КОМИ БАГАТЫР
«Педӧр Киронӧй, Роч му кутысьӧй...»

Рочын – коми,
Саридз сайын – роч,
Изьватаслы, гашкӧ-й, «Эжва ляти».
Пӧрысь пӧльӧс нуліс помор коч.
ГДР-ын вок, дай водзджык, батьӧй
Дорйывлісны коркӧ чужан му.
Талун «гӧпсай полицайыс» дзӧрӧ:
Йӧршитӧны мырдӧн (лешак, ну!)
Роч и коми пӧскӧтина йӧрӧ.

Коновалов, пӧрысь айлӧн вок
Роч казакӧн усис Икан дорын.
Рочнас шуӧмысь эз босьтлы сійӧс шог,
Бӧръя кывнас коми Енмӧс корис:
«Менсьым лолӧс югыдінад босьт,
Рӧд-свӧй видз да визув Мозын юӧс».
Чужис комиӧн, а усис, кыдзи роч
Туркестанса вирӧн мыськӧм муӧ.

Сюрӧс эм на, муса коми вок.
Коми сюрӧс. Сы серти и сюртчы.
Чужан муад вужйӧд зумыд кок,
Но эн вунӧд, мый тэ Роч му кутысь.