О, ЕНМӦЙ!..


Ой, кутшӧм дженьыд мортлӧн олӧм...
Быд мортлӧн аслыс пӧлӧс рӧк.
Ог кужӧй овны кокни лолӧн
Да пыр на вӧчам уна грек.

Ог кӧрит ассьым олан туйӧс,
Кӧть уна шыбӧль вӧвлі сэн.
Пыр радейті ме чужан муӧс,
Ог пӧръясь — аддзӧ-кылӧ Ен.

И восьлала ме Кадкӧд орччӧн
Да сиа сылы сьыланкыв.
Кӧть гортын сёрнита ме рочӧн,
Медмуса кывйыс — коми кыв.

Эг копрасьлы ме чинъяс водзын,
Дай копрасьнысӧ ог на-й куж.
Код дойдас менӧ — мынта водзӧс,
Ӧд мужичӧйӧн весь эг чуж.

Ме кӧсъя овны бур йӧз кытшын,
Дай ачым абу на дзик руй.
Мед эськӧ менам морӧс пытшкын
Зэв дыр на сяльгис Джеджимъю.

Мед кывтыдпомса паськыд эрдын
Скӧр петшӧр чишкавліс на кок.
Важ Эжва бокса чужан грездӧ
Ме кувны, ёртъяс, эг на лок.

Ен-ӧбраз водзӧ талун сувта
Дзор Джеджим грездса дзор поэт.
О, Енмӧй! Кутшӧм на ме шуда:
Ас синмӧн аддза вӧльнӧй сьвет.