«ПАРАШЮТИСЪЯС»


Кӧні ме уджалі, улича мӧдарас стрӧительяс лэптісны вит судта кирпичнӧй керка. Сэсся локтісны маляръяс. Том нывъяс быдӧнкӧд тшӧтш зілисны, медым выль олан керка эштӧдны Май 1 лунӧдз, ыджыд да тувсов гажа праздник кежлӧ.

Апрель помын на керка дорӧ кутісны локтавны машинаяс, кодъяслӧн кузовъясас тыдалісны гардеробъяс, зеркалӧяс, холодильникъяс, телевизоръяс, улӧсъяс, книга стопаяс...

Недыр мысти выль олысьяскӧд тшӧтш керка вевтдорса ӧти горсйӧ овмӧдчисны и гулю гозъя. Югыдсянь пемыдӧдз лэбалӧны, пыр мыйкӧ воманыс вайӧны: кос турун, гӧн, коръяс. Тӧдӧмысь, поздысьӧны, челядьнысӧ кӧсйӧны быдтыны.

Гожӧмнас, кор косьмисны выль керка дорын ва гуранъяс, гулюяслы юны ковмис лэбавны вель ылӧ. Тайӧс медводз казяліс пенсионерка Клавдия Семёновна, коді оліс улыс судтаас. Сійӧ ӧшинь улас петкӧдіс ыджыд таз, кисьтіс сэтчӧ ва и кутіс чуксавны шӧвк морӧса гулюясӧс:

— Локтӧй, донукъяс! Гуль-гуль, гуль-гуль, локтӧй, юӧй чӧскыд васӧ.

Гулюяс видзӧдӧны горссяньыс мелі гӧлӧса пӧч вылӧ, оз гӧгӧрвоны, мый колӧ вӧчны налы.

Но лун-мӧд мысти велалісны ва тыра таз дорӧ. Лэччасны, лэдзасны нырнысӧ ва пытшкӧ да юасны дыр, чӧскыда, юрнысӧ лэптывтӧг.

Гулюяс ӧдйӧ велалісны и челядь дорӧ. И нывкаяс да зонкаяс найӧс радейтісны. То петкӧдасны нянь торъяс либӧ семечки, пуктасны найӧс таз бокӧ, и горсъясын быдтысьысь гулюяс здук мысти сэнӧсь нин, кокасьӧны, ветлӧдлӧны катласигтыр. Ӧні быд здук налы дона, колӧ вердны челядьсӧ, кодъяс быдмӧны лунысь-лун.

Тадзи и быдтысисны гулю гозъя. Но воис кад, кор том гулюясӧс колӧ вӧлі велӧдны лэбавны, медым ас нянь вылӧ сэсся петісны.

«Лысьтасны-ӧ найӧ та судта керкасянь лэбзьыны муӧ?» — майшасисны быдтысьяс.

Ӧти асылӧ, муртса кыпӧдчис шонді, энь гулю матыстчис неыджыд горс дорӧ да мӧдіс чуксавны пиянсӧ:

— Мый ме вӧча, сідзи жӧ и ті вӧчӧй. Эн полӧй, ӧдйӧ и лэччанныд муӧдзыс. Батьыд тіянлы отсавны кутас. Ме ачым медводз лэбзя му вылас, сэсся тэ, Еджыд Голя.

Гулюяслӧн мам паськӧдіс бордъяссӧ и парашютист моз надзӧникӧн плавгысис веж луд вылӧ, кӧні быдмисны дзоридзьяс.

Еджыд голяа гулю пи мыджсис кокъяснас кирпичӧ, эз тӧд, мый вӧчны. А мамыс чуксалӧ-корӧ сійӧс ас дінас. И батьыс тэрмӧдлӧ мышсяньыс.

Збоймӧдчис гулю пи, паськӧдіс жебиник бордъяссӧ, нюжӧдіс еджыд голясӧ и тойыштчис. Ставыс артмис бура, некыті эз чег ни эз доймы.

Еджыд Голя вылӧ видзӧдӧмӧн луд вылӧ тэрыба лэччис и сылӧн чойыс. Медбӧрын эновтіс горссӧ и батьныс.

Ӧні ставныс бара ӧтлаынӧсь. Том гулюяс кутасны велӧдчыны ӧдйӧ да бура лэбавны, сёян корсьны. Пемыд горсйын олӧм бӧрын ывла вылас кажитчис сэтшӧм гажа да югыд.


Гижӧд
«Парашютистъяс»
Жанр: 

lkejrlkelkrgner klrjnelknfrkl ekjnrjkenfrej

1