ПУЯС


1.
Пыр кӧсъя гӧгӧрвоны пуяссӧ... Пыр мӧвпала найӧс... Пуяс эмӧсь, и Эм мӧд нога олӧм, Эм мӧд нога мӧвпалӧм, Эм мӧд кыв... Да и вын — Ловтӧ быд ногыс ышӧдысь...
2.
Кор тэнсьыд кывбуръястӧ лыддя, Аддза, кыдзи пуыс вывлань нырччигӧн орлалӧ сынӧдсӧ. Воссьӧ енэжӧ ордым. Кор тэнсьыд кывбуръястӧ лыддя, Аддза: тӧлӧн куснялӧ пуяссӧ, нетшӧ корсӧ... И турунвиж корйыс кадсьыс водз лэбӧ эстчань... Кор тэнсьыд кывбуръястӧ лыддя, Аддза: зумыд пуяс сулалӧны... Быд пу весьтын — шонді — Аслас ен. Кор тэнсьыд кывбуръястӧ лыддя, Аддза: пуыс пытшкӧс югыднас югзьӧ... Лӧсьӧда соддзӧс.
3.
Кымын во торйӧдӧ миянӧс, но пыр Став ловнам ляскыся на бердӧ. Лунъяс кывтӧны. Ставыс вежсьӧ. И сӧмын пуяс важ моз сулалӧны ӧшинь улын. Кутшӧм ыджыд мог суис найӧс тадз воясӧн сулавны?.. И кыськӧ лов пыдіысь виччысьтӧг воӧ воча кыв — Радейтӧм. Пуяс радейтӧны... И ме воча серала налы. Серала, мыйла тӧдлытӧм радлун волӧ найӧс мӧвпалігӧн... Серала, мыйла сӧмын тадз верма гумовтлыны мувывса югыдсӧ... Серала, мыйла тадз сӧмын и верма вуджӧдны лолӧс мортлы усьӧм пуд пырыс... Серала сы понда, мый бӧрдны ог вермы.
4.
Со и уськӧдіс зэрыс пу вылысь медбӧръя корсӧ. И пасьтӧм пуыс ӧні эзысьӧн пӧртмасьӧ шонді водзын. Ме лэдзи синмӧс... Му веркӧсыс енэжысь югыдджык вӧлі — Кӧтасьӧм корйӧ тадз зарни югӧрыс инмис. Дыр видзӧді корсӧ, Мый ради мичыс, регыд кӧ кусас? (Кокниа кусӧ тадз вой улӧ шонді...) — Мед радейтӧм Пас моз сувтас лов шӧрад эзыся пуӧн... Мед тӧдан: Ой-лунсьыс оз коль лов вылын нинӧм радейтӧм кындзи. И кӧсъян он, Ковмас эскыны: Нинӧм... Эзысь пу кындзи.
5.
Пуяс шувгӧны... А ми тэкӧд сэтшӧм ичӧтӧсь тӧла дырйи. Кык ӧтка лов пемыд му вылас — Шондіыс быри. Югзьӧдам ӧта-мӧднымӧс: Коді мый кужас сьылам. Мый сэні енмыс шӧпкӧдӧ миянлы, Быттьӧкӧ кылам. Важӧн нин абу тэ мекӧдӧ орччӧн, Ӧтнам ме сьыла — Пемыд му вывті Морӧсын югӧртор Нуа ме чӧла.
Гижӧд
Пуяс
Жанр: 
Пасйӧд: 

* ой-лун — кад

lkejrlkelkrgner klrjnelknfrkl ekjnrjkenfrej

1