КӦНКӦ ЫЛЫН, ВӦР ТЫ ДОРЫН...

Суоми йӧз поэзияысь


— Кӧнкӧ ылын, вӧр ты дорын сулалӧ ӧтка керка. Сулалӧ, муртса тыдыштӧ веж лапъя джуджыд коз пуяс пӧвстын…

— Сэн эськӧ гаж петӧ овны мем.

Мед — дзоля кӧ сійӧ керкаыс, мед — важ кӧ, шогмытӧм видзӧдны йӧзлы: ме ӧтнам сэн бур сьӧлӧмӧн долыда ола. Кань кургӧм шыӧ гор дорын пукала, пучӧй дзуртӧм шыӧ би дорын вуграла… Кельыд тӧлысь мичаа кисьтӧ ассьыс югӧрсӧ еджыд лым вылӧ, зарниӧн ворсӧ ӧшинь гыӧрын…

— Сідз эськӧ кӧсъя ме олыштны.

Некодӧс эськӧ ме ог кор ас дінӧ, ны некодӧс. Мед некод мем эз казьтыв аслам бӧрӧ кольӧм олӧм йылысь, эз вӧрӧд менсьым кенясьӧм сьӧлӧм дойясӧс…

— Ӧтиӧс сӧмын, дзик ӧти другӧс ассьым ме сибӧда ас дінӧ: ыргӧн везъя ворсанторйӧс — кантелеӧс. Сы вылын эськӧ ме куті ворсны бипур дорын пукаліг, шонтысигмоз, нимкодясигтыр, кыдзи тӧлысь югӧрыс джодж пӧв вылын ворсӧ…

Мый эськӧ ворсі ме? — Ме эськӧ ворсі-троньӧдчи ӧтка олӧм йылысь, сьылі нор-жугыль ас кежся лӧня вылӧм йылысь. Ме эськӧ эг кут норасьны кодкӧ вылӧ, эг кут бӧрдны бӧрӧ кольӧм олӧм йылысь…

Кодыр ворссис эськӧ, помасис менам сьылӧмӧй, — ӧшӧді эськӧ ассьым кантелеӧс керка пельӧсам и видзӧді ӧшиньӧд пемыд вӧр вылас да кӧдзыд сэзь енэж вылас…

Вӧлись эськӧ сэк лӧнис менам олӧмӧй, вӧлись эськӧ бурмис менам мудзӧм сьӧлӧмӧй…


Вуджӧдысь: 
Гижӧд
Кӧнкӧ ылын, вӧр ты дорын…
Ӧшмӧс: 
Оригинал гижысь
Juhani Aho
Оригинал ним
Alakuloisuuden ylistys

lkejrlkelkrgner klrjnelknfrkl ekjnrjkenfrej

1