ӦТИ АСЫЛӦ


Родион Степанович радейтіс тайӧ скамьясӧ. Прӧст кадӧ пырджык кежавліс пукалыштны. Со и талун, муртса на тюль занавес пыр керкаӧ писькӧдчис гожся шонді, пуктіс юрас шляпа, зептас сюйис газет да петіс паркӧ. Сэні лӧнь и ыркыд. Кык кыдз пу, кодъяскӧд орччӧн сулаліс скамьяыс, видзисны шойччысьӧс шондіысь и тӧлысь.

Мукӧд лунъяс серти Родион Степанович кӧть и локтіс паркас водзджык, но тӧдса скамья эз нин вӧв тыртӧм. Юр улас ичӧтик чемодан пуктӧмӧн, сэні куйліс паськыд пельпомъяса, кузь тушаа зон. Ӧти киас сійӧ кутіс тополь кор, мӧднас вӧтлаліс ӧбидитчысь гутъясӧс. Зон куйліс носки кежсьыс, ботинкисӧ пуктӧма му вылӧ. Еджыд дӧрӧмыс бусӧссьӧма, сьӧдасьӧма. Орчча скамьяяс эз жӧ вӧвны тыртӧмӧсь.

Родион Степанович сувтіс кыдз пу бокӧ, видзӧдліс куйлысь морт вылӧ, сэсся кокньыдика кызӧктіс.

— А тэ, другӧ, гортад моз водӧмыд. Гашкӧ, топӧдчыштан?

Том морт неокотапырысь чеччис, зумыш синъясыс сатшкысьлісны тӧдтӧм морт вылӧ.

— Ньӧбин али мый местасӧ?

Пуксисны скамья помъясӧ. Тадзи найӧ пукалісны вель дыр. Шоныд сынӧдын бобувъяс моз бергалісны топольысь торъялӧм еджыд гӧнторъяс да надзӧникӧн пуксялісны вежӧдӧм му вылӧ.

— Воӧм морт, тыдалӧ? — медбӧрын шыасис Родион Степанович да вешйыштіс зонлань.

Том морт, буракӧ, эз кӧсйы вочавидзны юалӧм вылӧ. Кыскис чемодансьыс сьӧд нянь тупӧсь, чегис кинас вель ыджыд тор. Курччас гоз-мӧдысь, видзӧдлас ковтӧм сусед вылӧ, коді кутіс киас газет.

— Мый бурыс газетас? Он тӧд, кытысь аддзыны бурджык удж?

— Кутшӧм удж нӧ корсян?

— Мед эз вӧв буса, и грӧшъяссӧ бура мынтісны.

Родион вештіс газетсӧ бокӧ.

— Сідзкӧ, бустӧм удж корсян? Гашкӧ, министрӧ нин асьтӧ метитан?

Родион Степанович чургӧдіс водзлань ӧчкисӧ:

— Со тайӧ лапаяснас ме комын ӧти во кӧрта кӧлуй йира. И ог каитчы. А вӧлі кӧ тэ кодь том да ён, мӧд сы мында уджалі.

Кӧть зонлы эз вӧв окота кывзыны пӧрысь мортлысь ыдждалӧмсӧ, но чӧв оліс. Да и мый вермис висьтавны асьсӧ дорйӧм кузя! Эз первойя морт сійӧс вомав кокни удж корсьӧмысь. А Родион Степанович ошйысис аслас уджӧн, кужӧмлунӧн. Кӧть зонмыс некор эз аддзыв, эз пырав заводӧ, кӧні уна во Родион «йирис кӧрта кӧлуйяс», но кывзіс.

Аллеяті восьлалісны ныла-зонма. Найӧ топыда кутчысьӧмаӧсь, муныштасны, видзӧдласны ӧта-мӧд выланыс. Шудаӧсь, долыдӧсь. Кор казялісны скамья вылысь Родион Степановичӧс, пыр жӧ мынтӧдісны кияссӧ.

— Э-э... Мыйла нӧ яндысяд, — мудера мигнитыштіс том йӧзлы Родион Степанович. — И ачым коркӧ тіян кодьнас вӧвлі. Не этша нывлысь сьӧлӧмсӧ вӧрзьӧдлі, кор локті флотысь паськыд клёш гача. М-да... Ставыс кольӧма.

— Ті некор он пӧрысьмӧй, Степаныч, — шыасис вӧсньыдик гӧлӧса смоль сьӧд юрсиа ныв, кодлӧн еджыд ковта улас тӧдчис ён морӧс. — Шойччад?

Кор ныла-зонма дзикӧдз вошины, сэк сӧмын Родион Степанович заводитіс ошкыны найӧс.

— Эк, видзӧдлыны эськӧ тэныд, кыдзи найӧ уджалӧны! Торъя нин нылыс, Динаыс. Да и Тимофейлӧн сямыс тырмӧ. Мый босьтас киас, сійӧ и артмӧ. Абу найӧ сӧмын кыкӧн, сэтшӧмъясыс миян заводын матӧ ветымын морт чукӧрмас. Майбырӧй, том кадӧй, мыйла меным абу кызь арӧс?

Родион чӧв усьлі, видзӧдыштіс кытчӧкӧ водзлань. Гашкӧ, сылы дум вылас уси кольӧм воясыс. Колӧкӧ, жалитіс орччӧн пукалысь том мортӧс, коді ӧнӧдз оз вермы аддзыны олӧмас ассьыс места.

— Он радейт тэ, зонмӧ, уджтӧ, а кокниа кӧсъян овны. Кывтан-катан, а берегас некыдз он во. Жалита ме тэнӧ.

— А тэ эн жалит... — пӧшти горӧдіс том морт. — Нинӧмла менӧ жалитны...

Зон веськӧдыштіс чукыра гачсӧ, сувтіс да тэрыба кытчӧкӧ кутіс восьлавны. Кыпӧдчис скамья вылысь и Родион Степанович. Паркысь петӧм бӧрын токарь мӧдӧдчис улича веськыд бокӧдыс. Асфальтируйтӧм моски тані паськыд да веськыд. Шонділӧн югӧръясыс кучкисны моски вылӧ, мый вӧсна сійӧ кажитчис сӧстӧмджык да югыдджык.

Зон восьлаліс улича мӧдар бокӧдыс. Родион Степанович кӧть и эз аддзы улича мӧдар бокті мунысь том мортӧс, но думъясыс пыр па бергалісны сы йылысь. «Асныра, тыдалӧ, мортыд. Бур эськӧ вӧлі, миян заводӧ кӧ локтіс уджавны...». Ӧні сійӧ жалитіс, лый эз удайтчы дырджык сёрнитны сыкӧд.

Площадь вуджигӧн зонлы син улас усины йӧз портретъяс. Тайӧ вӧліны олӧма мужичӧйяс да нывбабаяс, нывъяс и зонъяс. Том морт тэрмасьтӧг видзӧдіс на вылӧ. «Тайӧ жӧ сійӧ», — тӧдіс ассьыс выль тӧдсаӧс, кодкӧд сёрнитіс паркын. «Кӧрта кӧлуй йирысьыс» портрет вылын кажитчис ёна томджык. Морӧсас ӧшаліс Ленин орден, а рамка улын гижӧд: «Родион Степанович Шилов, заводса медбур слесарь».

Том морт видзӧдліс гӧгӧрбок, быттьӧ кӧсйис выльысь аддзыны Родион Степановичӧс карса уличаяс вылысь, но сійӧ некӧн нин эз тыдав. Дыр сулаліс сылӧн портрет дорын. Вермис кӧ, ӧні жӧ корсис заводса слесарӧс да корис прӧща. Сійӧ унатор гӧгӧрвоис тайӧ здукӧ.


Гижӧд
Ӧти асылӧ
Жанр: 

lkejrlkelkrgner klrjnelknfrkl ekjnrjkenfrej

1