ПОТАН ДОРЫН СЬЫЛАНКЫВ


Быд керкаын лои би:
		Дерт ӧд, абу водз нин.
Лок жӧ бабны, дона пи,
		Тэныд кад нин узьны.
Ӧні тэныд абу шог,
		Медся долыд дырйыд —
Сёйӧм, ворсӧм сӧмын мог,
		Кынӧмпӧт он перйы.
Быдмӧм бӧрын уна ног
		Тэныд сюрас овны.
Олӧм сетас сьӧкыд ноп, —
		Сыысь эн кут повны.
Быдмигкежлад уна друг
		Лӧсьӧдны тэн ковмас.
Медся воддза, медся бур
		Другыд лоӧ школа.
Сійӧ восьтас тэнсьыд син,
		Олан туйтӧ индас,
Ноптӧ нуны сетас вын,
		Отсавны век пондас.
Мукӧд другъяс лоӧны —
		Уджалысь йӧз пиян.
Ӧтув накӧд оланныд —
		Босьтчас олӧм тіян.
Шедас сэки пӧтка борд, —
		Некытчӧ он йӧрмы.
Быдмы, сӧвмы, ло ён морт,
		Му путкыльтны вермы!