СУББОТНИК

Гожся асыв. Разалӧма ру.
Шонді койӧ югӧр — гӧгӧр гажа.
Весиг серам банӧн шлывгӧ ю,
Ассьыс унзіль вермалӧма важӧн.

А ми, ныв-зон, колим асъя сикт,
Багыръясӧн лэччим Эжва дорӧ.
Сэн — субботник, уджалыштам ми,
Кытчӧдз юрсӧ шондіыс оз нёровт.

Уна таво пӧрӧдӧма кер, — 
Кымын стройка лыбӧ! Колӧ, колӧ.
Кыдз нӧ ланьтӧдам ми багыр-чер?
Тэрыбджыка коллясямӧй, нолӧй!

Ю дорын оз повзьӧд йӧзӧс удж, — 
Некод ӧд эг чужсьывлӧй ми нэрӧн — 
Ичӧтысянь вӧр-ваын быд сутш,
То сэн ветлам пищальӧн, то черӧн.

— Йӧткы керсӧ, Вася, зэлӧд вын,
А то сэні идол моз дзик куйлӧ. — 
Кер оз вӧрзьы, куйлӧ, быттьӧ кын,
Но артельлы... Сійӧс кер оз чуймӧд.

Эжва пасьта гӧгӧр кывтӧ вӧр — 
Миян шудлӧн, миян гажлӧн зарни.
Ньӧти пу оз бергӧдчы нин бӧр, — 
Стройка найӧс виччысьӧ ударнӧй.

И ми сьылам кыпыд сьыланкыв,
Локтам гортӧ, — вӧчим ыджыд делӧ.
Рытын мунам клубӧ зон и ныв, — 
Удж кӧ вӧчин, гуляйт, сьыв тэ смела!