РУЧ ДА ЯБЫР

Поздысис пу йылӧ ябыр да пиянсӧ быдтӧ. Казяліс руч, мый пуын ябыр быдтысьӧ, локтіс пу дінӧ да шуӧ:

— Ябырӧй, ябырӧй, чӧвт бурӧн меным ассьыд питӧ. Он кӧ чӧвт, ме путӧ пӧрӧда да ставнытӧ сёя.

Жаль эськӧ ябырлы сетны писӧ, но мый нӧ керан. Он сет да збыльысь, гашкӧ, ручыд пусӧ пӧрӧдас да став мукӧд пиянсӧ тшӧтш сёяс. Лои чӧвтны ябырлы ассьыс ӧти пи ручлы. Руч сёйис ябырлысь писӧ да бара пондіс грӧзитчыны:

— Ябырӧй, ябырӧй, ме тайӧн эг на пӧт. Чӧвт вай регыдджык мӧд питӧ. Он кӧ чӧвт, путӧ пӧрӧда да тэнӧ асьтӧ и мукӧд пиянтӧ тшӧтш сёя.

Сэки буретш сэтчӧ слӧймис катша да и шуӧ:

— Йӧй тэ, ябырӧй, йӧй. Ручыд тэнӧ прӧстӧ повзьӧдлӧ. Аддзан, чер ни пурт сылӧн абу. Бӧжнас ӧд путӧ оз пӧрӧд.

Веритіс ябыр катшалы и эз сет ручлы мӧд писӧ. Руч ёна скӧрмис да муніс катша вылӧ грӧзитчигтыр.

— Часлы, — шуӧ, — петкӧдла ме тэныд, кузь бӧжлы, не ас делӧӧ сюйсьӧмысь.

Муніс руч эрд вылӧ да водіс кывсӧ нюжӧдӧмӧн — лэччысис кулӧма улӧ. Лэбӧ сэт катша да и аддзӧ, мый руч кулӧма. Пуксис и видзӧдӧ: збыльысь руч оз вӧрзьӧдчы и кывсӧ нюжӧдӧма. Матыстчис катша руч дінӧ да чеччыштіс сылы лапа вылас — руч оз вӧрзьы, чеччыштіс туша вылас, сэсся юр вылас — руч век оз вӧрзьы. Збоймис катша да кыв вылас чеччыштіс, а руч сэк сійӧс и тшапнитіс.

— Ӧнтай, — шуӧ, — менсьым тэ став делӧӧс торкин, вай ӧні сы пыдди тэнӧ асьтӧ сёя.

— Энлы на сёй менӧ, ручӧ-чойӧ, — кевмысьӧ катша, — ме ӧні пеж: локтігмоз помӧй кисьталанінын да куйӧд чукӧрын кокаси. Сюй менӧ, ручӧ-чойӧ, кудйӧ, омӧлиника вевттьышт да и быгыльт лысваа турун вывтіыс. Сэк ме сӧстӧм лоа, и тэ верман сёйны менӧ.

Руч кывзіс катшаӧс: сюйис сійӧс кудйӧ да мӧдіс быгльӧдлыны лысва вывті. Сэк кудйыд — ӧтарӧ, вевтыс — мӧдарӧ, а катша — майӧг йылӧ. Сы мында сійӧс и аддзыліс ручыд.