* * *

Пасьтавмысьт выль паськӧм важ вылӧ видзӧдіг
Шензьӧ гӧль морт: «Да пӧ кыдз сійӧс новлывсьӧм!»
Сідзи тай шензя ме, кодыр важ олӧмӧс
Гаровта. Кыдз сійӧ шогмывлӧм, овлывсьӧм!

Велалӧм чир вӧсна корысь моз уджалі,
Йӧз вӧчис пиянсӧ, найӧс ме велӧдлі,
Сэсся Фемидакӧд гораньӧн ворсігӧн
Бӧрдлі да, мый керан, синъясӧс зэлӧдлі.

Ас пытшкысь кыла ме эбӧс-вын лёк паныд,
Мичаджык водз вылӧ виччысьны лысьта ме…
Уся кӧ мудзмысьт ме гуӧ, сэн, вокъясӧй,
Мывкыда лолавны кӧсйысьӧс сісьта ме.

Сы бӧрын грездъясын, каръясын оз шуны:
«Бур вӧчис тырыс и нимнас зэв гымаліс».
Гу тыртысь шыасяс: «Код тӧдӧ лов вывсьыс!
Шуӧны, долыдик сёрнинас нималіс».