* * *

Ӧш моз буалігтыр кымӧр
Чардӧн воліс кыськӧ.
Ыджыд стынъяса важ грездӧс
Шливгысь зэрыс мыськис.

Ӧшкамӧшка вомӧнасис
Эжва васӧ юны.
Молля сир кодь бара югыд
Лои гожся луныс.

Быттьӧ керканымлӧн синкым —
Ӧшиньын выль карниз.
Ок и лӧсьыд: абу ӧвад,
Абу ёна жар ни.

Капуль, кӧчан, лук и сёркни
Вежӧдӧны йӧрын.
Зэрыс чужтас гоб и ельдӧг
Гажа, гулыд вӧрын.

Зарни югӧръястӧ, шонді,
Вӧр-ва вылас пыркнит,
Парма-мамлы кӧса помас
Лента пыдди шыркнит.