КОЛЛЯСЬӦМ

Узьыштім и колим ноддя
Пожӧг йылӧ.
Надзӧн петам турун доддьӧн
Мир туй вылӧ.

Кӧн пӧ сійӧ?! Чатӧрт юртӧ,
Видзӧд ылӧ.
Лыйсьӧ кӧдзыд, додь вож дзуртӧ — 
Йыдж-йидж сьылӧ.

Тэ эн пов, мый трактӧдз ылын,
Коркӧ воам.
Юж оз лэпты ордым вылын?
Гӧгӧрвоам!

Восьлав водзӧ, сьывны горӧд
«Шонді банӧй».
Горыш няртӧ морт оз орӧд,
Вӧля тані.

«Том олӧмӧй, шонді банӧй», — 
Ваксям-сьылам.
А друг кодкӧ «мамӧй, мамӧй»
Горзӧ — кылам.

Видзӧдлім, а Ӧльӧш Сашлӧн
Гужи пӧлыс
Бруткысьӧма, бокӧн асьсӧ
Кыскӧ вӧлыс.

Ваксям, сералам, а гужи — 
Сійӧ гужи.
Сытӧг водзӧ тэ он чужйысь,
Додь оз южнит.

Колӧ вурны. Нырагезйыс...
Пестысь, биась.
Сюрим кӧ нин рӧклы везйӧ,
Сыкӧд киась.

Бипур дорын сулалам ми,
Гужи вуриг.
Кӧдзыдыс и сэн оз раммы,
Сылы сюрим!

Йӧкты, Ануш! Тырмас сьывны
Вомгорулад.
Шытӧ пуясыс оз кывны
Нямлялігад.

А кор йӧктам, сэки долыд
И зэв гажа.
Нимкодьпырысь сэки лолыд
Ветлӧ дажӧ.

— Да, — мен вочавидзӧ Ануш, — 
Эськӧ вӧлі
Сё пӧв долыдджык, кор тані
Тойтны ӧлім! — 

Серам — серамӧн, а Анлӧн
Мӧвпыс веськыд.
Но мый вӧчан? Емва бокын
Видзӧн дзескыд.

Турун вайны колӧ мунны
Чӧрт сюр йылӧ,
Кытысь весиг ытва дырйи
Пур оз кылӧд.

Туйным сьӧкыд, но ог няргӧй,
Венам сійӧс.
Ми ӧд быдӧн чужим татӧн,
Сьӧд вӧр пиас.

Вурим гужи, колим бипур,
Йиджакыліг
Бара петам турун доддьӧн
Мир туй вылӧ.

Кӧн пӧ сійӧ! Чатӧрт юртӧ,
Видзӧд ылӧ.
Коркӧ воас, сетас шуд тэн
Визьыс сылӧн!