ПЕРА БАГАТЫР
Важӧн Рупта Раскын (Комму туй вылын) овлӧма Пера. Сійӧ вӧлӧма зэв ён. Рупта Раскын уна вӧлӧма прӧмыс, Пера ёна вӧлӧм кыйсьӧ. Сэн жӧ кыйсьӧ вӧлӧм вӧрса. Найӧ рас вылад мырддьысьӧмла спорӧ воасны. Вӧрса вӧлӧм шуӧ: вай пӧ силанымӧс мерайтам, кык киа паличӧн кыскасям. Пера зэв ён мыр бердӧ сюмысӧн гартчас (водзвыв кыз сюмыс лӧсьӧдас), сэсся кутасны кыскавны. Вӧрса зэв ёна кыскӧ, мырлӧн вужъясыс быдсӧн рутшка-ратшкакылӧны. Вӧрса юалӧ: мый нӧ пӧ тайӧ кылӧ? — Тэнад пӧ тай коскыд оръясьӧ. Сэсся вӧрса повзяс да чеччас кыскасьӧмысь.
Сэсся вӧрса юалӧ: тэ пӧ нӧ кор узьлан? Пера шуӧ: кор пӧ ме ки ни кок ог вӧрзьӧд, сэк пӧ ме узя. Тэ нӧ пӧ кор? — Ме пӧ кор унмовся, вомысь тшын быдсӧн петӧ, чомйӧ дрӧжжитӧ, сэтшӧма пӧ ме узя.
Пера дӧгадайтчас да кыдз пу чурка лоддя дорӧ водтӧдас, пасьтӧдас да шебрӧдас, ачыс бокӧ мунас кыйӧдчыны. Войын вӧрса локтас, кыйӧдчӧ, видзӧдӧ: Пера узьӧ. Пера пӧ десятой! — (дасӧд вийӧм морт) горӧдас. Пера асьсӧ лыяс: дявӧл пӧ первой!
Вӧрса кулӧ. Пера вӧрсалысь бабасӧ босьтас да сыкӧд кутас овны. Олісны, олісны да коркӧ Пера аддзис бабаыслысь той виӧм. Бабаыс вӧлӧм ассьыс юрси кучиксӧ кульыштас да тойяссӧ вомнас тричкӧдӧ-виалӧ. Пера зэв ёна скӧрмас да бабасӧ кӧсъяс вины. Баба пышъяс. Пера вӧтчас да Розь туй вылысь нюр вылӧ суас да сэтчӧ виас.
Коркӧ Пера дінӧ пара вӧлӧн локтасны: сар ыстӧма Перасӧ корны. Пераӧс пӧ корисны сар дінӧ. Пера вӧлӧм шуӧ: ме пӧ вӧв доддьӧ ог сӧв. Мен пӧ толькӧ висьталӧй, кутшӧм ныр пӧ колӧ муннысӧ. — Рытыввыв пӧ колӧ мунны.
Пера лызь вылӧ сӧлас да мунас. Вежон водзджык Пера воас сар дінӧ пара вӧла дорысь. Сар вӧлі шуӧ: неприятель пӧ кӧлеса лэдзӧ да войскаӧс жугӧдӧ; тэ пӧ сійӧ кӧлесасӧ тюригкостіыд кут. Пера мунас, кӧлеса тюригкості кватитас да жугӧдас. Сар зэв ёна сійӧс гӧститӧдас аслас дворечын да шуӧ: вай пӧ менам вольпасьӧ вод да узь. Мӧдлун сар чеччас да Пералысь юалӧ: кутшӧм пӧ узьны менам вольпасьыс? — Менам лоддя кодьӧй пӧ абу на. — Вай пӧ, кутшӧм лоддяыд, петкӧдлы.
Пера ӧшинь улас лоддя вӧчас да сэні-й узяс. Менам лоддяыд пӧ медся на лӧсьыд узьлыныд. — Мый пӧ тэд колӧ награда? — кутас шуны сар. — Меным пӧ колӧ толькӧ Рупта Рас, сы кындзи пӧ нинӧм оз ков.
Сар сетас сылы Рупта Рас век кежлӧ. Пера бӧр мӧдӧдчас аслас Рупта Раскас.
