ПЕЛЫСЬ


Пӧжӧм йӧв кень рӧма вӧлі луныс,
Кисьмӧм вотӧс кӧрӧн ӧвтіс муыс,
Кодыр вайи тэнӧ арся вӧрысь
Моровоӧ, керкадорса йӧрӧ.

Садиті да — гӧгйӧдз на и вӧлін,
Пушыд лымйыс тупкис тэнӧ тӧлын.
Парма-мамыд кынмалӧмысь видзис,
Шоныд зэр тэн тулысыслӧн вичмис.

Шонді югӧр кояліс тэн гожӧм,
Медым быдмин уна розъя вожӧн.
Воис кад — и лоин ӧшинь улын
Зарни молля верстьӧ пелысь пуӧн.

Кор мен долыд — сэк тэ кыа рӧма,
Артмас кывбур — сэки шонді рӧма,
Кор мен йирмӧг — сэк тэ бипур рӧма,
Кодыр шог мен — сэк тэ рана рӧма.

Гӧгӧрвоам тэкӧд ӧта-мӧдӧс,
Кыкнанным ӧд коми парма рӧдысь.
Югыд рӧмтӧ коркӧ... коркӧ нуа
Аслам синмын менӧ дзебан гуӧ.