ПОЗТӦМ КӦК


Рытладор рас вылысь
кӧк горзӧм кылӧ.
бӧрсяньыс йӧлӧга вӧтлысьӧ —
ветлӧдлӧ, юргӧ да сьылӧ.
	«Кук-ку-у!.. Кук-ку-у!..»

Ичӧтик мӧс корсьысь ныв
сылысь юалӧ-сьылӧ:
«Кӧкӧ-ӧ-ӧй-чойӧй, кӧкӧй-чойӧй!..
мыйла сідз нораа сьылан?»

	Кӧк сылы воча
	висьталӧ, тшуплӧмӧн сьылӧ:

		«Позйӧс тулыс
		аслым эг вӧч.
		Йӧз поз аддзи —
		колькйӧс пукті...
		Чавкан пӧжис
		колькйӧс менсьым.
		Челядь петіс —
		йӧз мам вердіс.
		Челядь менам
		ог тӧд кӧнӧсь,
		Позтӧм пӧтка
		ӧтнам ола.
		Тадзи коньӧр
		«кук-ку коли...»
		Аслам сьылӧм
		менӧ нерӧ.
		Бӧрдӧ сьӧлӧм
		менам нора...
		Кук-ку-у!.. Кук-ку-у!..»

Шы ни тӧв вӧр-пуыс
	сулалӧ-кывзӧ.
Ланьтӧмась пӧткаяс,
	оз лэдзны шысӧ.
Тӧдӧны кӧк-чойлысь
	тшӧтш найӧ шогсӧ...
Ичӧтик нылуккӧд
	гӧгӧрыс шогсьӧ.