ПЛЕНЫН ВӦВЛӦМ ВРАЧЛЫ


Иван Никифорович Осиповлы
1

Мый колӧ челядь дырйи,
Мем эз сюр.
Дадь ни лыжи чужан кырсянь
Эз менам тюр.
А олӧм чужъявнысӧ кутіс
Менӧ водз.
Детсадйысь индісны мен первойысь
Посводз.
Сэн олӧмысь эз мынтысь мамӧ,
Эз вӧв сьӧм.
И пукалі ме гортын ӧтнам,
Пась ни кӧм.
А сэсся школа пыдди виси
Куим тӧв.
Но челядьдыртӧг олӧм менам
Эз жӧ вӧв.

2

Ю воссьӧм, первой пароходъяс,
И батьсянь дыр виччысян сьӧм.
И мамлӧн кок шы кильчӧ содйын,
И ылыс виддзысь вайӧм льӧм.

И куим преник пызан шӧрын,
И быдса тупӧсь шобді нянь.
И бурдлігъясӧ олӧм кӧрыс,
И морта книга, Васька кань.

А сетіс овнысӧ мен эскӧм,
Фашистскӧй пленысь локтӧм врач.
Да, асьсӧ видзны сійӧс эськӧ,
Но олӧм вӧлі мӧд ног нач.

И пӧльлӧн вокыс вӧлӧм сыкӧд,
Но гортӧ эз во Тима Вась, —
Бур семьяыслӧн зумыд пыкӧд,
А ловйӧн воысь аддзис тась.

Мый сійӧ сӧмын сійӧн мыжа,
Мый смертьлы гыжъяс сэн эз сюр.
И тайӧ вир кисьтана тышас
Эз пукты мукӧдъяс моз юр.

Морт сьӧлӧм кедзовтӧмсьыд потӧ!
И дырсӧ сэсся эз нин ов.
Ас чужан муыс сійӧс сотіс,
А мортыс эз-ӧ мӧй нӧ ков?

Да, зарни кияса бур доктор,
И вӧлі Тіян ыджыд сям.
Ӧд менӧ ловзьӧднысӧ локтід,
Лов петӧм виччысис кор мам.

И кымынлы на сетід олӧм,
Ті тӧдід ассьыд медшӧр мог.
Гу вылад дзоридз нуны колӧ,
Век нюжӧдча со, ог и ог...