КУЗЯ ВИЗУВТӦ ВЫНЙӦРА ЭЖВА
Кузя визувтӧ вынйӧра Эжва, Помсянь помӧдзыс уна сюрс сыв. Асыв-войвывлань талун ми кежлам, Ветлам Эжвалысь видлыны йыв. Пашляк ковӧдчӧ, узьӧны пуяс, Еджыд мраморӧн шыльквидзӧ му. Вездеходӧн ми лым питі уям. Кыскы, кӧрт гырка вӧланӧй, ну! Сыктывкарсянь ми важӧн нин петім, Гажа Кӧрткерӧс мыччыліс бан. Ыджыд копыр ми грездыслы сетім: Овліс-тільсьыліс Лебедев тан. Со и Нёбдінса Витторлӧн сиктыс. Кӧть и Витторыс оз нин тан сьыв, Сійӧ оз нин со нюмъяв, ни чиктыв... «Бурӧн казьтылам!» — шуим ми кыв. Дереваннӧй сикт мунігӧн шедліс, Ыджыд школаыс тӧд вылын мен. Сэтысь Нёбдінса Витторыд петліс, Тима Вень коркӧ велӧдчис сэн. Мунам водзӧ ми ягӧд и вӧрӧд, Помтӧм паськыд и кузь миян му! Пырам Коми му сьӧлӧмас, шӧрас... Кыскы, кӧрт гырка вӧланӧй, ну! Со и Помӧсдін син водзӧ петіс, Мича стрӧйбалӧн тыдовтчис нюм... И вот мунам ми туй кузя сэті... Воӧ тӧд вылӧ сё пӧлӧс дум. Татӧн, тӧданныд, овлывліс коді? Кодлӧн зумыда тувччавліс кок? Коми гижӧдлы пуктыліс подув? Тима Вень да Иона — кык вок! Накӧд юргис тшӧтш Маегов-Варыш, Сандрик Миколлӧн кывсьыліс гор, И Вась Педӧрӧс кыдз нӧ он гарышт... Найӧ вӧчисны уна буртор! Меным вӧліны найӧ бур ёртъяс, Коми гижӧдлы — мелі бать-мам. Ӧні, гижӧдлӧн быдмис кор бордйыс, Налысь удж донсӧ гӧгӧрвоам. Найӧс Помӧсдін чужтіс и быдтіс, Сетіс Сӧветскӧй власьт налы мез. Налӧн удж вӧлі тшӧттӧм и лыдтӧм, Некор шойччӧм эз тӧдлыны, эз. Колӧ та мича грездыслы шуны Сэтшӧм чолӧм, код некор оз сім, Нэмсянь нэмӧдзыс сьӧлӧмын нуны Сійӧ быдтаслысь дзирдалан ним.
Гижысь: 
Гижӧд
Кузя визувтӧ вынйӧра Эжва...
Жанр: 
Гижан кад: 

lkejrlkelkrgner klrjnelknfrkl ekjnrjkenfrej

1