* * *

Кымӧр чукӧр — лудӧ лэдзӧм ыжъяс —
Люкасьӧны, сыркмунлӧ веж эрдыс.
Эжва весьтын вожа бӧжа джыджъяс
Туналісны тшӧтш жӧ шоныд зэрсӧ.

Енэжланьыс чургӧдӧма кисӧ,
Корис зэрсӧ весиг пӧрысь пожӧм.
Кодзувъяссӧ мый-ӧ Енмыс изӧ:
Биа ньӧвсӧ сявкйӧ уна вожӧн.

Зэрыс пырис сиктӧ кывтыдпомсянь,
Мыськис керка ӧшиньяс и ывла.
Кӧтӧдіс сьӧд юрсисӧ и Тося,
Коскӧдз кӧса быдмас медым сылӧн.

Гулыд ягын гӧрд гоб уна петас,
Юмов сӧзӧн пӧльтчас парма вотӧс.
Нӧрыс бокӧ шылькнитчӧм кос эрдас
Ӧзйысь озйыс чуньтӧ весиг сотас.

Ворсысь челядь эновтісны кобув,
Ӧда зэрысь ваймис ывла жарыс.
Алӧй бордъя лэбӧ тонӧ бобув —
Чужан мулӧн быттьӧ алӧй парус.