СИКТСА КЛУБЫН


Луза ю важӧн дзебсис лым улӧ, медым тӧвбыд не петкӧдчывны татчӧс олысьяслы. Йи шебрасӧн вевттьысьӧмӧн надзӧник нуӧ ассьыс васӧ водзӧ, гырысьджык юясӧ.

Татшӧм ӧти тӧвся лунӧ сиктса клубын нуӧдісны аслыспӧлӧс праздник. Чукӧртчисны сэтчӧ совхозса ветеранъяс, кодъяс уна во чӧж гӧрисны да кӧдзисны, идралісны урожай, вӧчисны стрӧитчан уджъяс, заптісны кӧрым, дӧзьӧритісны скӧтӧс, вӧчисны уна сикас мукӧд пӧлӧс уджъяс, кодъястӧг совхоз оз вермы бергӧдчыны тулысын и гожӧмын, арын и тӧлын.

Сцена вылын сулалысь кузь пызан сайӧ пуксялісны уска-тошка дедъяс, дзор юрсиа пӧчьяс. Залын юрӧбтіс музыка. Ӧти тыртӧм места эз вӧв клубын, сы мында локтӧмаӧсь йӧзыс. Ставныс мича паськӧмаӧсь, быдӧн на пиысь коркӧ уджвывса ветеранъясӧн жӧ лоӧны. Унаӧн — сцена вылын пукалысь ветеранъяс моз жӧ — морӧсас кутасны новлыны медальяс, орденъяс.

Медводз сёрнитіс совхозса парткомысь секретарь Игнатов. Сійӧ висьталіс ыджыд аттьӧ налы, кодъяс уна вын сетісны асланыс уджъяс вылын, медым водзӧ вылӧ сиктса йӧзлӧн олӧмыс лоис ещӧ на югыдджык да кыпыдджык. Медым ветеранъяслӧн челядьныс, внукъясныс водзӧ нуӧдісны пӧльясыслысь, пӧчьясыслысь уджсӧ. Гӧрд кумачӧн вевттьӧм пызан сайын пукалӧ совхозса комбайнер Гаврил Афанасьевич. Пинжак вылас сылӧн куим орден да некымын медаль. Вӧвлӧм фронтӧвиклы, коді матӧ нёль во тышкасис вӧрӧгъяскӧд, воліс Берлинӧдз, тӧдӧмысь, любӧ, мый талун сійӧ пукалӧ орччӧн аслас удж кузя ёртъяскӧд да кывзӧ партийнӧй веськӧдлыссянь пӧсь да ошкана кывъяс.

Игнатов бӧрын кыв босьтіс совхозса директор. Уджвывса ветеранъяслы сійӧ сетіс быдӧнлы дона козин, топыда кутліс кияснысӧ, шуис уна мелі кыв. А залын пукалысьяс ӧта-мӧд вежмӧн клопайтісны кияснас, унаысь чеччылісны местаяс вывсьыс.

— Со кыдзи кужӧны донъявны миян уджалысь морттӧ, — бергӧдчыліс комбайнер Гаврил Афанасьевичлань сыкӧд орччӧн пукалысь Анфиса Модестовна, коді комын воысь дырджык быдтіс да дӧзьӧритіс порсьясӧс.

— Вӧтын моз тайӧ, Модестовна. Жаль, мый пӧрысьмим, — вочавидзис комбайнер.

Клубӧн веськӧдлысь Агния Юркина юӧртіс, мый школаса велӧдчысьяс уджвывса ветеранъяслы дасьтісны концерт. Залыс бара шызьыліс. Ветеранъяс лэччисны сцена вылысь, пуксялісны медводдза радас.

Заводитчис гажа концерт. Велӧдчысьяс гӧрд галстукаӧсь, шыльӧдчӧмаӧсь, мольӧдчӧмаӧсь. Мӧдісны сэтшӧм гораа да лӧсьыда сьывны, быдӧн чӧв-лӧнь видзӧдісны на вылӧ. Кор заводитісны сьывны быдӧнлы тӧдса «Коми ань» сьыланкыв, Анфиса Модестовна эз вермы кутны асьсӧ, чукырӧсь чужӧм кузяыс шорӧн мӧдіс визувтны синваыс. Дум вылас уси война воясса сьӧкыд кадыс, тшыгъялӧмыс и уна пӧлӧс сьӧкыдлуныс, кодъясӧс ковмис пыкны кузь кад чӧж.

А Гаврил Афанасьевичлӧн аслас думъяс. Со сійӧ дас сизим арӧса зонкаӧн на первойысь пуксис трактор вылӧ, кодӧс вайисны колхозӧ. Кор заводитчис война, тракторсӧ вежис танк вылӧ. Прӧйдитіс би пыр и ва пыр, куимысь ранитчыліс. Война помасьӧм бӧрын нин велӧдчис комбайнерӧ. Лыддьыны кӧ, кымын гектар вылысь идраліс да вартіс нянь, анькытш, керис картупель — здукӧн он артав.

Сцена вылын йӧктісны нин нывкаяс. Дарӧм посниӧсь, а тырмӧ тай сямныс. Кор помасис йӧктӧмыс да ланьтыштісны залын пукалысьяс, сцена вылӧ петіс Костя Коснырев, коді оліс Гаврил Афанасьевичкӧд орчча керкаын.

Детина сувтіс дзик сцена дорас, видзӧдліс залас, мыйлакӧ некымынысь кыскыштіс нырсӧ и сӧмын сы бӧрын шуис:

— Ме лыддя тіянлы нянь йылысь кывбур, кодӧс гижис Чувашияса поэт Петер Эйзин. — Сэсся аддзис Гаврил Афанасьевичӧс да нюмъёвтіс сылы и вӧлисти мӧдіс лыддьыны:

НЯНЬ

Эн кӧ тшыгъяв на, зон,
Пызан сайӧ тэд
пуксьыны нем:
Няньысь донаджык
Мыйкӧ мӧй эм?
Китӧ мыськытӧг, зон,
Пызан сайӧ тэд
пуксьыны нем:
Няньысь сӧстӧмджык
Мыйкӧ мӧй эм?
Шапка пӧрччытӧг, зон.
Пызан сайӧ тэд
пуксьыны нем:
Няньысь ыджыдджык
Мыйкӧ мӧй эм?

Кор Костя помаліс, Гаврил Афанасьевич кыпӧдчис места вывсьыс, гораа шыасис:

— Костя, бать кок пӧв! Лыддьы тайӧ кывбурсӧ мӧдысь, сьӧлӧмӧс гудыртін.

Праздник вылӧ воӧм войтыр кутісны жӧ корны:

— Лыддьы! Лыддьы!

Костя мӧдысьсӧ лыддис ещӧ на гораа да ясыда, сэсся копыртліс йӧзлань юрсӧ да долыда котӧртіс сцена сайӧ.

Гортас мунігӧн Гаврил Афанасьевич суӧдіс Костяӧс, топыда кутыштліс.

— Сё пасибӧ тіянлы, том петасъяс. Бура гажӧдінныд. А кывбуртӧ, кодӧс лыддин, гиж меным ыджыд бумага вылӧ мича краскаӧн. Ме сійӧс ӧшӧда стенӧ, медым гӧстьяс, тӧдсаяс, кор пуксясны менам пызан сайӧ, быдӧн лыддясны тайӧс, кутасны тӧдны няньыслысь коланторсӧ да донсӧ. Лӧсьыда поэтыс гижӧма: няньысь донаыс абу, няньысь сӧстӧмыс абу, няньысь ыджыдыс абу.

Мый та бӧрын шуан?


Гижӧд
Сиктса клубын
Жанр: 
Пасйӧд: 

* Кывбурсӧ комиӧдіс Вл. Попов.

lkejrlkelkrgner klrjnelknfrkl ekjnrjkenfrej

1