медым ӧтвылысь гӧститыштны паськыд видзьяс вылын да котӧртны водзӧ, войвыв саридзлань.

Садьмис и ичӧтик Шор, мыссьыштіс сылӧм лымйысь артмӧм ваӧн, заводитіс писькӧдны водзӧ мунан туй. Аслыс любӧ. Вель дыр ӧд шойччис, окота и уджыштны.

— Час, ме петкӧдла тэныд пуж! Кутан тӧдны, кыдзи пальӧдны менӧ, — скӧрмис Кӧдзыд.

Сійӧ пӧльыштіс Шор кузя, зэвтіс медбӧръя вынсӧ.

Гажтӧм лои Шорлы, вот-вот бырӧ эбӧсыс. Кутіс гоннявны, кодӧс эськӧ чукӧстны отсӧг вылӧ.

— Эн шогсьы, муса Шорӧй, — шыасис Турӧб. — Ме тэнӧ дзеба, кӧдзыдыд оз аддзы.

— Тэнсьыд буртӧ ог вунӧд, — радліс жебиник Шор.

Лолыштіс морӧс тырнас Турӧб, ваяліс да кояліс Шор вылӧ матігӧгӧрысь став лымсӧ.

Садьмис мӧд луннас Кӧдзыд, шыльӧдыштіс тошсӧ, мӧдіс вашъявны.

— Ме тай ён на. Ӧти войӧн кынті Шортӧ.

Шор эз кыв Кӧдзыдлысь ышнясьӧмсӧ. Сылы вӧлі шоныд лым улын, визувтіс надзӧникӧн водзӧ и нинӧмысь эз пов.


Гижӧд
Тулыслӧн шыяс
Жанр: 
Ӧшмӧс: 

lkejrlkelkrgner klrjnelknfrkl ekjnrjkenfrej

1