* * *

Кыккокйыв котӧртысь вӧв моз
Тэрыба лэбӧны вояс.
Господьӧй-енмӧй, со бара,
Бара нин чужан лун воис.

Гожъялӧм чужӧма гожӧм
Шонділысь югӧръяс путшкӧ.
Гыӧрысь арлыдӧй кыӧ
Эзысьӧн дзирдалысь юркытш.

Ог кӧсйы чери моз лӧня
Енэжа-му костас овны.
Кӧсъя ме медбӧръя здукӧдз
Коса кодь лэчыдӧн лоны.

Ӧтарӧ кытчӧкӧ муна,
Сьӧлӧмӧй кытчӧкӧ кыскӧ.
Кузь туйын абу ме ӧтнам —
Котӧртам сьӧлӧмкӧд кыкӧн.

Суӧда лунсӧ и войсӧ,
Котӧрта, усьла и чечча.
Весигтӧ вуджӧрӧй мудзис,
Колис туй чукыляс эстчӧ...