МЕНАМ МОСКВА


Москва тэ менам! Весиг шонді,
Ас бӧрсьыс муӧс нуигмоз,
Оз сідзи мувывсаӧс шонты,
Кыдз шонтан тэ, дерт, оз!

Вой тундрасянь пургаяс вомӧн
Ме тэнӧ аддза лун и вой
Век сэтшӧм кыпыдӧн и томӧн,
Кыдз воддза ар, Москва-герой.

Ме аддза воинӧс, кыдз сійӧ,
Фронт вылӧ тэрмасигӧнмоз,
Ас зептас, сумкаясӧ сюйӧ
Горючӧй тыра уна доз.

Медичка кыдзи шынель вылӧ
Сэн вежӧ ассьыс руч ку пась,
И лётчик тэ весьтын век кылӧ —
Враг вылӧ уськӧдчыны дась.

Став честнӧй йӧзыс, аддза, сиӧ
Москвалы овны помтӧм нэм,
И тэрмасьӧмӧн отсӧг сійӧ
Быд вожӧд мӧдӧдӧ, мый эм.

Урал победа тэныд дорӧ.
И ылі Асыввывса край,
Москваӧд подступъясыд дорӧ
Оружье ыстӧ ассьыс пай.

Кыдз некор водзті тэныд сетӧ
Дзонь юяс тырӧн нефть Кавказ.
Казах тэ ради шахта пестӧ,
Мед судзӧдны подземнӧй газ.

Тэд из шом ыстӧ Заполярье.
Вӧр лэдзысь унджык вӧчӧ вӧр.
Сибырын олысь руда перйӧ,
И ненеч быдтӧ унджык кӧр.

Тшук цемент йитӧ йӧзсӧ мирысь
Став мирлы грӧзитысь беда,
Ӧд быдӧн тӧдӧ, он мын вирысь,
Фашистскӧй ловъя кӧ чума.

Ён тышад тэныд отсӧг вылӧ
Американскӧй воссис банк,
И Англиясянь, важӧн кылӧ,
Рабочӧй ыстӧма нин танк.

Мед тысяча пӧв ёнджык мургӧ
Враг юр весьтын смертельнӧй гым!
Мед бойлӧн музыкаыс юргӧ,
И тӧвся воздух лолӧ пым!

Мед стальысь, свинечысь да биысь
Зэв страшнӧй кыпӧдчылас смерч,
Да изверг чукӧр миян киысь
Мед сӧмын пӧлучитас смерть!

Оз быд морт лэбав кымӧр сайын,
Оз ставыс гижлав море ва,
Но быдӧн дась, мед лоны пайын
Ас вирӧн дорйыны Москва.