СЬӦЛӦМӦ ДОЙ


Эльвира школаысь локтіс сёрӧнджык. Гортас пырӧмӧн тшӧтш уськӧдчис бабыс дорӧ, кутыштіс сійӧс и радпырысь юӧртіс:

— Бабӧ, талун ме лотерейнӧй билет кузяыд, кодӧс тай нимлун кузяыд батьӧ сетіс, — ура-а! — быдса вит шайт выиграйті!

Эльвира восьтіс портфельсӧ, кыскис сэтысь вит шайт.

— Сберкассаысь сетісны. Уджавны кута да пыр мӧда ньӧбавны татшӧм лотерейнӧй билетъяссӧ. Колӧкӧ, машина либӧ телевизор меным пай вылӧ усьӧ. Со тай нӧ миян учитель Евдоким Евдокимович кольӧм во мотоцикл выиграйтӧма, ӧні быд лун школаӧ сы вылын журъялӧ.

Эз на удит бабыс ӧбед лӧсьӧдны, кыдзи керкаӧ пырис Модест, ар нелямына, кыз льӧбъя мужичӧй, коді унджык кадсӧ довъяліс сикт кузя, некутшӧм удж вылӧ эз инась. Ӧтилаын уджыштас тӧлысь-мӧд, сэсся, видзӧдан да, бара нин выль удж корсьӧма.

Модест пӧрччис шапкасӧ, улӧдз копыртчыліс Эльвира баблань.

— Бур лун да кузь нэм, Савватьевна. Тэ он кӧ и пӧрысьмы-а. Пыр на том ичмонь кодь.

— Кысь нин квайтымын арӧс бӧрад томнас да мичанас лоны. Пуксьы, мый нӧ сулалан?

— Ме эськӧ мога да, Савватьевна.

— Мыйсяма мог ме дорӧ суис?

— Гӧтырӧй висьмис. Фельдшер гортӧ воліс да быд сикас лекарствосӧ аптекаысь тшӧктіс ньӧбны. Удждыв шайт вит-квайт. Аски и бӧр пырта. Столӧвӧйӧ пес поткӧдлі, да кӧсйисны кызь шайт сетны. Мезды, бур вӧчӧмтӧ некор ог вунӧд.

— Рад эськӧ удждылі, да абусӧ, буракӧ, он уджды. Мый вӧлі сьӧмӧй, пилы сеті, монькӧд ӧтвылысь курортӧ шойччыны мунісны. Пензия лун дас мысти на сӧмын ваясны. Эн дивит, немторйӧн ог вермы отсавны.

Модест сьӧкыда ышловзис да бара мӧдіс кевмысьны.

— Ӧкулинаӧй жаль. Ог кӧ вермы судзӧдны лекарствояссӧ, код тӧдас, мый сыкӧд вермас лоны. Нёль шайт кӧть сетлы, ен могысь кора.

— Висьталі, абу, мися, абу. Суседъяс ордад пырав, отсаласны.

— Уна керкаын нин вӧлі. Абу йӧз, а...

— Модест Петрович, ставнысӧ омӧльтны оз позь: йӧз миян шаньӧсь.

— Шаньӧсь, кор узьӧны.

Удждысьны волысь морт кӧсйис нин мунны, но сы дорӧ матыстчис Эльвира, коді ӧнӧдз чӧв оліс.

— Модест дядь, талун меным лотерейнӧй билет кузя уси вит шайт. Ме сійӧ деньгасӧ верма удждывны тэныд. Сӧмын лун-мӧд кежлӧ. Колӧ отсавны гӧтырыдлы. На, босьт...

— Аски рыт, шань нылӧй, бӧр вая деньгатӧ. Ыджыд аттьӧ тэныд таысь. Бур йӧзыс тай вӧльнӧй свет вылас эмӧсь на. Но, прӧщӧвайтлӧй.

Муртса петіс Модест, Савватьевна мӧдіс видны внучкасӧ.

— Колі тай сетны сылы вит шайт, йӧюк тэ.

— Да ӧд лекарство вылӧ корис. Кыдзи нӧ йӧрмӧм мортлы он сет, — дорйысис Эльвира. — Школаын учительяс тшӧкыда висьтавлӧны, мый йӧзлы пыр колӧ отсавны.

— Чайтан, лекарство вылӧ сійӧ корис? Талун жӧ ньӧбас югыд зелля да туплясьтӧдзыс юас. Тӧда ме сійӧс, кыз льӧбйӧс. Олан сямсӧ дзикӧдз нин воштӧма. Юӧм вӧснаыс быдлаысь вӧтлӧны.

— Аски бӧр пыртас уджйӧзсӧ, кыдзи кӧсйысис.

— Пон вомысь лытӧ сьӧкыд кыскыны.

Коли лун, вежон, а деньгатӧ Модест сідзи и эз вай. Нывка тшӧкыда мӧдіс видны асьсӧ. Ӧтчыд, школаысь локтігӧн, паныдасис Модестлӧн гӧтырыс Ӧкулина. Нывка шыасис сы дінӧ.

— Акулина тьӧт, бурдін нин? Лекарствоясыд отсалісны?

— Ме, бур нылӧй, эг вись. Мыйла тэ чайтін, мый виси?

Эльвира висьталіс, кыдзи дас лун сайын на ордӧ локтіс Модест да корис удждыны вит шайт лекарство вылӧ.

— Пӧръяліс ӧмӧй? — юаліс ныв.

— Ещӧ кыдзи... Сылы морттӧ пӧръявны лым вылӧ сьӧлыштӧмкодь жӧ. Удждысьны радейтӧ, а бӧр сетӧм йывсьыс вунӧдӧ. Часлы, ме талун сылы петкӧдла пуж. Но, ӧкаяннӧй, челядьясӧс нин мӧдіс бӧбйӧдлыны. Бур, мый висьталін.

— Мӧд луннас и кӧсйис пыртны уджйӧзсӧ.

Ӧкулина сумкасьыс перйис вит шайт да мыччис Эльвиралы.

— Мӧдысь сэсся эн ылав. Бур йӧз пӧвстас и менам Модест кодь яндысьтӧм синъяс гантайтчӧны.

— А ме вӧлі чайта, быд морт олӧ правильнӧй олӧмӧн, кыдзи книгаясын гижӧны, — вочавидзис Эльвира да ӧдйӧ мӧдӧдчис гортас.


Гижӧд
Сьӧлӧмӧ дой
Жанр: 

lkejrlkelkrgner klrjnelknfrkl ekjnrjkenfrej

1