КЕПЫСЬ ЙЫЛЫСЬ
Сюрс ӧкмыссё кызьӧд воын коркӧ Отпускӧ лэдзисны гортӧ Фронт вывсянь миянӧс, куим ёртӧс. Юрын дзоля картуз — тӧв шӧр тӧлын, Ставным кепысьтӧмӧсь вӧлім, Кокни шынеляӧсь гортлань «тӧлім». Пашляк лёкысь лыйсис ывла вылын, Жальыс ньӧти эз пет сылӧн Кокниа пасьтасьӧм войтыр вылӧ. Сыктывкарлань Мурашсянь ми петлім. Самолёт ни авто сэк эз ветлы, Кокъяснымӧс песӧм бура шедліс. Кодыр кутам кынмыны да мудзны (Туйным вӧлі лёка кузь нин) Пыравлывлам шонтысьны да узьны. Ӧтчыд бура узим дядьӧ ордын. Пӧлать шоныд — быттьӧ гортын. (Радейтӧ зэв пӧлатьтӧ туй мортыд!) Кӧзяйка кыдз вермис вердіс-удіс: Вӧлӧма на миян шудыд! Сэсся водзӧ мӧдӧдчыны кутім. «Во джын миянсянь эз вӧв нин юӧр, Ловйӧн асьнымӧс со нуам. Свертӧкӧ, дерт, гижисны нин», — шуам. Гортӧдз нӧшта сё километр саяс, Нимкодясиг асьнымӧс ми ваям, Кӧть и пашляк важ моз скӧр и наян. Петіганым шуим: «Аттьӧ, сёйим-юим!» Сэки кӧзяйка питшӧгам сюйис Кепысь гусьӧникӧн да и шуис, Вашнитіс пель водзӧ меным сійӧ: «Новлы, мед оз гегды киыд... Чӧв ов!.. Скуп зэв кӧзяинным миян... Висьтав месянь мамукыдлы чолӧм, Ӧні «бур туй» шуны колӧ. Мӧдысь сэсся коркӧ бара волӧй!» Кашемир чышъянӧн водіс сьывйӧ Бур аньыдлӧн татшӧм кывйыд, Вывтыр вылам павкнитчис шӧвк тывйӧн. Шоныд кепысь тайӧ авъя иньлӧн Матӧ сьӧлӧмӧ мен инмис: Аттьӧалан синва чуктіс синмысь. Куим во ме тышкаси фронт вылын, Няргӧм месянь вӧлі ылын, Но эг путьмы шуны нинӧм сылы. Колӧ вӧлі бур аньсӧ окавны — Бур керӧмсӧ тадзи аттьӧавны... Но ми... чорыд сьӧлӧмаӧсь ставным! Колӧ вӧлі том эбӧса сывйӧн Лэптыштлыны аслам сьывйӧ... Горш гӧрддзасис, и эз артмы кывйӧй. Ылӧ коли сійӧ кадыс, кор ми Анькӧд кутім татшӧм сёрни. Со и юрсиӧй нин дзикӧдз дзормис. Кыськӧ пыдысянь пыр менам чуктӧ: «Вылӧ бур сьӧлӧмӧс пуктӧй, Ним мед сылӧн ылӧ-ылӧ югдас! Медым бур сьӧлӧмъяс му пасьтала Нималасны, медым налӧн Вирныс вӧлі нэм чӧж пӧсь да алӧй».
Гижысь: 
Гижӧд
Кепысь йылысь
Жанр: 
Гижан кад: 

lkejrlkelkrgner klrjnelknfrkl ekjnrjkenfrej

1