ПОЭТЛЫ ПАМЯТНИК

1

Август тӧлысь — менам муса кад.
Ар да гожӧм костын йитан пос.
Би гӧрд розъяса лӧнь пелысь сад,
Ывла эз на нильзьы, муяс кос.
Юргӧ парма весьтын асъя гимн.
Варышпиян вынсьӧдісны борд.
Талун казьтам Савинлысь ми ним.
Памятникӧн сувтіс гижысь морт.

2

Со быттьӧ сійӧ век на туйысь локтӧ,
Мед тӧдмавны, код сылы лэчсӧ октіс,
Мед юавны — да, кутшӧм нӧ пӧ мыжысь?..
Ме Сӧвет властьлӧн вӧлі медъяр гижысь.
Ме эг мӧй медся ёна сылы эскы.
Бур кӧсйӧмӧн ме сьӧлӧмӧс пыр песті.
Да, Сюзь Матвей моз тӧдлі райсӧ, адсӧ.
И сьӧдас воштылі ме сідз нин дженьыд кадсӧ...

3

А гашкӧ, вузалысьыс ачыс лэчкас шедіс,
И мынтӧдчыны эз сюр сылы вын.
И йӧз моз овны вӧля вылас медым,
Мӧд ногӧн сійӧ некыдзи эз мын?..

4

Куратов югдӧм виччысис кӧ, Савин,
Кыдз дзоридз косьмис шонді петӧм мысьт.
И Тима Веньлӧн коньӧр Трипан Васьыс
Нянь кӧдзны явӧ весигтӧ эз лысьт.
Кыдз быттьӧ ӧні бура нин ми олам,
А тшӧкыдакодь юасям на со:
И кытчӧ мунам? Кодлыкӧ-ӧ колам?
И кутшӧм олӧм тэчам воысь-во?
А олӧм ӧні бара пурта-чера.
То кыптӧ путч, то вунлӧм нин холера.
И мортлӧн олӧм грӧш дон нин оз сулав.
И уна том йӧз лунысь-лун пыр кулӧ.
Но эз на косьмы ваыс Эжва юын.
И эмӧсь на поэтъяс чужан муын.
И сиктса войтыр локтӧма со уна,
Поэтлы памятниксӧ восьтан лунӧ.
А сьыланкывъясыд кӧ ловъяӧсь, то тайӧ
Кулӧм бӧрад — медся югыд райыс.