МУ ДЖЫДЖ ДА ЧИКЫШ


Водз асывнас ӧти ю дорын аддзысисны му джыдж да вожа бӧжа чикыш. Кыкнанныс воӧмаӧсь татчӧ Африкаса ылі муясын тӧвйӧм бӧрын. Мудзӧмаӧсь, но пыр на зэв тэрыбӧсь. То ю пӧлӧн лэбалыштасны, то муяс весьтын номъясӧс куталыштасны.

Вожа бӧжа чикыш кутас некымын ном, сэсся матыстчылас му джыдж дорӧ. Дивӧ кодь сылы кажитчӧ, мый му джыдж быдтысьӧм вылӧ аслыс позсӧ вӧчӧма веськыда ю берег дорӧ, лыа кыркӧтшӧ. Абу ӧтнас татчӧ поздысьӧма, гашкӧ, комын-нелямын джыдж.

«Окота видзӧдлыны, кыдзи найӧ му пытшкас олӧны, абу ӧмӧй пемыд да гажтӧм сэні», — мӧвпалӧ вожа бӧжа чикыш.

Эз на удит юавны сійӧ аслас тӧдсаыслысь, кыдзи му джыдж берег дорысь вомас босьтіс кос турун и дзик пыр тювкнитіс-пырис аслас позйӧ. Недыр мысти джыдж бӧр петіс позсьыс и лэбзис ю сайӧ, кӧні кыйсисны-вийсисны сы кодь жӧ джыджъяс.

«Позъяс кӧ пырала, оз и аддзыв. Видзӧдла, кутшӧма овмӧдчис му джыдж, — и тюркнитіс-пырис, кытысь сӧмын на петіс ичӧтик тэрыб джыдж.

Вожа бӧжа чикыш вӧчис кымынкӧ воськов, югыдыс вочасӧн воши кытчӧкӧ. Кӧть повзьӧмысла сьӧлӧмыс мӧдіс ёна тіпкыны, а кокъясыс тіравны, надзӧникӧн муніс пыр водзӧ. Регыд сэсся зурасис кос турунъясысь да гӧнъясысь вӧчӧм позйӧ. Кокньыдджык лои сьӧлӧм вылас, мый эз вош тайӧ пемыд гуас. Бӧр мӧдіс восьлавны пыран туйӧдыс.

Мыйӧн помасис розьыс да тыдовтчис шонді югӧр, чикыш пыркнитіс ас вывсьыс лыасӧ да пуксис шойччыны кыз кер вылӧ.

Недыр мысти аддзис сійӧс му джыдж, коді вомас вайис гӧн, пыртіс сійӧс позъяс и тэрыба пуксис аслас тӧдса дінӧ.

— Вай варовитыштам. Кыдзи тэнӧ шуӧны? — шыасис джыдж.

— Ӧтикъяс менӧ шуӧны джыджӧн жӧ, мӧдъяс вожа бӧжа чикышӧн. Менам со бӧжӧй и збыльысь вожа.

— Джыджыс ӧд ме, а абу тэ, — эз эскы му джыдж. — Со ми кымын семья тані юдорса кыркӧтшас олам. Быдӧнлӧн асланыс поз.

— Ме кӧ тіян позйын нинӧм вылӧ эг ов: пемыд, гажтӧм. Кутшӧм йӧй лэбач му пытшкӧ позъялас.

— А тэ кӧні олан, вожа бӧж? — юаліс му джыдж.

— Менам абу поз, а двореч, — мӧдіс ошйысьны чикыш. Тасянь со сикт тыдалӧ. Меддорса керкаас, ӧшинь курич вылас, менам позйӧй. Сёйысь сійӧс вӧчим, югыд, сӧстӧм, зэр ни тӧв оз веськав.

Му джыджлӧн серамыс весиг петіс.

— Сёйысь вӧчӧм керкаыд абу оланін: киссьыны вермас.

— Мыйла киссяс, бура кӧ вӧчан? Сёйсӧ ми дулльӧн кӧтӧдам, вӧв сиясӧн да турунӧн сорлалам. Кор позйыс косьмас, вӧлисти сэтчӧ овмӧдчам.

— Сідзкӧ, тіянлы, вожа бӧжа чикыш, позьӧ и карын овны?

— Сиктад бурджык. Сёянтӧ кокньыдджык корсьны, абуджык зыка, сынӧдыс сӧстӧмджык. Миянӧс весиг унаӧн нимтӧны сиктын олысь чикышъясӧн. Сідзкӧ, ми тэкӧд, му джыдж, суседъяс. Гӧститны волы, миянлысь оланінсӧ видзӧдлы.

Му джыдж улӧдз копыртліс юрсӧ.

— Рад эськӧ вола, да ӧні некор: воис быдтысян кад.


Гижӧд
Му джыдж да чикыш
Жанр: 

lkejrlkelkrgner klrjnelknfrkl ekjnrjkenfrej

1