КАРАЧИ ТЫШКАСЬӦНЫ ӦСТЯКЪЯСКӦД

Карачияс сійӧ, но племена ли, народ ли сэтшӧм. Мӧдӧдчасны войнаӧн. А соберитчӧм водзвылас шаман, — кӧрдорсаяслӧн тай пыр шаманъяс, гашкӧ, ӧні на шаманъяс выйимӧсь, — решитас испытайтны: бур али лёк ветлӧмыс лоӧ.

Босьтас стрела. Сэк ӧд толькӧ стрелаӧн на воюйтӧмаӧсь. Кос воль ӧшӧдас — сэтчӧ лыйны. Вир кӧ петны кутас — а колян вося волльысь нӧ кутшӧм эськӧ вир петас, — но налӧн, шаманъяслӧн, гашкӧ, збыль вермас да. Сэсся ая-пиа. И пиыс лыяс. И збыль вир чеччас.

Старикъяс кутісны сёрнитны: оз ков мунны, несчастнӧй лоас ветлӧмыс. А код воинственнӧйджык, найӧ и мунны мӧдӧны. Ӧстякъяскӧд воюйтны. Кӧнкӧ Ляпин краяс жӧ найӧ олӧны. Сэтчӧ воасны да сувтасны да харейясныссӧ сувтӧдӧмаӧсь да топ кос вӧр ді. Кӧнкӧ унаӧн жӧ мунӧмаӧсь. Тайӧ тай коркӧ пӧжаръяс дырйи сотчас да пуыс куш кольӧ, сідз жӧ.

И ая-пиаыс мунасны ӧстяк станас. Но мыйкӧ, гашкӧ, договоритчыны ли мый ли, ӧні тай кыдз парламентёръяс, мед мирӧн ли мый ли, воюйттӧг договоритчыны. А ӧстякъясыс босьтасны да кӧрталасны, нярталаӧн гартласны чомъяс. Ая-пиаыс кыкнанныс зэв вынаӧсь. Найӧ толькӧ сідз и петӧны кисьыныс, оз сетчыны. А пока айыскӧд вермасясны, пиыс разьсяс да тшын розь пырыс чеччыштас, чомъяс тай вот мукота розь эм. Дадюлас пуксяс да исковтас ас дораныс. Сэсся вӧлись, навернӧ, воюйтісныс.

И кыдзи старикыс и висьталіс: несчастнӧя воюйтасны.