РЕВОЛЮЦИЯ


Тэ — би:
Лёк олӧм пазӧдысь,
Пемыдсӧ разӧдысь,
Дзирдалан, югъялан би...

Тэ — чер:
Паныдӧн сувтысьӧс кералысь,
Важыся вежатор сералысь,
Медъюгыд, медлэчыд чер!..

Тэ — жыннян:
Буржуйӧс повзьӧдысь,
Комиӧс ловзьӧдысь,
Узьӧмысь садьмӧдысь жыннян!

Тэ — шонді:
Выль олӧм лӧсьӧдысь,
Сьӧлӧмъяс лӧсьӧдысь,
Гӧль йӧзӧс шонӧдысь шонді!..

Тэ — багатыр:
Кӧртӧдъяс орйӧдлысь,
Пыригӧ торйӧдлысь...
Мездлунсӧ шедӧдысь багатыр.